Jeremi 2 - Maktub gə́ To gə Kəmee

Taje gə́ ndaŋg ne koso-dəwje gə́ Israɛl

¹ Njesigənea̰ ulam ta gə rɔtaje nee pana:

² Aw ila ta nee mbi njé gə́ Jerusalem’g togə́bè pana: Njesigənea̰ pa togə́bè pana: Ma m’ar məəm olé dɔ meenoji’g lə sí Loo gə́ seḭ naije ne gə ma̰də sí ba ləm, Loo gə́ seḭ ṵdamje ne dan kəm sí’g Asəna gə njemɔr ləm bèe ləma, Loo gə́ seḭ ndolèje goom dɔdilaloo’g Gə́ dəw dubu né keneŋ el lé ləm tɔ.

³ Israɛlje lé to gə kəmee Mbata lə Njesigənea̰ ləm, Deḛ to kandə néje ləa gə́ doŋgɔr ləm tɔ. Deḛ lai gə́ d’usɔ kandə néje neelé D’ar taree wa dɔ dee ləm, Nékəmndoo oso ne dɔ dee’g ləm tɔ, Njesigənea̰ ɓa pa bèe.

⁴ Ooje ta lə Njesigənea̰, Seḭ gel-bɔje lə Jakob ləm, Seḭ lai gə́ toje gel-bɔje lə Israɛl ləm tɔ!

⁵ Njesigənea̰ pa togə́bè pana: See néra gə́ kori-kori ɗi ɓa Bɔ síje-je d’oo rɔm’g ɓa D’unda ne rɔ dee ŋgərəŋ rɔm’g D’aw ne goo néje gə́ gə mḭdé ba Gə́ ar dee-deḛ nja kara Tel to né gə́ gə mḭdé ba lé wa.

⁶ Deḛ dəji ta nee pana: See Njesigənea̰ gə́ ar sí j’undaje loo Mee ɓee gə́ Ejiptə n’teḛje ləm, Yeḛ gə́ ɔr no̰ sí dɔdilaloo’g Gə́ to dɔ naŋg’d gə́ tudu kurum-kurum Gə́ bwaje taa pəl-pəl ləm, Gə́ dɔ naŋg gə́ loo-tudu Gə yoo d’o̰ ɓee keneŋ ləm, Gə́ dɔ naŋg gə́ dəw kára kara Dəs keneŋ el ləma, Dəw kára kara ra ɓee keneŋ el ləm tɔ lé See si ra bèe wa.

⁷ Ma m’ar sí reeje mee ɓee’d Gə́ to asəna gə loo-ma̰a-kag-sɔ Gə mba kar sí sɔje ka̰deeje Gə néje gə́ maji dum gə́ teḛkɔr keneŋ. Nɛ loo gə́ seḭ reeje keneŋ ndá Seḭ arje ɓee ləm tel mina̰ ləm, Seḭ arje nédɔji ləm lé Tel to né gə́ mina̰ ləm tɔ.

⁸ Njékinjanéməsje kara dəji ta bèe pana: See Njesigənea̰ si ra wa el ləm, Njégər gin godnduje gərm el ləm, Njékɔrno̰ dəwje to majikojije el ləm, Njéteggintaje tegginta gə ri magə-Baal ləma, Deḛ d’aw goo deḛ gə́ D’askəm la sə dee el ləm tɔ.

⁹ Gelee gə́ nee ɓa ma m’ndigi Kɔr ne kəm ta kila dɔ sí’g ləm, Ma m’ndigi kɔr ne kəm ta Kila dɔ ŋgan meḛ ŋgan síje’g ləm tɔ, Njesigənea̰ ɓa pa bèe.

¹⁰ Awje dɔgoré-looje gə́ Kitim, Aw aaje loo ooje! Ulaje kula Kedar, tenje maji ooje Ndá tenje ooje See gar néra gə́ togə́bè lé to keneŋ ya wa.

¹¹ Ginkoji dəwje gə́ magəje lə dee To gə́ kankəm né el lé See d’odo mbél ne magəje gə́ raŋg wa. Nɛ koso-dəwje ləm d’un rɔnduba lə dee Mbél ne né gə́ a la sə dee el.

¹² Seḭ gə́ síje dara lé Arje kaar sí wa sí paḭ dɔ né’g neelé ləm, Undaje bala tigi-tigi Mbata néɓəl gə né gə́ to kḛji ləm tɔ! Njesigənea̰ ɓa pa bèe.

