Maktub gə́ wɔji dɔ Jɔb 7 - Maktub gə́ To gə Kəmee

Ta kila’g lə Jɔb ya ɓəi

¹ See dəw gə́ dɔ naŋg nee lé kəmə ləa asəna gə ka̰ njerɔ bèe el wa. See ndɔje ləa to d’asəna gə ka̰ njera kula lar bèe el wa.

² To gə́ ɓər lé ndiŋga ndil kwa rəa keneŋ ləm, To gə́ njekula lar unda mée yel dɔ nékoga dɔ jia’g ləm tɔ lé

³ Togə́bè ɓa né kama to naḭ néɓəŋgərətije ləm, Koo ndòo loondulje’g ɓa gə́ né kama ləm tɔ.

⁴ Loo gə́ m’to naŋg lé m’pana: See m’a kḭ tar kàr gə́ ra’d ŋga nee wa. See kàr gə́ ra ɓa loo a kar wa. Meetila ŋgaḭla-ŋgaḭla asm nag-nag saar ta lookàr.

⁵ Korèje d’aw rɔm’g dèm-dèm ar rɔm wa mḛ̀ŋgḛ̀ŋgḛ̀-mèŋgèŋgḛ̀ ləm, Ndar rɔm ta̰ məs-məs gə tɔr wuyum-wuyum ləm tɔ.

⁶ Ndɔje ləm dəs kalaŋ to gə́ nékunji-kubu lə njekunji-kubu bèe, Deḛ sané pa: Loo kunda meeyel dɔ dee’g godo!

⁷ Ǝi Ala, ar məəi olé dɔ’g to gə́ kəmə ləm tɔ asəna gə lel bèe, Kəm a tel koso dɔ si dan maji’g el ŋga.

⁸ Kəmi gə́ oom lé a koom el ŋga ləm, Kəmi a saŋgəm nɛ m’a godo ləm tɔ.

⁹ To gə́ mum gə́ sané pa aw lé Yeḛ gə́ aw ɓee lə njé gə́ d’wəi’g lé a tel ree el tɔ.

¹⁰ Yeḛ a tel ree mee kəi’g ləa el ləm, Loo gə́ yeḛ si keneŋ kédé lé kara meḛ dee a kwəi dəa’g kalaŋ ləm tɔ.

¹¹ Gelee gə́ nee ɓa m’a kwa tam el, Néɓəŋgərəti gə́ to məəm’g lé m’a pa ne ta ləm, Meem gə́ adə mbag-mbag lé m’a ndiŋga ne rɔm ya ləm tɔ.

¹² See ma m’to gə́ mán baa-boo-kad əsé gə́ da-mán ɓa I unda njéŋgəmlooje ar dee gugu dɔm sub wa.

¹³ Loo gə́ ma m’pana: Dɔ tira tom a gɔl məəm ləm, To naŋg ləm a kar meekonje ləm oso lemsé ləm tɔ

¹⁴ Ndá i ɔm ɓəl dɔm’g gə nénije ləm, I am m’ɓəl m’ndəb ne pəd-pəd gə némḭdije ləm tɔ.

¹⁵ Ai-i, ma m’ndigi kar dəw ugu ɗɔrm gaŋg ɓa maji. Tɔgərɔ, kwəi ɓa maji unda kar siŋgamje nai njḭ.

¹⁶ Ma m’ə̰ji dee bəḭ-bəḭ, m’a si kəmba saar-saar el. Maji kari ya̰’m mbata kəmə ləm tɔ asəna gə lel bèe.

¹⁷ See dəw to ɗi ɓa i tɔs kəmi dəa’g bao-bao ləm, I aa dəa kər-kər ləm,

¹⁸ I teḛ gə ndɔ tənee ta-ta ləma, I aḭ mée ta-ta ləm tɔ wa.

¹⁹ See ndɔ gə́ ra ɓa i a kəw rɔi korè kəmi sḭ dɔm’g wa. See ndɔ gə́ ra ɓa i a kya̰ loo karm m’uru ne mán tam kəi wa.

²⁰ Ɓó lé m’ra kaiya ndá see ɗi ɓa m’askəm ra səi wa, i njekaa dɔ dəwje. See gelee ban ɓa i undam gə́ nékwɔji ndo̰ niŋgaje ləi Gə mba karm m’tel to nékodo gə́ wɔi dɔ rɔm’g wa.

²¹ See gelee ban ɓa i ar məəi oso lemsé dɔ kaiya’g ləm el ləm, I ar məəi wəi dɔ néra kori-korije’g ləm el ləm tɔ wa. Mbata ɓasinè m’a gə to babur’g. I a saŋgəm nɛ a koom el tɔ.