Jeremi 20 - Maktub gə́ To gə Kəmee

Kwa gə́ d’wa Jeremi

¹ Pasur, ŋgolə Imer gə́ to njekinjanéməs gə mbai gə́ njekoo goo néje gə́ mee kəi’g lə Njesigənea̰ lé oo ta lə Jeremi loo gə́ yeḛ teggin taje neelé.

² Ndá Pasur lé kunda Jeremi njetegginta tɔɓəi ila ɗa gɔlee’g tarəw gə́ lə Bḛjamije dɔ maree gə́ tar mee kəi’g lə Njesigənea̰.

³ Nɛ bèlè lookàree ndá Pasur ar dee d’ɔr ɗa gɔl Jeremi’g. Ndá Jeremi ulá pana: Njesigənea̰ unda rii lə Pasur el nɛ yeḛ unda rii lə Magor-Misabib ŋga.

⁴ Mbata Njesigənea̰ pa togə́bè pana: Aa oo, i seḭ gə baokuraje ləi lai n’a gə kɔm sí dan boo-néɓel’g. Deḛ d’a kwəi yoo-kiambas lə njéba̰je lə dee ndá i a koo gə kəmi. Judaje lai kara n’a kuba dee kya̰ dee meḛ ji mbai gə́ Babilɔn’g karee wa dee ɓər aw sə dee Babilɔn ləm, karee tɔl dee gə kiambas ləm tɔ.

⁵ Nébaoje lai gə́ to mee ɓee-boo’g neelé ləm, gə nékiŋgaje ləa lai gə́ dəwje d’inja təd bur ɓa d’iŋga lé ləm, gə néje ləa lai gə́ maji dum ləma, gə nébaoje lai gə́ to ka̰ mbaije gə́ Juda ləm tɔ lé n’a ɓugu dee meḛ ji njéba̰je’g lə dee kar dee d’odo d’aw ne Babilɔn.

⁶ Tɔɓəi i Pasur gə njémeekəije ləi lai, seḭ a kawje ɓee-ɓər gə́ Babilɔn, ndá lée neelé ɓa i a kwəi keneŋ ndá d’a dubi keneŋ tɔ, i ləm gə baokuraje ləi lai gə́ i tegginta gə́ ŋgɔm ar dee lé ləm tɔ.

No̰ rɔ lə Jeremi rɔ Ala’g lé

⁷ I Njesigənea̰ ərm gə́ kər Ndá ma m’ya̰ rɔm m’ari ərm ya tɔ, I wam kérég ləm, i dum dɔm ləm tɔ. Gə ndɔje kára-kára lai m’to gə́ nékunda-kogo Ar dəwje lai d’ula sul dɔm’g.

⁸ Mbata ta-ta loo gə́ m’pata ndá Ma m’no̰ gə ndum gə́ tar wəl ya ɓa M’ila ne mbər néra gə́ kərm-kərm ləm, Gə tuji gə́ a gə ree ləm tɔ. Bèe ɓa ta lə Njesigənea̰ lé Am m’iŋga ne rɔkul gə́ boo ləm, Ar dee d’ula ne sul dɔm’g Gə ndɔje kára-kára lai ləm tɔ.

⁹ Ɓó lé m’pa məəm’g pana: M’a pata ləa el ŋga ləm, M’a pata ləa gə ria el ŋga ləm tɔ ndá Ta ləa o̰ məəm to gə́ pər bèe Mbuna siŋgarɔmje’g. Ma m’wa rɔm kɔgərɔ Gə mba kudee məəm’g nɛ lé godo.

¹⁰ Mbata m’oo ta lə dəwje bula Gə́ pata gə́ majel dɔm’g ləm, Ɓəl-boo aḭ dɔm sub ləm tɔ. Deḛ pana: Maji kar sí j’ilaje ta dəa’g Ndá j’a kilaje ta dəa’g ya. Deḛ lai gə́ m’isi sə dee lɔm kara Tənəm gə mba koo see M’a kunda ndolé wa. Deḛ pana: Banelə d’a kiŋga ta tam’g, Yen ɓa d’a dum ne dɔm ləm, D’a dal ne ba̰ dɔm’g ləm tɔ!

¹¹ Nɛ Njesigənea̰ nai səm Asəna gə bao-rɔ gə́ njesiŋgamoŋ bèe, Gelee gə́ nee ɓa njékula kəm ndooje lé D’unda ne ndolè ɓó dum dɔm el, Rɔkul a tɔ dee gaa-gaa Mbata dum gə́ deḛ dum dɔm el lé. To rɔkul gə́ a to saar gə no̰ Gə́ mee dəw a kwəi dɔ’g el.

¹² Njesigənea̰ gə́ njeboo-néje lé Aḭ mee njemeekarabasur, I naa mee dəw ləm, I naa takə̰ji ləa ləm tɔ. M’a koo né gə́ i a ra Dal ne ba̰ ləi dɔ dee’g Mbata i nja ɓa m’ɔm ta ləm jii’g.

¹³ Ɔsje pa arje Njesigənea̰ pideeje ne! Mbata yeḛ taa njendoo ji njémeeyèrje’g.

¹⁴ Maji kar ndɔl wa dɔ ndɔ gə́ d’ojim keneŋ! Maji kar ndɔ gə́ kɔm ojim keneŋ lé Dəw tɔr ndia dɔ’g el.

¹⁵ Maji kar ndɔl wa dɔ dəw Gə́ njekula bɔm pana: To ŋgoni gə́ diŋgam Ar rɔlelee taa mée pəl-pəl lé.

¹⁶ Maji kar dəw neelé to asəna gə ɓee-booje Gə́ Njesigənea̰ tuji dee pugudu-pugudu, lal meekoso ləmsé bèe! Maji karee oo ndu no̰ lə dəwje gə ndɔ rad ləm, Gə kò-rɔ gə́ ɓar loo gə́ kàr aar daŋdɔ ləm tɔ!

¹⁷ Lé Ala am m’wəi mee kɔm’g Ar mee kɔm ɓa tel to gə́ bwa-dubum gə no̰ Esé ar kɔm aw gə kèm ya gə no̰ ɓa maji!

¹⁸ Gə mba ɗi ɓa m’unda loo mee kɔm’g m’teḛ M’isi ne dan némeeko̰ gə néɓəŋgərəti’g ləm, Ar ndɔje ləm kara tuji ne dan rɔkul’g ləm tɔ nee wa.