Jeremi 5 - Maktub gə́ To gə Kəmee

Njera nédana kára kara godo Jerusalem (Tapa Njesigənea̰)

¹ Awje gə́ mba̰-rəwje ɓəd-ɓəd Mee ɓee gə́ Jerusalem, Aaje loo ooje ləm, dəjije na̰ ləma, Saŋje ndaa-looje ləa ləm tɔ, Ɓó lé seḭ iŋgaje dəw kára keneŋ Gə́ to njera nédana Gə́ ɔm na̰’d gə kankəmta, Ɓó lé dəw gə́ bèe si keneŋ ndá M’a kar məəm oso lemsé dɔ njé gə́ Jerusalem’g ya.

(Tapa Jeremi)

² Ɓó lé deḛ pa pana: Njesigənea̰ si kəmba kara To taŋgɔm ɓa deḛ pa Ndo̰ ne naji d’ubu ne rɔ dee.

³ Njesigənea̰, see kəmi oo kankəmta el wa. I kunda dee nɛ rɔ dee to dee el saar, I tuji dee nɛ deḛ d’ɔs tandooje ləi rəw, D’ar ŋgono̰ dee kədərə unda kɔr mbal ləm, Deḛ mbad kɔs badm tel gə́ rɔi’g ləm tɔ.

⁴ Ma m’pana: Deḛ to dəwje gə́ kari ba, Deḛ ra né dɔ mbə’g, Mbata deḛ gər rəw lə Njesigənea̰ el ləm, Gə torndu Ala lə dee el ləm tɔ.

⁵ M’a kaw rɔ dəwje gə́ boo-boo’g Ndá m’a kula dee ta, Mbata deḛ lé gər rəw lə Njesigənea̰ ləm, Gə torndu Ala lə dee ləm tɔ. Nɛ deḛ lai kara təd néməməna̰ gwɔs dee’g ləm, Deḛ gaŋg kúla rɔ dee’g ləm tɔ.

⁶ Gelee gə́ nee ɓa Toboḭ gə́ mee kag-kɔr’g tɔl dee ne ləm, Jagmjər gə́ dɔdilaloo’g tuji dee ne ləma, Kàgje d’iya ne rɔ dee no̰ ɓee-booje’g lə dee ləm tɔ, Deḛ lai gə́ d’a kunda loo mee ɓee’g nee teḛ ndá D’a ti dee mbidi-mbidi, Mbata nékal godndu lə dee to yaa̰ ləm, Néra majikojielje lə dee ḭ dɔ maree’d Gə́ kédé-kédé ləm tɔ.

(Tapa Njesigənea̰)

⁷ See m’a kar məəm oso ləmsé dɔ sí’g mba ɗi wa. Ŋgan síje d’ubam d’ya̰’m ləm, Deḛ manrɔ dee gə ri magəje gə́ ŋgɔm ləm tɔ. Ma m’ar dee d’isi dan néje’g lai Gə́ d’aw ndòo dee Nɛ d’ya̰ rɔ dee yag Dan néra kaiya-dené’g ləm, Deḛ rusu mee kəi lə kaiya-dené tub-tub ləm tɔ.

⁸ Deḛ to d’asəna gə kundaje Gə́ mu as dee nag-nag bèe Gə́ tila riŋga! Nana kara ndil goo dené’g lə maree to gə́ kunda bèe.

⁹ Njesigənea̰ pana: Néraje gə́ togə́bè lé See m’a kar bo̰ néra dee Ɔs ne ta dee’g gə mbəa el wa. See ginkoji dəwje gə́ togə́bè lé M’a dal sə dee ba̰ el wa.

¹⁰ Ubaje dɔ ndògo-bɔrɔje ləa gə́ tar Ndá tujije loo, Nɛ tuji deeje lai el! Tɔrje barkəm nduúje ləa Gə́ to ka̰ Njesigənea̰ el lé!

¹¹ Njesigənea̰ pana: Mbata gel-bɔje lə Israɛl Gə gel-bɔje lə Juda to majikojije el ya.

¹² Deḛ maḭta lə Njesigənea̰ D’oo taŋgɔm pa ne pana: Godo! Némeeko̰ a ree dɔ neḛje’g el ləm, N’a kooje kiambas əsé ɓoo-boo el ləm tɔ.

¹³ Njéteggintaje to d’asəna gə lel, To Ala ɓa wa dee pa ne ta el. Maji karee to togə́bè ya dɔ dee’g!

¹⁴ Gelee gə́ nee ɓa Njesigənea̰ Gə́ njeboo-néje gə́ dara pa ne pana: Mbata ta gə́ seḭ paje neelé Aa ooje, ma m’ndigi kar ta ləm To to gə́ pər bèe tam’g ləm, Ma m’ndigi kar koso-dəwje neelé To to gə́ kir gə mba kar pər neelé roo dee ləm tɔ.

¹⁵ Aa ooje, m’a kar ginkoji dəwje D’ḭ loo gə́ əw’g ya ree Mba rɔ sə sí, seḭ gel-bɔje lə Israɛl, Njesigənea̰ ɓa pa bèe. To ginkoji dəwje gə́ to njésiŋgamoŋje ləm, To ginkoji dəwje gə́ ləw ləm, To ginkoji dəwje gə́ seḭ gərje takɔji dee el ləma, Dɔ ta gə́ deḛ pa kara Seḭ a gərje el ləm tɔ.

