Jeremi 50 - Maktub gə́ To gə Kəmee

Ndərta gə́ wɔji dɔ koso lə Babilɔn gə taa gə́ taa dɔ Israɛlje lé

¹ Ta gə́ Njesigənea̰ pa gə ndu Jeremi, njetegginta wɔji ne dɔ Babilɔn ləm, gə ɓee lə Kaldeje ləm tɔ.

² Maji kar sí ilaje mberee Arje ginkoji dəwje gə raŋg ləm, Areeje oso mbi dee’g ləma, Undaje nétɔji tar ləm tɔ. Ilaje mberee ɓó iyaje dɔ né kára el! Pajena: Deḛ taa Babilɔn mba̰ ya! Magə-Bel nai gə rɔkul ləm, Magə-Merodak lé tədee njigi-njigi ləm tɔ! Magəje ləa nai gə rɔkul ləm, Magəje ləa təd njigi-njigi ləm tɔ.

³ Mbata ginkoji dəwje d’ḭ dɔgel D’aw gə mba rɔ səa, D’a kar ɓee ləa tel to dɔdilaloo ləm, Dəwje d’a si keneŋ el ŋga ləm tɔ. Dəwje gə daje d’aḭ d’aw.

⁴ Njesigənea̰ pana: Mee ndəaje’g nee gə mee kàree’g nee lé Israɛlje gə Judaje d’a tel ree na̰’d, D’a njaa gə mán-no̰ kəm dee’g ləm, D’a saŋg Njesigənea̰, Ala lə dee ləm tɔ.

⁵ D’a dəji rəw gə́ aw gə́ Sio̰ ləm, D’a tel kəm dee gə́ keneŋ ləm tɔ. Gə́ reeje ɔmje na̰’d gə Njesigənea̰ Gə manrɔ gə́ to gə no̰ Gə́ mee dəw a kwəi dɔ’g nda̰ el.

⁶ Koso-dəwje ləm tɔ koso-badje lé ndəm d’igi, Njékul deeje d’ar dee ndəm ləm, D’ar dee d’ila rima-rima Mbuna mbalje’g ləm tɔ. Deḛ d’ḭ dɔ mbalje’g d’aw dɔdərlooje’g D’ar meḛ dee wəi sel Dɔ loo-kaar deeje’g.

⁷ Deḛ lai gə́ d’iŋga dee Ndá d’usɔ dee rɔg-rɔg Ndá njéba̰je lə dee pana: Taree wa dɔ neḛje el. Mbata deḛ ya ra kaiya D’ɔs ne ta lə Njesigənea̰ Gə́ to loo-gaŋg-rəwta Gə́ gə dɔ najee lé rəw ləm, D’ɔs Njesigənea̰ gə́ to nékunda-mee-yel lə bɔ deeje-je lé rəw ləm tɔ.

⁸ Maji kar sí ḭje Babilɔn aḭje, Undaje loo mee ɓee gə́ Kalde teḛje, Maji kar sí toje asəna gə bàl bya̰je Gə́ d’ɔr no̰ koso-nékulje bèe.

⁹ Mbata aa ooje, m’a kar ginkoji dəwje gə raŋg gə́ boo-boo ləm, Gə́ bula digi-digi ləm tɔ lé D’a kḭ ɓee gə́ dɔgel mba rɔ gə Babilɔnje. D’a tɔs rɔ dee gə mba kaw rɔ sə dee Ndá d’a dum dɔ dee, Kag ɓandaŋgje lə dee to asəna gə ka̰ njegər goso rɔ Gə́ ḭ loo-rɔ’g tel gə jia kari el.

¹⁰ Ɓee gə́ Kalde lé d’a kundá banrɔ, Deḛ lai gə́ d’a kodo néje gə́ keneŋ lé A kas dee nag-nag. Njesigənea̰ ɓa pa bèe.

¹¹ Oiyo, maji kar sí síje Dan rɔlel’g gə dan kalrɔ’g Seḭ gə́ undaje nédɔji ləm banrɔ. Oiyo, maji kar sí tilaje riŋga To gə́ ma̰də maŋgje Gə́ d’aar loo-ko̰-mu’g ləm, Maji kar sí no̰je to gə́ kundaje Gə́ gə siŋga dee bèe ləm tɔ.

