Jeremi 6 - Maktub gə́ To gə Kəmee

Tuji gə́ boo gə́ a teḛ lé

¹ Seḭ Bḛjamije, undaje loo teḛje Mee ɓee gə́ Jerusalem. Imje to̰to̰ mee ɓee gə́ Tekoa ləm, Waje nékwɔji loo-rɔ tar mee ɓee Gə́ Bet-Hakerem ləm tɔ, Mbata némeeko̰ ḭ dɔgel si ree To nétuji gə́ boo.

² Ŋgoma̰də gə́ Sio̰ gə́ ma̰də ləm, Gə maji rəa’g péd-péd ləm tɔ lé Ma m’tujee!

³ Njékulbadje d’isi ree gə rəa’g Gə koso-nékulje lə dee, Deḛ la kəi-kubuje lə dee Gugu ne dəa sub, Ar nana kara o̰ mu ləa-ləa.

⁴ Waje dɔ gɔl rɔ sí mba rɔje səa! Loo gə́ kàr aar daŋdɔ ya ar sí j’awje! No̰ sí àr el mbata kàr lə sí godo ləm, Loo aw ndul ləm tɔ.

⁵ Ar sí j’ḭje loondul’g j’awje! J’aw n’tujije kəi-mbaije ləa.

⁶ Mbata Njesigənea̰ gə́ njeboo-néje ɓa pa togə́bè pana: Tugaje kagje ləm, Ubaje dɔndalje ləm tɔ rɔje ne gə Jerusalem. To ɓee-boo gə́ kəm kar bo̰ nérea Ɔs təa’g ya, Mbata kula kəm loo ndòo ɓa O̰ ɓee keneŋ.

⁷ To gə́ bwa-mán gə́ mán Uba tir-tir keneŋ lé Togə́bè ɓa némeeyèrje ləa kara D’ɔs dɔ na̰ neg-neg keneŋ tɔ. Baŋga néra gə́ kərm-kərm ləm, Gə tuji loo ləm tɔ ɓa ɓar keneŋ, Né gə́ to gə́ tor doo bèe Ɓa m’oo gə kəm ta-ta.

⁸ Dəwje gə́ Jerusalem, Taaje tandooje ləm Nà m’a kɔr rɔm rɔ sí’g, Kar ɓee lə sí tel to dɔdilaloo ləm, Gə ɓee gə́ dəw si keneŋ el ləm tɔ!

Koso-dəwje gə́ mbad koo ta

⁹ Njesigənea̰ gə́ njeboo-néje ɓa pa togə́bè pana: D’a tḭja ges Israɛlje gə́ nai lé To gə́ tḭja ne kandə nduúje bèe. Maji kari ula jii mam dee ne To gə́ njetḭja nduú, Mam ne barkəm nduúje bèe.

(Tapa Jeremi)

¹⁰ See na̰ ɓa m’a kulá ta Esé see na̰ ɓa m’a karee To njekɔrgoota ləm kar dee d’oo wa. Aa ooje, mbi dee udu jig-jig D’askəm kur mbi dee koo ne ta el. Aa ooje, ta lə Njesigənea̰ Tel to gə́ nérɔkul mbata lə dee ləm, Rɔ dee lel dee keneŋ el ləm tɔ.

¹¹ Oŋg-boo lə Njesigənea̰ Rusu məəm njḭ-njḭ. M’askəm kwa ŋgaŋgee el, Maji kari ɓugu oŋg neelé dɔ ŋganje’d Gə́ d’aw mba̰-rəw’g ləm, Gə dɔ basaje gə́ mbo̰ dɔ na̰ ləm tɔ. Mbata oŋg neelé a kwa diŋgamje Gə denéje ləm, Dɔ ɓugaje gə dɔ dee Gə́ ləb dee bula ləm tɔ.

(Tapa Njesigənea̰)

¹² Kəije lə dee d’a tel to ka̰ njé gə́ raŋg ləm, Loo-ndɔje lə dee gə denéje lə dee Kara bèe ləm tɔ, Loo gə́ m’a kula jim ndiŋ Gə́ dɔ dəw-mee-ɓeeje’g, Njesigənea̰ ɓa pa bèe.

¹³ Mbata un kudee dɔ dəwje Gə́ gɔ-gɔ’g saar teḛ ne dɔ deḛ gə́ boo-boo’g lé Deḛ lai lé mal kiŋga né Gə́ gə goo rəbee el ra dee ŋgwɔd-ŋgwɔd, Un kudee dɔ njetegginta’g saar teḛ ne dɔ njekinjanéməs’g lé Deḛ lai to njésukəmlooje.

¹⁴ Deḛ tɔ ta doo lə koso-dəwje ləm Gə goo rəbee el Ndá pana: Meelɔm! Meelɔm! Nɛ meelɔm godo,

¹⁵ D’a si gə rɔkul Mbata deḛ ra né gə́ mina̰, Rɔkul ra dee el ləm, sɔḭ wa kəm dee el ləm tɔ, Gelee gə́ nee ɓa d’a koso na̰’d Gə deḛ gə́ d’oso lé ləm, M’a tɔs dee tila dee Loo gə́ m’a kar bo̰ néra dee ɔs ta dee’g ləm tɔ, Njesigənea̰ ɓa pa bèe.

