Jeremi 22 - Maktub gə́ To gə Kəmee

¹ Njesigənea̰ ula Jeremi ta togə́bè pana: Aw mee kəi’g lə mbai gə́ Juda ndá pata nee keneŋ.

² I a pana: I mbai gə́ Juda gə́ si dɔ kalimbai’g lə Dabid, gə kuraje ləi, gə koso-dəwje ləi gə́ a̰dje gə tarəwje neelé ooje ta lə Njesigənea̰!

³ Njesigənea̰ pa togə́bè pana: Gaŋje rəwta néra gə́ gə dɔ najee gə goo rəbee ləm, taaje dɔ deḛ gə́ d’ula kəm dee ndòo ji njékula kəm loo ndooje’g ləma, ulaje kəm dəw-dɔ-ɓee gə ŋgonal gə njekəisiŋga ndòo el ləm tɔ. Raje néra gə́ kərm-kərm el ləm, ilaje məs yeḛ gə́ ta wa dəa el naŋg mee loo gə́ nee el ləm tɔ.

⁴ Mbata ɓó lé seḭ a raje né gə goo ta neelé tɔgərɔ ndá mbaije gə́ d’isi dɔ kalimbai’g lə Dabid lé d’a si mee pusu-rɔje’g ləm, d’a tuba kundaje ləm tɔ, deḛ ləm gə kuraje lə dee ləma, gə koso-dəwje lə dee ləm tɔ mba kandə gə tarəwkəije’g neelé.

⁵ Nɛ ɓó lé seḭ unje mbi sí rəw dɔ taje’g neelé ndá Njesigənea̰ pana: Neḛ manrɔ neḛ bər-bər mba kar kəi-mbai neelé tel to dɔ nduba.

⁶ Mbata Njesigənea̰ pata wɔji ne dɔ kəi-mbai lə mbai gə́ Juda pana: Kəm neḛ’g lé i to asəna gə ɓee gə́ Galaad bèe ləm, Asəna gə dɔ sém mbal gə́ Liba̰ bèe ləm tɔ. Nɛ tɔgərɔ n’a kari tel to asəna gə dɔdilaloo ləm, Gə ɓee-boo gə́ dəw kára kara si keneŋ el ləm tɔ.

⁷ Neḛ n’wa dɔ gɔl njétujilooje Gə mba kar dee d’oma̰ səi, Nana kara aw gə nérɔje ləa jia’g-jia’g, Deḛ d’a tuga kag-sɛdrəje ləi Gə́ maji yaa̰ kɔm dee pər’d.

⁸ Ginkoji dəwje gə raŋg bula d’a dəs mbɔr ɓee-boo’g neelé ndá d’a dəji na̰ ta yo gə́ nee pana: See gelee ban ɓa Njesigənea̰ ra gə ɓee-boo neelé né gə́ togə́bè wa.

⁹ Ndá d’a kila dee keneŋ pana: Mbata deḛ d’uba ta manrɔ lə Njesigənea̰ d’ya̰ ləm, deḛ d’unda barmba dəb kəm dee naŋg no̰ magəje’g pole dee ne ləm tɔ.

Ta gə́ wɔji dɔ Salum, ŋgolə Jojias gə́ njetaa toree lé

¹⁰ Yeḛ gə́ wəi mba̰ lé Maji kar sí nea̰je el ləm, Waje ndòo yée el ləm tɔ. Nɛ yeḛ gə́ aw kəmba Gə́ a tel ree gogo el ləm, A tel koo ɓee-kojee el ləm tɔ lé ɓa Maji kar sí nea̰je.

¹¹ Mbata Njesigənea̰ pata togə́bè wɔji ne dɔ Salum, ŋgolə Jojias, mbai gə́ Juda gə́ o̰ ɓee tor bɔbee Jojias’g ɓa yeḛ ḭ lée’g nee aw pana: Yeḛ lé a tel ree lée’g neelé gogo el.

¹² Nɛ yeḛ a kwəi mee ɓee gə́ d’wá ɓər d’aw səa keneŋ lé ɓó kəmee a koso dɔ ɓee’g neelé gogo el ŋga.

Ta gə́ wɔji dɔ Jojakim, ŋgolə Jojias lé

¹³ Meeko̰ a koso dɔ yeḛ Gə́ tum gin kəi ləa Gə goo néra gə́ gə dɔ najee el ləm, Gə rɔd ŋgan kəije dɔ na̰’d-na̰’d Gə goo néra gə́ gə goo rəbee el ləma, Gə ar maree ra kula aree kari ba Lal kuga dɔ jia ləm tɔ.

¹⁴ Yeḛ gə́ pana: N’a ra kəi lə neḛ karee boo ləm, N’a rɔd ŋgan kəije dɔ na̰’d-na̰’d Karee tad rəg-rəg ləm, Gə́ ar dee mbudu kəmbolèje Gə́ tad keneŋ ləm, Gə́ ɓər kag-sɛdrəje mée’g ləma, Gə́ ɔr giree gə né gə́ kas ləm tɔ.

