Joɛl 4 - Maktub gə́ To gə Kəmee

Njesigənea̰ a gaŋg rəwta dɔ ginkoji dəwje gə raŋg’g

¹ Mbata aa ooje, mee ndəaje’g neelé Dəwje ləm gə́ Juda gə Jerusalem gə́ d’wa dee ɓər lé M’a tel ree sə dee ɓée gogo.

² M’a mbo̰ ginkoji dəwje gə raŋg dɔ na̰’d Mba kar dee ree kəm wəl-loo gə́ ria lə Josapat, Lée neelé m’a gaŋg rəwta dɔ dee’g Gə mbata lə dəwje ləm gə́ Israɛl gə́ to nédɔjim Gə mbata sané gə́ deḛ sané dee mbuna ginkoji dəwje gə raŋg’g ləm, Gə mbata lə ɓee ləm gə́ deḛ kai na̰ ləm tɔ.

³ Deḛ ra né asəna gə téḛ bèe Kai ne na̰ dəwje ləm ləm, D’wa ŋgon gə́ diŋgam taa ne tor kaiya-dené ləma, D’wa ŋgoma̰də ndogo ne mán-nduú gə́ mḭ d’ai ləm tɔ.

⁴ Seḭ njé gə́ Tir gə Sido̰, Gə seḭ lai gə́ síje dəb ɓeeko̰je’g lə Pilistije lé See ɗi ɓa seḭ ndigije rɔm’g wa. See seḭ ndigije dal ba̰ lə sí wa. Ɓó lé seḭ ndigi dalje ba̰ lə sí ndá M’a kḭ kalaŋ kar ba̰ lé Tel oso dɔ sí-seḭ’g ya.

⁵ Seḭ taaje larnda gə larlɔr ləm ləm, Nébaoje ləm gə́ gad dee ur kugu gə́ kura yaa̰ lé Seḭ odoje awje ne mee kəi-magəje’g lə sí.

⁶ Seḭ waje dəwje gə́ Juda gə Jerusalem Arje Jaban ndogo dee sə sí Gə mba kar dee d’ya̰ dɔ naŋg lə dee d’aw loo gə́ əw’g.

⁷ Aa ooje, m’a kar dee d’ḭ loo gə́ seḭ ndogo deeje keneŋ lé ree ləm, M’a kar dal ba̰ lé tel oso dɔ sí-seḭ’g ya ləm tɔ.

⁸ M’a kwa ŋgan síje gə́ diŋgam gə njé gə́ dené Ndogo dee gə Judaje, Tɔɓəi deḛ d’a ndogo dee gə Saba Gə́ to ginkoji dəwje gə́ əw, Ma Njesigənea̰ ɓa m’pa bèe.

⁹ Maji kar sí ilaje mbər néje neelé Mbuna ginkoji dəwje gə raŋg’g! Waje dɔ gɔl rɔ sí gə mba kaw rɔ! Ndelje bao-rɔje dɔ ɓi’g lə dee! Maji kar dee ree gə mba kaw, Deḛ lai gə́ to njérɔje lé!

¹⁰ Odoje kwɔs-paŋgmje lə sí Arje njekɔr ra dee gə́ kiambasje ləm, Odoje marmje lə sí Arje njekɔr ra dee gə́ niŋgaje ləm tɔ! Maji kar njerəm pana: Neḛ n’to njesiŋgamoŋ ya!

¹¹ Ɔsje rɔ sí ɓad gə́ reeje, Seḭ ginkoji dəwje gə raŋg lai gə́ guguje dɔ loo lé Mbo̰je dɔ na̰! Ǝi Njesigənea̰, lé neelé ar bao-rɔje ləi ree keneŋ.

¹² Maji kar ginkoji dəwje gə raŋg Gə́ d’isi kəmba d’ḭ d’aw Wəl-loo gə́ ria lə Josapat! Mbata lé neelé ɓa m’a si keneŋ Mba gaŋg rəwta dɔ ginkoji dəwje gə raŋg’g lai gə́ gugu dɔ loo neelé.

¹³ Maji kar sí ilaje marm lə sí gə mbɔree Mbata kó lé ər kəm kinja mba̰! Gə́ reeje mbulaje kandə nduú Mbata kandə nduú rusu loo-mbula-nduú lé ləm, Duraje kara rusu ruba naŋg pɔ-pɔ ləm tɔ! Meeyèr lə dee lé al dɔ loo sula mba̰.

¹⁴ Koso-dəwje gə́ bula digi-digi D’aar kəm wəl-loo gaŋg rəwta’g, Mbata ndɔ lə Njesigənea̰ Gə mba karee riba dɔ oŋg ləa mee wəl-loo’g Gaŋ ne rəwta lé nai dəb ba ŋga.

¹⁵ Kàr gə naḭ tel ndul njudu-njudu ləm, Rɔndɔḭ lə kéréméje kara godo ləm tɔ.

¹⁶ Njesigənea̰ ndaŋg rəa Sio̰’g, Yeḛ ila boo-ndia naŋg Jerusalem’g Aree ɓar ɔr loo lɔi-lɔi ya tɔ, Dara gə naŋg yə ɓugu-ɓugu Nɛ Njesigənea̰ ɓa to njo̰loo-kula-rɔ lə koso-dəwje ləa lé Yeḛ to loo-kɔn-rɔ lə Israɛlje ya tɔ.

¹⁷ Bèe ɓa seḭ a gərje gao To gə́ ma m’to Ala lə sí gə́ Njesigənea̰ ya, Sio̰ to loo-sim, Yee to dɔ mbal ləm gə́ to gə kəmee. Jerusalem a to gə kəmee to Ndá dəw-dɔ-ɓeeje d’a dəs keneŋ el ŋga.

¹⁸ Mee ndəaje’g neelé mán-nduú gə́ kul a kḭ dɔ mbalje’g kaḭ Teḛ kuji-kuji ləm, Mbà kara a kḭ dɔdərlooje kaḭ dɔ looje’g ləma, Man a rusu kəm-rəw-manje lai gə́ Juda ləm tɔ, Ŋgira mán a kḭ mee kəi’g lə Njesigənea̰ kuba tir-tir Gə mba taa kəm wəl-loo gə́ Sitim yal-yal.

¹⁹ Ejiptə a tel to dɔnduba ləm, Edɔm kara a tel to dɔdilaloo ləm tɔ, Mbata deḛ ra gayim dɔ Judaje’g D’ila ne məs njegelgodo mee ɓee’g lə dee.

²⁰ Nɛ dəwje d’a si ɓee gə́ Juda saar-saar ya ləm, Jerusalem a to loo-si ginkoji dəwje gə́ kédé-kédé ya ləm tɔ.

²¹ M’a dal ba̰ məs deḛ gə́ m’dal el ɓəi lé Ndá Njesigənea̰ lé a si mee ɓee gə́ Sio̰’g ya.