¹⁶ Ku ɓandaŋgje lə dee to d’asəna gə bwa-dɔɓar gə́ to tag, Deḛ lai to bao-rɔje.

¹⁷ D’a rɔm koje lə sí lai gə muru lə sí ləm, D’a tɔl ŋgan síje gə́ diŋgam gə njé gə́ dené ləm, D’a sɔ badje gə maŋgje lə sí ləm, D’a sɔ nduúje gə kodéje lə sí ləma, D’a tuji ɓee-booje lə sí gə́ siŋga dee to Gə́ seḭ ɔmje meḛ sí dɔ’g lé Gə kiambas ləm tɔ.

¹⁸ Nɛ mee ndəaje’g neelé Njesigənea̰ pana: M’a tuji sí gə gel sí lai el.

¹⁹ Ɓó lé seḭ paje pana: See gelee ban ɓa Njesigənea̰, Ala lə sí ra sə sí né gə́ togə́bè wa. Ndá m’a tel kila sí keneŋ pana: To gə́ seḭ ubamje ya̰’mje mba ra né kar magəje gə́ dɔ ɓeeje’g mee ɓee’g lə sí lé togə́bè ɓa seḭ a raje né kar dəw-dɔ-ɓeeje mee ɓee gə́ to ka̰ sí el tɔ.

Loo gə́ d’oo Njesigənea̰ gə́ dəw dɔ dee el

²⁰ Ulaje gel-bɔje lə Jakob ta nee ləm, Ilaje mberee arje Judaje d’oo taree ləm tɔ pajena:

²¹ Ooje ta nee, Seḭ koso-dəwje gə́ gosonégər lal sí! Kəm sí to gən nɛ seḭ ooje ne loo el ləm, Mbi sí to gən nɛ seḭ ooje ne ta el ləm tɔ.

²² Njesigənea̰ pana: See seḭ a ɓəlmje el wa. See seḭ a kundaje bala nɔm’g el wa. To ma ɓa m’ar nagəra To gə́ rəw-nim lə baa-boo-kad ləm, To rəw-nim gə́ to gə no̰ Gə́ mán askəm kunda gaŋg el ləm tɔ. Paŋəgm maneje tuga Nɛ siŋga dee as el ləm, Dee no̰ mbiao̰-mbiao̰ kara D’askəm təd koŋgee el ləm tɔ,

²³ Dəwje neelé to gə́ mbim-oo-ta-elje ləm, Gə njékɔsta-rəwje ləm tɔ, Deḛ mbad koo ta ləm, D’ɔd par-par d’aw ləm tɔ.

²⁴ Deḛ d’ə̰ji ta meḛ dee’g pana: Ar sí m’ɓəlje Ala lə sí Yeḛ gə́ ar mán ndi gə naḭyee-naḭyee lé ləm, Gə́ ar ndi gə́ doŋgɔr gə rudu ər ləma, Yeḛ gə́ njekwɔji naḭ kinja dɔ kó ləm tɔ lé Deḛ d’ə̰ji bèe el.

²⁵ Gə goo néra kori-korije lə sí lé ɓa Loo kai sí ne néje gə lée-lée godo ne ləm, Kaiyaje lə sí lé ɓa ɔg sí loo kiŋga némajije nee ləm tɔ.

²⁶ Mbata njémeeyèrje d’isi mbuna dəwje’g ləm, Deḛ tən loo soo-soo to gə́ njékwa yelje Gə́ d’iya gumje bèe ləma, D’ila ba̰də d’um ne dəwje ləm tɔ.

²⁷ To asəna gə kəi-yel gə́ dəw ra bèe Ɓa ɔm yelje keneŋ aree rusu tub-tub lé Néraje gə́ ŋgɔm taa mee kəije lə dee pəl-pəl togə́bè ləm tɔ. Yee gə́ bèe ɓa deḛ tel to ne Njésiŋgamoŋje ləm, gə baoje ləm tɔ.

²⁸ Deḛ d’ər ndɔl-ndɔl D’ar rɔ dee àr wəd-wəd Nɛ néra majel lə dee al dɔ loo sula. Deḛ d’isi dan nékiŋgaje’g bèdèg Nɛ d’ɔr kəmta lə ŋgonal el ləm, Deḛ d’ya̰ né gə́ wɔji dɔ njéndooje D’ar dee d’iŋga el ləm tɔ.

²⁹ Njesigənea̰ pana: Néraje gə́ togə́bè lé see m’a kar bo̰ néra dee Ɔs ne ta dee’g el wa. Ginkoji dəwje gə́ togə́bè lé See m’a dal ba̰ ləm dɔ dee’g el wa.

³⁰ Deḛ ra né gə́ to ɓəl Gə́ to kḛji mee ɓee’g.

³¹ Njéteggintaje tegginta gə́ ŋgɔm ləm, Njékinjanéməsje d’o̰ dəwje D’ar dee d’oso ne gel dee’g ləm tɔ. Rɔ dəwje ləm lel dee dɔ néje’g neelé. Ndɔ gə́ rudu lé See ɗi ɓa seḭ a raje gə rɔ sí wa.