Nɔ̰-ndôo gə́ wɔji dɔ Jerusalem 3 - Maktub gə́ To gə Kəmee

Dan néurti’g lé nékunda mee yel dɔ’d gə́ gəd to keneŋ

¹ Ma lé m’to dəw gə́ m’oo ko̰-né Loo gə́ yeḛ undam gə ndəi-kɔb gə́ ka̰ meekḭ pu ləa.

² Yeḛ ɔsm aw səm loo gə́ ndul njudu-njudu’g Ɓó yeḛ aw səm lookàr’g el.

³ Tɔgərɔ ya. Ndɔje kára-kára lai lé Yeḛ kundam gə jia gə́ naŋg-naŋg ya.

⁴ Yeḛ ar dakasrɔm gə ndar rɔm lé Ndòlé mbao-mbao ləm, Yeḛ guru siŋgarɔmje lé kara Rug-rug ləm tɔ.

⁵ Yeḛ ar kuma̰-yoo gə némeekonje D’aḭ dɔm sub to gə́ ndògo-bɔrɔ bèe tɔ.

⁶ Yeḛ am m’to mee bwa-dɔɓar’g Asəna gə deḛ gə́ d’wəi ləw-ləw bèe.

⁷ Yeḛ ila ndògo-bɔrɔ aḭ ne dɔm sub Ɔgm ne loo teḛ raga ləm, Yeḛ tɔm gə kúla lar gə́ wɔi yaa̰ ləm tɔ.

⁸ Ma m’ila boo-ndum naŋg M’no̰ m’ɓar-ɓar Mba kar dee la səm nɛ pi ləm, Yeḛ un mbia rəw dɔ tamaji’g ləm ləm tɔ.

⁹ Yeḛ gaŋg rəw-kabm gə kɔr mbalje ləm, Kila-rəwje ləm kara Yeḛ tuji pugudu-pugudu ləm tɔ.

¹⁰ Yeḛ tel to asəna gə da-tɔg Gə́ si umum rəw Esé toboḭ gə́ si loo-kiya-rəa’g bèe.

¹¹ Yeḛ ɔsm rəw-kabm’g ilam raŋg ləm, Yeḛ tim mbidi-mbidi ləma, Yeḛ ɔsm ilam dan nékəmndoo’g ləm tɔ.

¹² Yeḛ undam gə́ né gə́ kandə ɓandaŋg ləa wɔji dəa ɗig bèe ləm, Yeḛ ɔr ɓandaŋg ləa léréré gə́ dɔm’g ləm tɔ.

¹³ Yeḛ ɓugu Kandə ɓandaŋgje ləa Gə́ mee kuée’g lé wɔlɔg ya rḛgm’d.

¹⁴ Ma m’tel m’to nékogo lə dəwje lai ləm, Ndɔje kára-kára lai lé M’to nékila pa lə dee ləm tɔ.

¹⁵ Yeḛ ar meekad taa məəm pəl-pəl ləm, Yeḛ am m’ai ta-a M’aree tɔlm ləm tɔ.

¹⁶ Yeḛ təd ŋgaŋgəm gə kɔri-ərje ləm, Yeḛ rogm dan bu’g ləm tɔ.

¹⁷ I ɔr meekulɔm ləm ləm, I ar rɔlel ləm kara godo ləm tɔ.

¹⁸ Tɔɓəi m’pana: Siŋgam godo ya, Meem to yel gə́ dɔ Njesigənea̰’g el ŋga.

¹⁹ Ar məəi olé dɔ kəmndoo’g ləm ləm, Gə dɔ ko̰-né gə́ m’oo’g ləm, Gə dɔ ta-a’g ləma, Gə dɔ kuma̰-yoo’g ləm tɔ lé

²⁰ Loo gə́ məəm olé dɔ’g ndá Siŋgam yɔ ne ya.

²¹ Aa oo, ta gə́ m’ə̰ji məəm’g Mba kiŋga ne né gə́ m’aw ŋgina lé ɓa nee:

²² Némeemajije lə Njesigənea̰ lé Rudu dee godo ləm, Némeekaw taḭ-taḭje ləa kara D’unda ŋgaŋ dee el ləm tɔ.

²³ Deḛ tel to sigi gə ndɔje kára-kára lai ya. Ǝi, i lé meekɔrjol ləi lé To né gə́ tad rəg-rəg ya.

²⁴ Ma m’pa məəm’g m’pana: Njesigənea̰ to nébao ləm, Gelee gə́ nee ɓa M’ar məəm to ne yel gə́ dəa’g tɔ.

²⁵ Meemaji lə Njesigənea̰ lé To mbata yeḛ gə́ unda mée yel dəa’g Yeḛ gə́ saŋgee gə ŋgaw mée bura.

²⁶ Maji kar dəw si lɔm ya ŋgina Kaji gə́ ḭ rɔ Njesigənea̰’g lé.

²⁷ Maji yaa̰ kar dəw ula dəa Odo ne néməməna̰ Loo gə́ yeḛ nai ne basa ɓəi lé.

²⁸ Yeḛ a kɔr rəa si dɔ mundu Loo gə Njesigənea̰ wɔjee né kəm ra lé.

²⁹ Maji karee labə ta wuree naŋg, Banelə a kiŋga nékunda-mee-yel dɔ’g ɓəi.

³⁰ Yeḛ a tel kwɔjee Mba kar dəw gə́ njekṵdá ləm, Ta rɔkul gə́ d’ɔm dəa’g lé Yeḛ a taa taree kɔm dəa’g ləm tɔ.

³¹ Mbata Njesigənea̰ lé A kuba dəw kyá̰ gə no̰ el.

