Jeremi 47 - Maktub gə́ To gə Kəmee

Ndərta gə́ wɔji dɔ Pilistije lé

¹ Ta gə́ Njesigənea̰ ula Jeremi, njetegginta wɔji ne dɔ Pilistije kédé ɓad ɓa Parao̰ aw rɔ gə njé gə́ Gaja ɓəi.

² Njesigənea̰ pa togə́bè pana: Aa ooje, manje d’ḭ dɔgel, Deḛ to d’asəna gə kəm-rəw-mán Gə́ ruba pɔ-pɔ bèe, Deḛ taa mee ɓee gə néje Gə́ keneŋ pəl-pəl ləm, Gə ɓee-booje gə dəwje Gə́ d’isi keneŋ yal-yal ləm tɔ. Dəwje lai gə́ d’isi mee ɓee’g lé No̰ sii ne mbigi-mbigi

³ Mbata kaa ŋgo gɔl kundaje ləa Gə́ siŋga dee to kɔgərɔ-kɔgərɔ Gə́ ɓar ləm, Gə mbata gir pusu-rɔje ləa Gə gir gɔl pusu-rɔje gə́ ɓar ləm tɔ, Ndá bɔ ŋganje d’ɔm rəd Gə́ dɔ ŋgan deeje’g el Mbata ji dee unda ndolé.

⁴ Mbata ndɔ gə́ Pilistije lai D’a tuji pugudu lé teḛ mba̰ ləm, Deḛ lai gə́ d’aw la gə Tir gə Sido̰ lé D’a kudu bo̰ ləm tɔ, Mbata Njesigənea̰ a tuji Pilistije pugudu ləm, Gə ges deḛ gə́ d’isi dɔgoré-loo gə́ Kaptɔr ləm tɔ.

⁵ Njé gə́ Gaja ndisa dɔ dee ŋgori-ŋgori ləm, Njé gə́ Askalo̰ lé d’isi ta dee mundu ləma, Gə ges ndag-loo lə dee na̰’d bèe ya ləm tɔ. See saar ndɔ gə́ ra ɓa seḭ a kundaje ŋgaŋ kinja rɔ sí pədərə-pədərə bèe ɓəi wa.

⁶ Ǝi! kiambas lə Njesigənea̰, See ndɔ gə́ ra ɓa i a kwa rɔi wa. Maji kari andə sɔli’g, Ǝw rɔi ndá to lɔm!

⁷ See i a kwa rɔi to gə́ ban wa. Njesigənea̰ aree ndukunje ləa, Mba karee aw Askalo̰ gə mbɔr baa-boo-kad’g Lée neelé ɓa yeḛ ndigi karee aw’g.