Maktub gə́ wɔji dɔ Jɔb 26 - Maktub gə́ To gə Kəmee

Jɔb tel ila Bildad’g

¹ Jɔb un ta pana:

² See i lé gər loo ree la gə yeḛ gə́ siŋgá godo ya wa. See i lé gər loo gəd kag ji dəw gə́ unda ndolè ya wa.

³ See takwɔji-kəmkàr gə́ maji gə́ ra ɓa i ar dəw gə́ gosonégər lalee wa. See boo-takəmkàrje gə́ ra ɓa i riba dəa wa.

⁴ See na̰ ɓa i ulá taje ləi wa. See na̰ ɓa ɔm ta nee tai’g wa.

Siŋgamoŋ lə Ala un naŋg nee lad

⁵ No̰ Ala’g lé njé gə́ d’wəi d’unda bala tigi-tigi Gel manje’g loo gə́ d’isi keneŋ.

⁶ Loo gə́ nea̰’g lé ɓee lə njé gə́ d’wəi to raga ndəgəsə ləm, Ɓul mán lé né gə́ nje ko̰ təa godo ləm tɔ.

⁷ Dara gə́ par gə́ dɔgel lé yeḛ najee mbuna loo gə́ kari ba’g ləm Yeḛ naa̰ naŋg mbuna loo gə́ kari ba’g rḭdoŋ ləm tɔ.

⁸ Yeḛ ŋgəm manje dan loo-kil’g-lə-ndi Ndá loo-kil-lə-ndi lé kara ndubu mbata kwɔi lə mán ndi lé el.

⁹ Yeḛ o̰ kəm naḭ gə́ ndá mbèd ləm, Yeḛ la loo-kil-lə-ndi ləa dɔ’g ləm tɔ.

¹⁰ Yeḛ inja ŋgaŋ loo dɔ manje’g Aree to gə́ rəw-nim gə́ to mbuna loondul gə lookàr’g bèe.

¹¹ Gajije gə́ ka̰ gəd dara yə, Deḛ ndəb pəd-pəd mbata ndaŋg ləa.

¹² Gə goo siŋgamoŋ ləa lé yeḛ ar baa-boo ḭ ne ləm, Gə goo gosonégər ləa lé yeḛ tuji ne beelé ləa pugudu ləm tɔ.

¹³ Kila kəmə pugudu ləa ar dara àr ŋgad-ŋgad ləm, Jia ɔs li gə́ njekaḭ mbudu ləm tɔ.

¹⁴ Yee nee ɓa gə́ ŋgaŋ kula reaje, To gə́ kaa né gə́ ɓar lam-lam oso mbi sí’g, Nɛ see na̰ ɓa a koo ndaŋg lə siŋgamoŋ ləa gə́ ɓar paḭ-paḭ lé wa.