Jeremi 15 - Maktub gə́ To gə Kəmee

¹ Njesigənea̰ ulam togə́bè pana: Lée Moyis gə Samel ya d’aar no̰ neḛ’g mba ra rəwta lə koso-dəwje neelé kara n’a koo kəmtondoo lə deḛje neelé el. Tuba dəwje neelé no̰m’g ɔm dee əw mba kar dee d’ɔd d’aw.

² Ɓó lé deḛ dəjim pana: See j’a kawje ra wa, Ndá m’a kila dee keneŋ pana: Njesigənea̰ pa togə́bè pana: Deḛ gə́ yoo-koso ɓa wɔji dɔ dee Ndá d’a kwəi yoo yoo-koso ya ləm, Deḛ gə́ kiambas ɓa wɔji dɔ dee Ndá d’a tɔl dee gə kiambas ya ləm, Deḛ gə́ yoo ɓoo-boo ɓa wɔji dɔ dee Ndá d’a kwəi yoo ɓoo-boo ya ləma, Deḛ gə́ ɓər ɓa wɔji dɔ dee Ndá d’a kwa dee ɓər ya ləm tɔ.

³ Njesigənea̰ pana: N’a kula gə nétujije ɓəd-ɓəd as sɔ dɔ dee’g (kiambas mba tɔl dee ne ləm, bisije mba ndɔr dee naŋg kaw sə dee əw ləma, gə yelje gə daje gə́ wala gə mba sɔ dee kar dee godo ləm tɔ).

⁴ N’a tel dee gə́ néɓəl mbata lə ɓeeko̰je lai gə́ dɔ naŋg nee mbata lə néra majelje lai gə́ Manasə, ŋgolə Ejekias, mbai gə́ Juda ra mee ɓee gə́ Jerusalem lé.

Rɔ Njesigənea̰ asee dɔ njé gə́ Jerusalem’g

⁵ I ɓee gə́ Jerusalem lé See na̰ ɓa a koo kəmtondoo ləi wa. See na̰ ɓa a no̰ nɔḭ wa. Esé see na̰ ɓa a kaw Gə mba dəji loo-si-maji ləi wa.

⁶ Seḭ ubamje ya̰’mje, Njesigənea̰ pa bèe. Seḭ rəmje gogo. Nɛ neḛ n’ula ji neḛ ndiŋ gə́ dɔ sí’g Ndá n’tuji sí ne, Rɔ neḛ as neḛ dɔ koo kəmtondooje’g lə sí.

⁷ Neḛ tó dee gə lel tarəwkɔgje’g lə ɓee ləm, Neḛ n’ɔg dee ŋganje ləma, N’tuji koso-dəwje Gə́ d’uba rəw-kaw deeje d’ya̰ el lé ləm tɔ.

⁸ Njékəisiŋgaje lə dee Bula d’unda nagəra gə́ ta baa’g, N’ar njetuji oso dɔ dee’g gə dɔ ko̰ basa’g Loo gə́ kàr aar daŋdɔ. Neḛ n’ar néɓəŋgərəti Gə néɓəl-boo teḛ dɔ dee’g wai.

⁹ Yeḛ gə́ oji ŋganje siri lé unda ndolè Ar kəmə ləa godo, Loo gə́ kàr aar tar ɓəi ndá, Loondul dəb dəa’g, Rɔkul dəb dəa’g ar sɔḭ wa kəmee. Ges dee gə́ nai lé neḛ m’ɓugu dee Ta kiambas’g lə njéba̰je lə dee. Njesigənea̰ ɓa pa bèe.

No̰ rɔ lə njetegginta (Tapa Jeremi)

¹⁰ Kɔm, meeko̰ oso dɔm’g Mbata i ojim Gə́ njemaḭta gə njekunda tar Mbata lə dəwje lai! Ma m’ar dee tonam né el ləm, M’tona dee né el ləm tɔ, Nɛ lé bèe kara deḛ lai d’ila ndɔl dɔm’g.

¹¹ Njesigənea̰ pana: Tɔgərɔ, ndɔ gə́ gogo m’a si dan rɔlel’g, Tɔgərɔ, n’a kɔs kudu njéba̰je lə neḛ Kar dee ra ndòo rɔ neḛ’g ndɔ némeeko̰’g ləm, Gə ndɔ néurti’g ləm tɔ.

¹² See dəw a k’askəm təd larndul Gə́ d’ḭ ne dɔgel əsé larkas wa.

(Tapa Njesigənea̰)

¹³ Neḛ n’ar dəwje némajije Gə nébaoje lə sí kari ba gə́ nébanrɔ Mbata kaiya ra síje lai gə́ seḭ raje Dɔ naŋg’d lə sí bura lé.

¹⁴ Neḛ n’ar njeba̰ lə sí Aw sə sí mee ɓee gə́ seḭ gərje kédé el, Mbata oŋg lə neḛ mbudu pər o̰ O̰ dɔ sí’g ya.

(Tapa Jeremi)

¹⁵ Ǝi Njesigənea̰, I gər néje lai, Ar məəi olé dɔm’g ɓó Ar məəi wəi dɔm’g el. Maji kari dal ba̰ ləm Dɔ njékula kəmndooje’g! Maji kari ɔrm el, i gə́ oŋg ḭ səi kalaŋ el lé. Maji kari gər gao, Rɔkul gə́ d’ila dɔm’g mbata ləi lé M’isi keneŋ lɔm ya.

¹⁶ Ma m’taa taje ləi m’uru dee məəm’g, Taje ləi lé ar məəm lelm ləm, Am m’isi ne dan boo-rɔkal’g ləm tɔ Mbata rii ɓar dɔm’g, I Njesigənea̰, Ala lə njéboo-rɔje.

¹⁷ Ma m’isi loo-kwa-dɔ-na̰’g Le njékimlooje gə mba kal rɔm sə dee el, Nɛ gə goo siŋgamoŋ ləi lé M’isi ne gə karm ba, Mbata i ar oŋg-boo rusu məəm tub-tub.

¹⁸ See gelee ban ɓa némeeko̰ ləm Aw gə́ kédé-kédé wa. See gelee ban ɓa doo ləm toom yaa̰, Ndigi kər el ləm tɔ wa. Tɔgərɔ ya i to asəna gə kəm-rəw-mán Gə́ ər dəwje gə́ kər, Gə́ dəw askəm kɔm mée dɔ’g el.

¹⁹ Gelee gə́ nee ɓa Njesigənea̰ pa ne togə́bè pana: Ɓó lé ma m’naam kaar neḛ’g ndá N’a kilam keneŋ, Tɔɓəi m’a kaar no̰ neḛ’g, Ɓó lé m’ɔr kəm néje gə́ to ŋgonkəm Mbuna néje gə́ mina̰’g ndá M’a to asəna gə ta neḛ tɔ. To ta lə dee-deḛ gə mba tel ree rɔm’g Ɓó to ta ləm-ma ɓa Gə mba tel kaw rɔ dee’g el.

²⁰ N’a telm asəna gə ndògo-larkas Mbata lə koso-dəwje neelé. D’a rɔ səm nɛ d’a dum dɔm el. Mbata n’a nai səm gə mba kajim ləm, Mba kɔrm ji dee’g ləm tɔ. Njesigənea̰ ɓa pa bèe.

²¹ N’a taam ji njémeeyèrje’g ləm, N’a kajim ji njéra né kərm-kərmje’g ləm tɔ.