¹² Ko̰ síje si dan boo-rɔkul’g, Yeḛ gə́ njekoji sí lé rɔkul wa kəmee, Aa ooje, yeḛ to rudu ginkoji dəwje ŋga. Yeḛ to dɔdilaloo ləm, Yeḛ to naŋg gə́ tudu kurum-kurum ləm, Yeḛ to ndag-loo ləm tɔ.

¹³ Dəw kára kara a si keneŋ el Mbata oŋg lə Njesigənea̰, Yee a to dɔ nduba. Nana kara gə́ a dəs mbɔr Babilɔn’g Ndá kaaree a kwá paḭ karee ra wah! Dɔ nékəmndooje’g lai gə́ teḛ dəa’g lé.

¹⁴ Tɔsje rɔ sí guguje dɔ Babilɔn sub rɔje səa, Seḭ lai gə́ toje njérɔ ɓandaŋgje lé! Maji kar sí rɔje ɓandaŋgje lə sí gə́ keneŋ, Ya̰je kag ɓandaŋgje ji sí’g el! Mbata yeḛ ra kaiya ɔs ne ta lə Njesigənea̰ rəw.

¹⁵ Ɔmje lul rɔ u-u-u gə looje ɓəd-ɓəd dəa’g! Yeḛ ula jia ndiŋ, Gin ɓee gə́ tum lé Gaḭ wəgələ-wəgələ ləm, Ndògo-bɔrɔje ləa təd kərm-kərm ləm tɔ, Mbata to dalba̰ lə Njesigənea̰. Maji kar sí dalje ba̰ lə sí dəa’g. Raje səa to gə́ yeḛ ra to!

¹⁶ Maji kar sí tujije yeḛ gə́ njedubu né pugudu Mee ɓee gə́ Babilɔn ləm, Gə yeḛ gə́ njera gama kinja kó Gə marm naḭ kinja kó’g ləm tɔ! Maji kar nana kara Tel gə́ rɔ koso-dəwje’g ləa ləm, Maji kar nana kara Aḭ gə́ mee ɓee’g ləa ləm tɔ No̰ kiambas’g lə njetujiloo lé.

¹⁷ Israɛl lé to ŋgon badə gə́ ndəm Gə́ toboḭje tuba gée, Mbai gə́ Asiri ɓa gə́ njesɔ dakasee kédé, yeḛ gə́ rudu lé to Nebukadnesar, mbai gə́ Babilɔn ndá yeḛ təd siŋga rém-rém.

¹⁸ Gelee gə́ nee ɓa Njesigənea̰ gə́ njeboo-néje gə́ to Ala lə Israɛlje lé pa ne togə́bè pana: Aa ooje, m’a kar bo̰ néra mbai gə́ Babilɔn ɔs təa’g to gə́ m’ar bo̰ néra mbai gə́ Asiri ɔs təa’g bèe tɔ.

¹⁹ M’a tel gə Israɛlje ree sə dee Loo-si dee’g gogo, D’a kiŋga loo-ko̰-mu lə dee Gə́ to Karmel gə Basan Ndá nésɔ a kas dee nag-nag Dɔ mbal gə́ Eprayim ləm, Gə mee ɓee gə́ Galaad ləm tɔ.

²⁰ Njesigənea̰ pana: Mee ndəaje gə mee kàree’g neelé D’a saŋg néramajel lə Israɛlje Nɛ d’a kiŋga el ləm, D’a saŋg kaiya ra Judaje Nɛ d’a kiŋga kára kara el ləm tɔ. Mbata m’a kar məəm oso lemsé Dɔ ges deeje gə́ m’a kya̰ dee lé.

²¹ Awje aw rɔje Gə ɓee gə́ Meratayiyim ləm, Gə deḛ gə́ d’isi Pekod ləm tɔ. Maji kar sí korə deeje tɔl deeje, Tuji deeje pugudu-pugudu. Njesigənea̰ ɓa pa bèe. Arje ndukunje ləm aw lée’g béréré ya!

²² Kó-rɔ ɓar wəl-wəl mee ɓee’g, To tuji-boo gə́ to ɓəl kədm-kədm. Ɗi togə́bè wa! Babilɔn gə́ to mo̰ gə́ njetɔ naŋg nee lai

²³ Deḛ guree rug-rug ləm, D’iree njigi-njigi ləm tɔ! Babilɔn lé tuji pugudu Mbuna ginkoji dəwje gə raŋg’g!

