Jeremi 48 - Maktub gə́ To gə Kəmee

Ndərta gə́ wɔji dɔ Moabje

¹ Ta gə́ wɔji dɔ Moabje. Njesigənea̰ gə́ njeboo-néje gə́ to Ala lə Israɛlje pa togə́bè pana: Meeko̰ oso dɔ njé gə́ Nebo Mbata ɓee-boo lə dee tuji! Njé gə́ Kirjatayim d’isi gə rɔkul Mbata deḛ taa ɓee-boo lə dee ləm, Njé gə́ Misgab kara d’isi gə rɔkul Mbata deḛ tuji ɓee-boo lə dee Pugudu-pugudu ləm tɔ.

² Rɔnduba lə Moab godo ŋga, Mee ɓee-boo gə́ Esbon lé D’wɔji-kwɔji tujee pana: Ar sí j’aw n’tujeeje pugudu Mbuna ginkoji dəwje gə raŋg’g! I ɓee-boo gə́ Madmḛ kara a kudu bo̰ tɔ. D’orè gooi gə kiambas ndəŋ.

³ Ndu kii ɓar Koronayim’g, To tuji-boo ləm, gə boo-nékəmndoo ləm tɔ.

⁴ Ɓee gə́ Moab tuji pugudu-pugudu! Ndu no̰ lə ŋganje ɓar birim-birim.

⁵ Dəwje tuga loo gə́ tar D’aw dɔ mbal gə́ Luhit Gə mán-no̰ kəm dee’g, Loo gə́ risi gə́ naŋg gə́ Koronayim lé Ndu no̰ gə́ wɔji dɔ tuji-boo Ɓar wəl-wəl to keneŋ.

⁶ Aḭje gə́ nu taaje ne rɔ sí, Sije dɔdilaloo’g asəna gə kag-maaji bèe.

⁷ Mbata i ɔm məəi dɔ kula raije’g ləm, Gə dɔ nébaoje’g ləi ləm tɔ lé Ndá i kara d’a dum dɔi tɔ. Ala ləi gə́ ria lə Kemos lé A kaw ɓee-ɓər’g Gə njékinjanéməsje gə mbaije ləa na̰’d.

⁸ Njetujiloo a kandə kaw Mee ɓee-booje’g kára-kára lai Ɓó ɓee-boo kára kara a nai el, Wəl-loo a tuji ləm, Ndag-loo a to kari ba péd-péd ləm tɔ To gə́ Njesigənea̰ pa lé.

⁹ Arje Moabje d’iŋga bag dee Mba kar dee d’aw ne əw! Ɓee-booje ləa d’a tel to dɔ nduba ləm, Dəw kára kara a si keneŋ el ləm tɔ.

¹⁰ Ndɔl wa dɔ yeḛ gə́ ra kula Le Njesigənea̰ orè gə ndam ləm, Ndɔl wa dɔ yeḛ gə́ ɔg kiambas ləa Ndum dəwje mburug-mburug ləm tɔ.

¹¹ Ɓee gə́ Moab lé un kudee gə basee ba ya Aw yururu asəna gə mán-nduú Gə́ toso ɗəḭ-ɗəḭ dɔ gwɔiyee’g Ɓó dəw unee mbélee mee jo gə́ raŋg’d el ləm, D’aw səa ɓee-ɓər’g el ləm tɔ. Yee ɓa lel ləa ɔr ne el ləm, Baḭyee tel ə̰də ne ɓəd el ləm tɔ.

¹² Gelee gə́ nee ɓa Njesigənea̰ pa ne pana: Aa ooje, ndɔje gə́ a gə ree lé m’a kula dəwje rəa’g kar dee ree d’unee mbélee mee jo gə́ raŋg’d. D’a kar mee joo ləa to kari ba ləm, d’a kar ku-jo ləa ndubu kum-kum ləm tɔ.

¹³ Rɔ Moabje a kul dɔ magə’d lə dee gə́ ria lə Kemos, to gə́ rɔ gel-bɔje lə Israɛl kul ne dɔ Betel gə́ to nékunda-mee-yel dɔ’g lə dee bèe.

¹⁴ See to gə́ ban ɓa seḭ asjekəm pajena: Jeḛ n’toje njésiŋgamoŋje ləm, Gə njérɔje gə́ d’isi pèrèrè Gə mba rɔ ləm tɔ lé wa.

¹⁵ Moab tuji pugudu, Sa uba dɔ ɓee-booje’g ləa ŋgɔg-ŋgɔg ləm, Basaje ləa gə́ maji d’unda mar deeje lé Tḭja gwɔs dee ləm tɔ. Mbai gə́ ria lə Njesigənea̰ lə bao-roje ɓa pa bèe.