¹⁵ See i o̰ ɓee Mbata mal kag-sɛdrəje gə́ wa məəi wa. See bɔbi sɔ né gə ai né el wa. Nɛ yeḛ nja gaŋg rəwta gə goo rəbee ləm, Gə dɔ najee ləm tɔ Ndá yeḛ si ne dan rɔlel’g.

¹⁶ Yeḛ gaŋg rəwta lə njenékəmndoo Gə yeḛ gə́ né lalee gə goo rəbee, Ndá yeḛ si ne dan rɔlel’g. Njesigənea̰ pana: See néra gə́ togə́bè ɓa gə́ gər neḛ el wa.

¹⁷ Nɛ i lé kəmi gə dɔ ɓəŋgəri To mba tɔl ne mal kiŋga né gə goo rəbee el ləm, Gə mba kila ne məs yeḛ gə́ ta wa dəa el ləma, Gə mba kula kəm loo ndòo Ra ne né gə́ kərm-kərm ləm tɔ.

¹⁸ Gelee gə́ nee ɓa Njesigənea̰ pa ne ta togə́bè wɔji ne dɔ Jojakim, ŋgolə Jojias, mbai gə́ Juda pana: D’a nea̰ pana: Wai, ŋgokɔm gə́ diŋgam! Wai, ŋgokɔm gə́ dené! bèe el ləm, Esé d’a nea̰ togə́bè pana: Wai, mbai ləm! Wai, njemajidum ləm bèe el ləm tɔ.

¹⁹ Dɔɓaree a kasəna gə ka̰ mulayḛ̀je bèe, D’a ndɔree naŋg kaw kilá gir tarəwkɔgje gə́ Jerusalem.

Rɔkul a gə kwa dɔ njé gə́ Jerusalem

²⁰ Ubaje dɔ sém mbal gə́ Liba̰ Raje ne né wəl ləm, Paje gə ndu sí gə́ tar ɓəgəgə Arje loo gə́ Basan ləma, Arje ndu sí ɓar dɔ sém loo Gə́ Abarim ləm tɔ! Mbata deḛ lai gə́ d’unda sí dan kəm dee’g lé Tuji pugudu.

²¹ Ma m’ula sí ta Loo gə́ seḭ síje dan maji’g, Nɛ seḭ pajena: A kooje ta el. Yee ɓa gə́ néra sí gə́ un kudee gə kas sí ba lé Seḭ unje ne mbi sí rəw dɔ ta’g lə neḛ.

²² Njékul síje lai lé Lel a kɔr dee kaw sə dee əw ləm, Deḛ gə́ d’unda sí dan kəm dee’g kara D’a kaw ɓee-ɓər’g ləm tɔ. Yen ŋga rɔkul a dəb dɔ sí’g Kar sɔḭ wa kəm sí Mbata néra meeyèrje lə sí lai.

²³ Seḭ gə́ síje sém mbal gə́ Liba̰ Gə́ raje kəi lə sí asəna gə kəi-yel Mbuna kag-sɛdrəje’g bèe lé Loo gə́ némeekonje d’a teḛ dɔ sí’g ndá Seḭ a tuma̰je ŋgururu-ŋgururu, To némeeko̰ gə́ to asəna gə ndóo Gə́ ra dené loo-koji ŋgon’g bèe.

Ta gə́ wɔji dɔ Jekonia, ŋgolə Jojakim

²⁴ Njesigənea̰ pana: Neḛ n’to njesikəmba, lé i Jekonia, ŋgolə Jojakim, mbai gə́ Juda to gə́ ŋgama gə́ jikɔl neḛ’g ya kara n’a kɔree gə́ léegəneeya.

²⁵ N’a kubá kyá̰ ji deḛ gə́ ndigi tɔlee’g ləm, gə ji Nebukadnesar, mbai gə́ Babilɔn ləma, gə ji Kaldeje’g ləm tɔ.

²⁶ N’a kuni-i gə kɔinje gə́ njekojii kaw kɔm sí ɓee gə́ raŋg gə́ to ɓee-koji sí el ndá lé nee ɓa seḭ a kwəije keneŋ.

²⁷ Nɛ ɓee gə́ mal tel kaw keneŋ ra dee lé d’a tel kaw keneŋ gogo el ŋga.

²⁸ See Jekonia to jo gə́ tɔ gə́ d’ə̰jee bəḭ-bəḭ wa. See yeḛ to né gə́ dəw kára kara oo gə́ né el ɓəi wa. See gelee ban ɓa d’unee-yeḛ gə ŋgakeaje d’aw d’ɔm dee dɔ ɓee’d gə́ deḛ gər el lé wa.

²⁹ Ǝi ɓee ləm, ɓee ləm, ɓee ləm, maji kari oo ta lə Njesigənea̰!

³⁰ Njesigənea̰ pa togə́bè pana: Undaje ri dəw neelé gə́ dəw gə́ lal ŋgon ləm, gə́ dəw gə́ teḛkɔr mee ndɔje’g ləa el ləm tɔ. Mbata ŋgokea kára kara gə́ a teḛkɔr mba si kalimbai’g lə Dabid mba ko̰ɓee dɔ Judaje’g lé godo.