²⁴ Seḭ njé gə́ Babilɔn lé M’iya gum no̰ sí’g m’ar sí osoje keneŋ Nɛ seḭ gərje el, M’teḛ dɔ sí’g wai m’uba sí m’wa sí Mbata seḭ ɔsje ta lə Njesigənea̰ rəw.

²⁵ Njesigənea̰ ɔr takəi-ŋgəm-nérɔje ləa, Yeḛ teḛ gə nérɔje gə́ ka̰ oŋg ləa Gə́ to keneŋ, Mbata yee neelé to kula ra Mbaidɔmbaije Njesigənea̰ gə́ njeboo-néje, Mee ɓee gə́ Kalde.

²⁶ Maji kar sí ḭje gə looje lai A̰dje mee ɓee gə́ Babilɔn, Ɔsje ta damje ləa ilaje ləm, Waje kugu dɔ na̰’d to gə́ kugu mu bèe Ndá tujeeje pugudu ləm tɔ!

²⁷ Maji kar sí tɔlje bɔ maŋgje lə deḛ lai, Awje sə dee loo-tḭja-gwɔs dee’g. Meeko̰ oso dɔ dee’g Mbata ndɔ lə dee teḛ mba̰, To kàr kar bo̰ néra dee ɔs ta dee’g.

²⁸ Ooje ndu kii lə njékaḭje, Deḛ gə́ d’ḭ Babilɔn d’aḭ lé D’aw d’ila mber dalba̰ Le Ala lə sí gə́ Njesigənea̰ Mee ɓee gə́ Sio̰, Dalba̰ gə́ wɔji dɔ kəi ləa gə́ to gə kəmee lé,

²⁹ Ɓarje njérɔ ɓandaŋgje Ar deeje d’aw rɔ gə Babilɔn, Seḭ lai gə́ toje njéra gama rɔ ɓandaŋgje lé. Aḭje dəa sub arje dəw kára kara Teḛ aḭ el ləm, Raje səa gə goo kula reaje ləma, Raje səa areeje aw na̰’d béréré Gə kea̰ gə́ yeḛ ra lé ləm tɔ. Mbata beelé ḭ səa dɔ Njesigənea̰’d Gə́ to Njerɔkunda lə Israɛlje lé.

³⁰ Gelee gə́ nee ɓa basaje ləa d’a kwəi ne mba̰-rəwje’g ləm, mee ndəa’g neelé njérɔje ləa lai d’a tuji pugudu ləm tɔ. Njesigənea̰ ɓa pa bèe.

³¹ Aa oo, i gə́ njebeelé lé m’aw səi gə ta! Mbata ndɔ ləi teḛ mba̰, To kàr kar bo̰ nérai ɔs tai’g, Mbaidɔmbaije gə́ Njesigənea̰ Le bao-rɔje ɓa pa bèe.

³² Njebeelé a kunda ndolé Ndá a kɔr koso, Dəw gə́ njekwá kundá tar a godo. M’a tula pər dɔ ɓee-booje’g ləa Ndá a roo looje lai gə́ gugu dɔ dee sub lé dula-dula.

³³ Njesigənea̰ gə́ njeboo-néje lé pa togə́bè pana: Israɛlje gə Judaje lé D’ula kəm dee ndòo na̰’d, Dəwje lai gə́ njékwa dee kaw sə dee Ɓee-ɓər’gje lé d’wa dee gaa-gaa Ɓó ndigi kɔm dee tar el.

³⁴ Nɛ njekoga dɔ dee gə́ ria lə Njesigənea̰ gə́ njeboo-néje lé To njesiŋgamoŋ, Yeḛ a kaḭ rɔ mbata lə dee Gə mba kar ɓee to ne lɔm ləm, Gə mba kɔm ne ɓəl Dɔ deḛ gə́ d’isi Babilɔn ləm tɔ.

³⁵ Njesigənea̰ ɓa pana: Ɔrje kiambas wɔjije ne Kaldeje ləm, Wɔjije ne njé gə́ Babilɔn gə ŋgan-mbaije ləa Gə njékəmkàrje ləa ləm tɔ.