¹³ Mbata koso-dəwje ləm ra kaiyaje joo: Deḛ d’ubam-ma gə́ m’to Kəm-rəw-mán-kaji lé d’ya̰’m ləm, D’uru bwa-manje Gə́ to bwa-manje gə́ tɔr wuyum-wuyum Gə́ mán askəm kaar keneŋ el ləm tɔ.

¹⁴ See Israɛlje lé to ɓərje gə́ ndogo dee Esé d’oji dee mee kəi’g ya wa. See gelee ban ɓa deḛ tel to ne nékwa Le koso-dəwje gə́ raŋg wa.

¹⁵ Ŋgan toboḭje d’inja miḭ Ra ne hər-hər dɔ dee’g, Deḛ d’ar ɓee lə dee to dɔ nduba, Ɓee-booje lə dee roo dula-dula Ar dəw kára kara ra ɓee keneŋ el.

¹⁶ Ŋgalə Nop gə Tapanɛs kara D’a tɔ ka dɔ sí rɔb-rɔb ya.

¹⁷ Néje neelé see teḛ dɔ sí’g Mbata seḭ ubaje Njesigənea̰, Ala lə sí yá̰je Loo gə́ yeḛ ɔr no̰ sí rəw gə́ maji’g lé el wa.

¹⁸ Ɓasinè lé see ɗi ɓa seḭ a raje Mba kaw ne Ejiptə Kaw kai ne mán baa gə́ ria lə Nil lé wa. See ɗi ɓa seḭ a raje mba kaw ne Asiri Kaw kai ne mán baa gə́ ria lə Epratə lé wa.

¹⁹ Meeyèr lə sí a kwɔji sí kəmkàr ləm, Kalta lə sí a kar bo̰ néra sí Ɔs ta sí’g ləm tɔ. Bèe ɓa seḭ a kooje gao To gə́ kuba Njesigənea̰, Ala lə sí kyá̰ ləm, Gə lal ɓəlee ləm tɔ lé To né gə́ majel gə adə ta’g mbag-mbag ya, Mbaidɔmbaije gə́ Njesigənea̰ Gə́ njeboo-néje gə́ dara ɓa pa bèe.

Israɛlje d’ila ŋgonkoji dɔ Njesigənea̰’g el

²⁰ Un kudee ləw ba lé Seḭ tədje néməməna̰ gwɔb sí’g ləm, Seḭ tije kulaje rɔ sí’g ləm tɔ Ndá seḭ pajena: Seḭ ndigije ra kula ɓər el ŋga! Nɛ dɔdərlooje lai gə́ d’ḭ tar lé ləm, Gə gel kagje lai gə́ təb ləm tɔ lé Seḭ rogoje keneŋ Asəna gə néra kaiya-dené bèe.

²¹ Ma ma̰a sí gə́ kag-nduú gə́ maji dum Gə́ ka̰dee maji, Ŋga see ban ɓa seḭ telje rɔ sí raŋg Ar sí tel toje nduú gə́ mee kɔr’g ɓəi wa.

²² Lée seḭ togoje rɔ sí gə sigiri Lée usuje ne rɔ sí yaa̰ ya kara Néra gə́ kori-kori lə sí nai rɔ sí’g nɔm’g ya, Mbaidɔmbaije gə́ Njesigənea̰ ɓa pa bèe.

²³ See ban ɓa seḭ ulaje pajena: Rɔ sí mina̰ el ləm, Seḭ awje goo magə-Baal’g el ləm tɔ lé wa. Aaje loo ooje tor gɔl sí Gə́ to kəm wəl-loo’g ləm, Tegje gin né gə́ seḭ raje ləm tɔ. Seḭ gə́ toje asəna gə jambalje Gə́ njérɔkwɔilɔje gə́ awje yo gə́ nee!

²⁴ Seḭ toje asəna gə ko̰-mulayḛ̀je-je Gə́ gərje loo gə́ dɔdilaloo’g maji ləm, Gə́ awje ndəŋ-ndəŋ goo malee Gə́ ra sí lé ləm tɔ, See na̰ ɓa a kɔg sí dɔ malee Gə́ ra sí lé wa. Deḛ lai gə́ saŋg sí lé D’iŋga sí kalaŋ lal dao ləm, Deḛ d’iŋga sí mee naḭyee’g Gə́ wɔji dɔ sí ya ləm tɔ.