³² Lee yeḛ ar nékəmndoo Ra dəw kara Yeḛ tel ar mée aw taḭ-taḭ dəa’g Gə goo boo-meekɔrjol ləa.

³³ Mbata yeḛ ar dəwje d’oso kul Esé ula kəm dee ndòo to gə́ mée ndigi kari ba el.

³⁴ Loo gə́ d’aw tuba ɓərje lai gə́ mee ɓee’d gə gɔl dee ləm,

³⁵ Loo gə́ deḛ gaŋgta dɔ dəw’d gə goo rəbee el kəm Njekurdɔloo’g ləma,

³⁶ Loo gə́ deḛ d’ila ta lə dəw gel gə mḭdé ba loo-gaŋg-rəwta’g ləm tɔ lé See Njesigənea̰ oo el wa.

³⁷ See na̰ ɓa a pata kar né teḛ Lal kar Njesigənea̰ un ndia dɔ’g wa.

³⁸ See gə goo godndu Njekurdɔloo ɓa néurtije əsé némaji teḛ ne el wa.

³⁹ See ban ɓa dəw gə́ si kəmba ɓəi lé a no̰ rəa wa. Maji kar nana kara no̰ no̰ kaiyaje ləa-yeḛ nja.

⁴⁰ Ar sí n’tenje goo rəw-kaw síje lai ləm, Gə n’tən deeje so-so ləm tɔ Ɓa n’telje gə́ rɔ Njesigənea̰’g ɓəi.

⁴¹ Ar sí n’raje tamaji gə ŋgaw meḛ sí bura J’odoje ne ji sí par gə́ rɔ Ala gə́ si dara.

⁴² Jeḛ lé n’toje njékaiyaje gə njékɔsta-rəwje! I lé i ar məəi oso lemsé dɔ sí’g el.

⁴³ I dolè rɔi gə oŋg ləi ɓa orè ne goo sí ndəŋ Saar tɔl sí ne lal koo kəmtondoo lə sí.

⁴⁴ I o̰ rɔi gə mum Mba kar tamaji lə sí teḛ rɔi’g el tɔ.

⁴⁵ I tel sí gə́ né gə́ to kḛji gə nérɔkul Mbuna koso-dəwje’d gə́ raŋg.

⁴⁶ Deḛ lai gə́ to njéba̰je lə sí lé Teḛ ta dee ləgəgə-ləgəgə dɔ sí’g.

⁴⁷ Ɓəl ləm, gə bwa-yoo ləm, Gə néurti ləma, gə tuji ləm tɔ Ɓa to néje gə́ wɔji dɔ sí.

⁴⁸ Man-no̰ ruba kəm’g pɔ-pɔ Mbata tuji gə́ teḛ dɔ dəwje’g ləm lé.

⁴⁹ Man-no̰ gə́ ruba kəm’g neelé A gaŋg el ləm, a kəw el ləm tɔ

⁵⁰ Saar kar Njesigənea̰ gə́ si sém loo gə́ tar ya Ila kəmee oo ɓa.

⁵¹ Né gə́ teḛ dɔ ŋgama̰dje’g lai Gə́ mee ɓee-boo’g ləm gə́ m’oo lé Am m’isi ne dan némeeko̰’g.

⁵² Deḛ gə́ to njéba̰je ləm lal né gə́ bèe lé Deḛ d’aw ndo̰m to gə́ d’aw ne ndo̰ yelje bèe.

⁵³ Deḛ d’ilam mee bwa-mán’g, Gə mba kam m’wəi ləm, Deḛ tila kɔri mbalje dɔm’g ləm tɔ.

⁵⁴ Man lé turu dɔm mba̰, Ndá ma m’pana: Ma lé m’tuji ŋga!

⁵⁵ Ǝi Njesigənea̰, m’no̰ ɓar rii Loo gə́ ma m’to mee bwa-wəl’g neelé.

⁵⁶ I oo ndu no̰ ləm gə́ m’no̰ ne m’pana: Maji kari udu mbii dɔ ndu no̰’g ləm Gə́ m’tuma̰ ne ŋgururu-ŋgururu lé el.

⁵⁷ Ndɔ gə́ ma m’no̰ m’ɓar ne rii lé I ree pər gə́ rɔm’g Ulam pana: Maji kam m’ɓəl el.

⁵⁸ Mbaidɔmbaije, I lé ra rəwta ləm, Tɔɓəi i uga dɔm tɔ.

⁵⁹ Njesigənea̰, i oo kəm gə́ d’ula ndòo lé gao ya, Maji kari gaŋg rəwta ləm gə goo rəbee am.

⁶⁰ I oo né dalba̰ gə́ deḛ ra səm ləm, Gə njuma̰je lai gə́ d’ula meḛ na̰’d dɔm’g ləm tɔ.

⁶¹ Njesigənea̰, ndɔl gə́ d’ila dɔm’g lé I oo gao lem, Njuma̰je lai gə́ d’ula meḛ na̰’d dɔm’g lé kara I oo ya ləm tɔ.

⁶² Taje gə́ njéba̰je ləm pa dɔm’g ləm, Gə néje lə dee gə́ d’wɔji-kwɔji ra səm Gə ndɔje lai lé i oo ya ləm tɔ.

⁶³ Maji kari oo kula ra dee lé, Ma ya ɓa m’to nékɔspa lə dee.

⁶⁴ Ǝi Njesigənea̰, uga dɔ ji dee Gə goo né gə́ ji dee ra ya.

⁶⁵ Ar meḛ dee ndər siŋ-siŋ ləm, Ar ndɔl wa dɔ dee ləm tɔ.

⁶⁶ Ar oŋg ləi orè goo dee ndəŋ ləm, Tuji dee pugudu dɔ naŋg nee ləm tɔ.