¹⁶ Njesigənea̰ pa togə́bè pana: Undaje rɔ sí rəwje’g aaje loo ooje. Dəjije kila-rəwje gə́ ləw ooje, See rəw gə́ ra ɓa maji wa. Bèe ndá njaaje keneŋ Ndá seḭ a kiŋgaje loo-kwa-rɔ sí keneŋ! Nɛ deḛ d’ilá keneŋ pana: Jeḛ j’a njaaje keneŋ el.

¹⁷ M’unda njéŋgəmlooje mbɔr sí’g dəb, Urje mbi sí gèŋ gə mba kooje ne ndu to̰to̰! Nɛ deḛ d’ilá keneŋ pana: Jeḛ j’a kurje mbi sí el.

¹⁸ Gelee gə́ nee ɓa Seḭ ginkoji dəwje gə raŋg, ooje ta! Seḭ gə́ mbo̰je dɔ na̰ lé Maji kar sí gərje né gə́ a gə teḛ dɔ dee’g lé!

¹⁹ I dɔ naŋg neelé maji kari oo ta, Aa oo, m’a gə kar némeeko̰ ree Dɔ koso-dəwje’g neelé Gə goo kandə takə̰jije lə dee, Mbata deḛ d’ur mbi dee Dɔ taje’g ləm el ləm, Deḛ d’ə̰ji godndum bəḭ-bəḭ ləm tɔ.

²⁰ Ubu gə́ ə̰də sululu gə́ d’ḭ ne Seba ləm, Gə kamnaḭje gə́ d’ə̰də lel Gə́ d’ḭ ne dɔ ɓee gə́ əw ləm tɔ lé See m’aw ndòo dee wa. Nékinjaməsje lə sí gə́ ka̰ roo lé Lelm el ləm, Nékinjaməsje lə sí gə́ raŋg kara Taa kəm el ləm tɔ.

²¹ Gelee gə́ nee ɓa Njesigənea̰ pa ne pana: Aa ooje, m’a kar kɔr mbalje To no̰ koso-dəwje’g neelé Gə́ nétuga gɔl dee ya, Ndá bɔ ŋganje gə ŋgan deeje gə́ diŋgam ləm, Njéboataɓeeje gə baokuraje lə dee ləm D’a tuga gɔl dee keneŋ Ndá d’a kudu ne guduru.

Njéba̰je d’ḭ par gə́ dɔgel d’isi ree

²² Njesigənea̰ pa togə́bè pana: Aa ooje, koso-dəwje D’ḭ par gə́ ɓee gə́ dɔgel bèe ree ləm, Boo-ginkoji dəwje d’ḭ rudu naŋg’d nee lai ləm tɔ.

²³ Deḛ d’odo ɓandaŋgje Gə ko̰ niŋgaje ləm, Deḛ to njémeemajelje Ɓó d’oo kəmtondoo el ləma, Ndu dee ɓar asəna gə baa-boo-kad bèe ləm tɔ. Deḛ d’uba kundaje D’isi pèrèrè gə mba rɔ To gə́ dəw gə́ kára ba bèe, Mba rɔ sə sí-seḭ gə́ síje Sio̰!

(Tapa koso-dəwje)

²⁴ Loo gə́ jeḛ j’oo ta ree lə dee ndá Ji sí unda ndolè Néɓəŋgərəti ra sí To gə́ ndóo gə́ ɔs dené bèe.

²⁵ Awje mee ndɔje’g el ləm, Awje rəwje’g el ləm tɔ Mbata lé neelé kiambas lə njeba̰ lə sí To keneŋ ləm, Ɓəl-boo aḭ dɔ sí sub ləm tɔ.

(Tapa Njesigənea̰)

²⁶ Seḭ koso-dəwje ləm, Ulaje kubu-kwa-ndòo rɔ sí’g Rogoje ne babur’g, Waje ne ndòo to gə́ dəw Gə́ wa ne ndòo ŋgon kára bèe ləm, No̰je gə mán kəm sí’g Siije ne mbigi-mbigi ləm tɔ, Mbata njetujiloo a gə kuba sí naŋg bus.

²⁷ Ma m’undai-i Jeremi Gə́ njenaa meḛ koso-dəwje ləm ləm, Gə mba kari gər rəw-kaw dee ləm, Gə tən panjaa dee ləm tɔ.

²⁸ Deḛ lai to gə́ njékɔsta-rəwje Gə njétədta kunda ta mar deeje’gje Gə́ kədərə asəna gə larkas gə larndul bèe, Deḛ lai tel to né gə́ ndum.

²⁹ Lel ndubu ar pər taa Ndá rɔm léḛ pe’d, Ndiri gə́ ndiri mba kar siḭyee teḛ lé Deḛ d’oo ne ndòo pi Siḭ lar teḛ mée’g el.

³⁰ Deḛ ɓar dee lar gə́ kəm kɔm kɔrɔ Mbata Njesigənea̰ mbad dee Ɔm dee kɔrɔ.