²⁵ Undaje kəmkàr dɔ rɔ sí’g Gə mba njaaje gɔl sí kari ba el ləm, Arje gwɔs sí tudu kurum-kurum el ləm tɔ! Nɛ seḭ pajena: Wah! to né kari ba! Mbata seḭ ndigije magəje gə́ dɔ ɓee’g ləm, Seḭ ndigije kawje goo dee’g ləm tɔ.

²⁶ To gə́ njeɓogo gə́ dəw teḛ dəa’g wai ar rəa kul lé Gel-bɔje lə Israɛl kara Rɔ dee a kul togə́bè tɔ, Deḛ ləm, gə mbaije lə dee Gə ŋgan-mbaije lə dee ləm, Gə njékinjanéməsje lə dee Gə njéteggintaje lə dee ləm tɔ.

²⁷ Deḛ d’ula kag pana: I to bɔ síje! Deḛ d’ula mbal pana: I ɓa ar sí j’isi kəmba! Mbata deḛ turu gir dee d’ila d’am ləm, D’aa loo gə́ rɔm’g el ləm tɔ Ndá loo gə́ nékəmndoo teḛ dɔ dee’g ɓa D’ulam pana: Ḭta aji sí!

²⁸ See magəje lə sí gə́ seḭ ra deeje lé d’əd ra ɓəi wa. Maji kar dee d’ḭta, Ɓó lé deḛ d’askəm kaji sí ndɔ nékəmndoo’g Ǝi seḭ Judaje, magəje lə sí bula to gə́ ɓee-booje lə sí bèe!

²⁹ See ban ɓa seḭ a kɔrje kəmta lə sí Maḭje ne səm bèe wa. Seḭ lai toje majikojije el, Njesigənea̰ ɓa pa bèe.

³⁰ Ma m’kunda ŋgan síje kara M’kunda dee pi, Deḛ d’oo ta gɔl ləm gə́ m’gɔl dee lé gə́ né el, Seḭ gaŋgje njéteggintaje lə sí gə kiambas Asəna gə toboḭ gə́ njetuji né bèe.

³¹ Seḭ ginkoji dəwje, Maji kar sí ooje ta lə Njesigənea̰ gə́ né ya! See ma m’to asəna gə dɔdilaloo mbata lə Israɛlje Esé ma m’to ɓee gə́ loo ndul keneŋ njudu-njudu wa. See gelee ban ɓa dəwje ləm pana: Loo gə́ meḛ sí ndigi ya j’a kaw’g Jeḛ ndigi kaw rɔi’g el lé wa.

³² See mee ŋgoma̰də wəi dɔ néndam’g ləa Esé mee njeŋgao-sigi wəi dɔ mər’g ləa wa. Nɛ koso-dəwje ləm d’ar meḛ dee wəi dɔm’g Ləw ba as ndɔje bula dum tura.

³³ Seḭ lé seḭ gərje loo ra goso yaa̰ Mba ndolè yeḛ gə́ seḭ ndigeeje lé Ndá seḭ raje goso yaa̰ Gə mba ra ne némajelje togə́bè ya tɔ.

³⁴ Saar kar ta kubuje lə sí gə́ rɔ sí’g ya Məs dəwje gə́ kari ba gə́ ta wa dɔ dee el lé Wa keneŋ mbəgə-mbəgə Ɓó to məs deḛ gə́ seḭ teḛje Dɔ dee’g wai loo-saŋg-denéje’g lé el.

³⁵ Nɛ lé bèe kara seḭ pajena: Tɔgərɔ ya, ta wa dɔ sí el, Tɔgərɔ, oŋg ləa wəi ne bèm dɔ sí’g! Aa ooje, m’a gə kɔr ta kila dɔ sí’g Mbata seḭ pajena: Jeḛ n’raje kaiya el.

³⁶ See gelee ban ɓa seḭ ulaje rɔ sí ndubu Mba kar rəw-kaw sí tel ɓəd wa. Rɔkul a kḭ Ejiptə dəb dɔ sí’g To gə́ ḭ ne Asiri dəb dɔ sí’g bèe tɔ.

³⁷ Lée neelé ɓa seḭ a kundaje loo Keneŋ teḛje kɔmje ji sí dɔ sí’g, Mbata Njesigənea̰ mbad Deḛ gə́ seḭ ɔmje meḛ sí dɔ dee’g Ndá seḭ a teḛje ne kɔr keneŋ el.