¹⁶ Tuji-boo lə Moab lé sai dəb ba karee teḛ dəa’g, Némeeko̰ ləa aw ree gə tɔgee gə́ nee.

¹⁷ Seḭ lai gə́ guguje dəa sub lé ləm, Gə seḭ lai gə́ gərje ria ləm tɔ lé, Maji kar sí nea̰je siije mbigi-mbigi pajena: Kag-mbai siŋgamoŋ nee Gə́ majidum lé see təd to gə́ ban wa.

¹⁸ Seḭ njéɓeeje gə́ Dibo̰ Gə́ to asəna gə ŋgoma̰də lé Ḭje loo-si rɔnduba’g lé urje naŋg, Sije dɔ naŋg gə́ tudu kurum-kurum’g, Mbata njetujiloo gə́ ḭ Moab lé aw gə́ dɔ sí’g nee. Yeḛ tuji kəi-kaar-kɔgərɔje lə sí pugudu.

¹⁹ Seḭ njéɓeeje gə́ Aroer lé Awje aarje rəw’g aaje loo ooje, Dəjije njékaḭje gə njéteḛ-ta-rɔ’g pəd-pədje lé, Dəji deeje pajena: See ɗi ɓa teḛ nu wa.

²⁰ Moabje d’isi gə rɔkul, Mbata deḛ tuji ɓee lə dee pugudu-pugudu. Maji kar sí tuma̰je ŋgururu-ŋgururu ləm, Raje né wəl-wəl ləm tɔ. Maji kar sí ilaje mberee Arje deḛ gə́ d’isi ta baa gə́ Arno̰ To gə́ Moab lé tuji pugudu mba̰.

²¹ Ta wa dɔ ɓee gə́ ndag-loo’g ləm, Gə dɔ Holo̰ ləm, gə dɔ Jahas ləm, Gə dɔ Mepaat ləm,

²² Gə dɔ Dibo̰ ləm, gə dɔ Nebo ləm, Gə dɔ Bet-Diblatayim ləm,

²³ Gə dɔ Kirjatayim ləm, Gə dɔ Bet-Gamul ləm, Gə dɔ Bet-Meo̰ ləm,

²⁴ Gə dɔ Kerijot ləm, gə dɔ Bosra ləma, gə dɔ ɓee-booje lai gə́ mee ɓee gə́ Moab gə́ to əw əsé gə́ to dəb ləm tɔ.

²⁵ Siŋgamoŋ lə Moab tuji ləm, Deḛ təd jikɔlee ləm tɔ. Njesigənea̰ ɓa pa bèe.

²⁶ Areeje ai kido saar aree tɔlee, mbata yeḛ oo rəa gə́ njekur dɔ Njesigənea̰’g! Maji kar Moab rogo dan tɔmé’g ləa ləm, maji karee tel to nékula sul dɔ’g ləm tɔ.

²⁷ See i lé unda Israɛlje gə́ nékula sul dɔ’g ləi el wa. See i teḛ dəa’g wai mbuna njéɓogoje’g ɓa i pata ləa tuga ne dɔi jəgm-jəgm bèe wa.

²⁸ Ubaje ɓee-booje ya̰je Aw síje mbuna mbalje’g, Seḭ gə́ síje Moab lé! Maji kar sí toje asəna gə dərje Gə́ d’ula kəi lə dee kaar bolè mbalje’g.

²⁹ Jeḛ n’gərje beelé lə Moab Gə́ majidum lé gao, Gə beelé ləa gə́ dum dɔ loo ləm, Gə ti-rɔ ləa ləm, Gə kəsta ləa ləma, Gə takə̰ji ti-rɔ ləm tɔ.

³⁰ Njesigənea̰ pa pana: Ma m’gər kunda dɔ tar ləa ləm, gə tapeaje gə́ gə mḭdé-mḭdé ba no̰ dəwje’g ləma, gə néreaje gə́ to né gə́ kari ba lé ləm tɔ.

³¹ Gelee gə́ nee ɓa m’no̰ ne no̰-yoo Mbata lə Moab ləm, M’no̰ mbata lə Moabje lai ləm tɔ, Dəwje tuma̰ ŋgururu-ŋgururu Mbata njé gə́ Kir-Herɛs.

³² I rɔ nduú gə́ Sibma, Ma m’no̰ mbata ləi unda no̰ Gə́ ma m’no̰ mbata lə Jajer, Barkəmije d’alé saar teḛ gir baa-boo-kad’g, Deḛ d’alé saar teḛ baa-boo-kad gə́ Jaejer, Njetujiloo ḭ bigim ur dɔ koje’g ləi gə́ i inja ləm, Gə dɔ kul nduúje’g ləi gə́ i tḭja ləm tɔ.