³⁶ Ɔrje kiambas wɔjije ne njéteggintaje gə́ ŋgɔm! Ar deeje tel to d’asəna gə mbəje! Ɔrje kiambas wɔjije ne bao-rɔje! Arje ɓəl unda dee ɓad gaŋg dee!

³⁷ Ɔrje kiambas wɔji ne Kundaje lə dee gə pusu-rɔje lə dee! Wɔjije ne dəwje gə́ gə gel dee gel dee Gə́ d’isi mbuna dee’g! Maji kar dee tel to d’asəna gə denéje! Ɔrje kiambas wɔjije ne nébaoje lə dee! Maji kar dee d’odo dee mbad-mbad Gə́ nébanrɔ ya!

³⁸ Maji kar loo gə́ tudu kurum-kurum Teḛ dɔ manje’g ləa! Kar manje ləa d’yi tə-tə! Mbata to ɓee magə-poleje, Deḛ ra némbə mbata magəje gə́ wa meḛ dee.

³⁹ Gelee gə́ nee ɓa Daje gə́ dɔdilaloo’g gə tàlje D’a si keneŋ na̰’d ləm, Miruje d’a ra loo-kaar dee keneŋ ləm tɔ, Dəw a si keneŋ el ŋga saar gə no̰ ləm, Dəw a ra ɓee keneŋ nda̰ el ləm tɔ.

⁴⁰ A to asəna gə Sɔdɔm gə Gɔmɔr Gə ɓee-booje gə́ gugu dɔ dee sub Gə́ Ala tuji dee pugudu lé. Njesigənea̰ ɓa pa bèe. Dəw kára kara a si keneŋ Gɔgo el ŋga ləm, Dəw a ra ɓee keneŋ nda̰ el ləm tɔ.

⁴¹ Aa ooje, koso-dəwje d’ḭ dɔgel D’aw gə́ nee ləm, Ginkoji dəwje gə́ bula digi-digi Gə mbaije gə́ njésiŋgamoŋje D’uba naŋg d’ḭ rudu naŋg’d ree ləm tɔ.

⁴² Deḛ d’odo ɓandaŋgje Gə ŋgan niŋgaje, Deḛ to njémeemajelje ləm, D’oo kəmtondoo el ləm tɔ. Deḛ tuba kundaje, Deḛ d’isi pèrèrè gə mba rɔ To gə́ dəw gə́ kára ba bèe, D’a gə rɔ sə sí-seḭ gə́ Babilɔn Gə́ toje asəna gə ŋgoma̰də!

⁴³ Mbai gə́ Babilɔn oo soree Ndá jia unda ndolè ləm, Yeḛ si gə meekaarkərm To gə́ dené gə́ ndóo rəa bèe ləm tɔ.

⁴⁴ Aa ooje, yeḛ ḭ ta koŋgo baa-boo Gə́ Jurdɛ̰ gə́ siŋ siŋ-siŋ Aw rɔ gə loo-kaar-kɔgərɔ Gə́ ŋgəŋ ŋgəŋ-ŋgəŋ To gə́ toboḭ bèe. Léegəneeya m’a kɔs dee naŋg rad Tuba dee kar dee d’aḭ Ndá m’a kunda yeḛ gə́ ma nja m’ɔree toree’g. Mbata see na̰ ɓa to tana səm wa. See na̰ ɓa a kun ndukunje kam wa. See mbai gə́ ra ɓa askəm kɔsm ŋgərəŋ wa.

⁴⁵ Gelee gə́ nee ɓa maji kar sí ooje Né gə́ Njesigənea̰ wɔji mba ra Gə ɓee gə́ Babilɔn ləm, Gə néje gə́ yeḛ wɔji mée’g Gə mba ra gə ɓee lə Kaldeje ləm tɔ. Tɔgərɔ d’a ndɔr dee to gə́ ŋgan badje Gə́ siŋga dee godo bèe ləm, Tɔgərɔ d’a tuji loo-si dee Pugudu-pugudu ləm tɔ.

⁴⁶ Kaa taa gə́ deḛ taa Babilɔn lé Ɓar ar naŋg yə, Ndu kii ɓar birim-birim Mbuna ginkoji dəwje gə raŋg’g.