³³ Rɔlel gə kalrɔ sané pá Mee loo-ndɔ kagje’g ləm, Gə mee ɓee gə́ Moab ləm tɔ, Ma m’ar mán-nduú Yi mee dura-mbula’g tə-tə, Dəwje mbula nduú gə ndu pa rɔlel Loo-mbula’g el ŋga, Ndu kó-rɔ ɓa ɓar ɓó ndu rɔlel ɓar el.

³⁴ Ndu kiije gə́ Esbon ɓar saar teḛ Eləalé ləm, ndu dee ɓar saar teḛ Jahas ləm, un kudee Soar saar teḛ Koronayim ləma, saar teḛ Eglat-Selisija ləm tɔ mbata manje gə́ Nimrim kara d’yi tə-tə tɔ.

³⁵ Njesigənea̰ a pana: Dəw gə́ Moab gə́ njekuba dɔdərlooje kaw tar kaw tuu né gə́ ə̰də sululu keneŋ kar magə ləa lé m’a karee godo ŋga.

³⁶ Ɓə̰gərəm ɓar dulug-dulug dɔ Moabje’g to gə́ dalè bèe ləm, ɓəŋgərəm ɓar dulug-dulug dɔ dəwje gə́ Kir-Herɛs to gə́ dalè bèe ləm tɔ. Mbata némajije lai gə́ deḛ mbo̰ lé sané pá.

³⁷ Mbata deḛ lai ndisa dɔ dee ŋgori-ŋgori ləm, d’inja mbaita deeje bur-bur ləm tɔ, deḛ lai tḭja ji dee pədərə-pədərə ləm, d’ula kubu-kwa-ndòo rɔ dee’g ləm tɔ.

³⁸ Dɔ kəije gə́ Moab lai gə mee ndaa-looje’g ləa lé ndu no̰ sii mbigi-mbigi ya kára ba ɓar keneŋ mbata ma m’tɔ Moab pɔs-pɔs to gə́ dəw tɔ ne jo gə́ yeḛ ndigi el bèe. Njesigənea̰ ɓa pa bèe.

³⁹ See tuji gə́ ban ɓa bèe wa. Maji kar sí tuma̰je ŋgururu-ŋgururu! See tel gə́ Moabje tel gir dee d’ila gə rɔkul bèe lé gelee ban wa. Moab lé tel to nékula sul dɔ’g ləm, gə néɓəl ləm tɔ kəm deḛ lai gə́ gugu dəa sub lé.

⁴⁰ Mbata Njesigənea̰ pa togə́bè pana: Aa ooje, njeba̰ lé ḭ nar to gə́ mal bèe ləm, yeḛ naji bagee dɔ Moab’g ləm tɔ.

⁴¹ Ɓee-boo gə́ Kerijot lé dum dəa mba̰, Kəi-kaar-kɔgərɔje lé taa tɔ, Ndəa neelé mee bao-rɔje gə́ Moab to asəna gə mee dené gə́ ndóo tée bèe.

⁴² Moab a tuji pugudu, Yee a to ginkoji dəwje el ŋga, Mbata yeḛ oo rəa gə́ njekur dɔ Njesigənea̰’g.

⁴³ I gə́ si Moab lé Ɓəl-boo, gə bwa-da, gə ba̰də to wɔji dɔi. Njesigənea̰ ɓa pa bèe.

⁴⁴ Yeḛ gə́ a kaḭ no̰ ɓəl-boo’g lé A koso mee bwa-da’g ləm, Yeḛ gə́ ḭ mee bwa’g teḛ lé A koso wul ba̰də’g ləm tɔ, Mbata m’a gə kar ləb bo̰ néra Moabje teḛ ɔs ta dee’g. Njesigənea̰ ɓa pa bèe.

⁴⁵ Njékaḭje gə́ siŋga dee godo lé D’aar naŋg ndil Esbon’g, Mbata pər ḭ Esbon teḛ ləm, Ndo̰ pər ḭ Siho̰ teḛ ləm tɔ. Pər neelé roo loo mee ɓee gə́ Moab ləm, Roo ka dɔ njékaw dɔ na̰’d pum-pumje ləm tɔ.

⁴⁶ Meeko̰ oso dɔi-i Moab’g! Koso-dəwje lə magə-Kemos tuji! Mbata d’aw gə ŋganije gə́ diŋgam Gə njé gə́ dené ɓee-ɓər’g.

⁴⁷ Nɛ mee ndəa gə́ gogo ndá M’a tel gə Moabje Gə́ d’aw sə dee ɓee-ɓər’g lé Ree sə dee. Njesigənea̰ ɓa pa bèe. Yee nee ɓa gə́ ta gə́ gaŋg dɔ Moab’g ya.