Jeremi 12 - Maktub gə́ To gə Kəmee

See gelee ban ɓa njemeeyèr teḛkɔr wa

¹ Njesigənea̰, nérai gə́ gə dɔ najee dum dɔ loo Ɓó ma m’askəm maḭ səi ta el, Nɛ lé bèe kara M’a kwɔji səi ta dɔ rəwta-gaŋgje’g ləi ya: See gelee ban ɓa Rəw-kaw njémeeyèrje teḛ sə dee dan maji’g wa. See gelee ban ɓa Deḛ lai gə́ to majikojielje lé kara d’isi lɔm wa.

² I ma̰a dee ar ŋgira dee wa na̰ ɗab-ɗab ləm, Deḛ ra tɔg ləma, d’andə ləm tɔ, Rii to ta dee’g pèrèrè, Nɛ meḛ dee nai əw səi.

³ Nɛ Njesigənea̰, i gərm gao ləm, I oom ləma, i naa meekuru ləm Gə́ m’ɔm dɔi’g ləm tɔ. Maji kari ɔr dee asəna gə badje Gə́ d’aw sə dee gə́ loo-tɔl dee’g ləm, Maji kari gɔl dee Ŋgina ne ndɔ ndum dee mburug-mburug ləm tɔ.

⁴ See saar ndɔ gə́ ra ɓa ɓee a si dan nékəmndoo’g ləm, muje gə́ mee ndɔje’g lai d’a tudu ləm tɔ wa. Gə mbata némeeyèrje lə njé gə́ d’isi keneŋ lé ɓa daje gə yelje tuji ne. Mbata njéɓeeje lé pana: Ala askəm koo né gə́ a gə teḛ dɔ neḛje’g el.

⁵ Ɓó lé i aiŋgwɔd na̰’d Gə deḛ gə́ d’aḭ gə gɔl dee Ɓa deḛ dumi d’ari dao ne Ŋga see i a kaskəm koma̰ Gə njékundaje to gə́ ban wa. Esé ɓó lé mee ɓee gə́ to lɔm ya, I oo to gə́ i si ne lɔm el Ŋga see i a si maji mee wala’g Ta baa’d gə́ Jurdɛ̰ to gə́ ban wa.

⁶ Mbata ŋgakɔḭje gə njémeekəije lə bɔbije ya kara d’un dɔi ləm, deḛ ra né gooi’g wəl-wəl ləm tɔ, lé d’a gə kulai ta gə ndu gwɔs noji ya kara maji kari ndigi sə dee el.

Ala uba kəi ləa gə koso-dəwje ləa ya̰ dee

⁷ M’a m’uba kəi ləm m’ya̰ ləm, Ma m’uba nédɔji ləm kara m’ya̰ ləma, M’uba yeḛ gə́ m’undá dan kəm’g lé M’yá̰ ji njéba̰je’g ləa ləm tɔ.

⁸ Nédɔjije ləm lé tel to d’asəna Gə toboḭ gə́ si mee kag-kɔr’g No̰ komam né, Yee ɓa ma m’tel m’ə̰ji dee ne bəḭ-bəḭ gə mbəa.

⁹ Nédɔjije ləm lé tel to d’asəna Gə yel gə́ bèlee tila ɓal ləm, Gə jagmjər bèe ləm tɔ, Yee ɓa yelje gə́ njésɔ mar deeje Ree d’aḭ ne dəa sub ləm, Maji kar sí awje aw mbo̰je daje Gə́ mee wala’g lai Ar deeje ree d’usá mbad-mbad ya!

¹⁰ Njékulbadje bula tuji ndɔ-nduú ləm ləm, Deḛ mbɔḭ ndɔ ləm naŋg ləm tɔ, Deḛ d’ar ndɔ ləm gə́ maji yaa̰ lé Tel to dɔdilaloo gə́ né godo keneŋ.

¹¹ Deḛ d’aree tel to dɔdilaloo, Yee tel to loo ndòo ləm, Kəmee to ndòo nɔm’g ləm tɔ. Ɓee lai tuji pugudu, Mbata dəw kára kara gə́ njekḛji dɔ’g godo.

¹² Mee looje lai gə́ ndəw Gə́ to dɔdilaloo’g lé Njétujilooje ree keneŋ, Mbata kiambas lə Njesigənea̰ Tuji ɓee bura ya̰ gesee el, Dəw kára kara iŋga meelɔm el.

¹³ Deḛ dubu kó nɛ kun ɓa d’inja ləm, Deḛ dao ne dao-dao lal kiŋga né keneŋ ləm tɔ. Maji kar sí naije gə rɔkul dɔ né gə́ seḭ injaje’g Gə goo oŋg lə Njesigənea̰ gə́ taa pər lam-lam lé.

Njesigənea̰ gə njéboataɓeeje lə Israɛl

¹⁴ Njesigənea̰ pata togə́bè wɔji ne dɔ njéboataɓeeje ləm gə́ to njémeeyèrje pana: Deḛ tuji nédɔji gə́ n’ar dəwje lə neḛ gə́ Israɛl. Aa ooje, n’a kɔr dee mee ɓee’g lə dee ləm, n’a kɔr gel-bɔje lə Juda kara mbuna dee’g ləm tɔ.

¹⁵ Nɛ gée’g gogo loo gə́ n’ɔr dee mba̰ ndá n’a tel koo kəmtondoo lə dee gogo ləm, n’a tel gə nana kara gə́ dɔ nédɔji’g ləa-ləa, kar nana kara aw mee ɓee’g ləa-ləa ləm tɔ.

¹⁶ Ɓó lé deḛ ndoo panjaa koso-dəwje lə neḛ ləm, ɓó lé deḛ manrɔ dee gə ri neḛ pa ne pana: Njesigənea̰ to Njesikəmba to gə́ deḛ ndoo koso-dəwje lə neḛ d’ar dee manrɔ dee gə ri Baal ləm tɔ lé ndá d’a si dan rɔlel’g mbuna koso-dəwje’g lə neḛ ya.

¹⁷ Nɛ ɓó lé deḛ d’un mbi dee rəw dɔ’g d’oo ndá ginkoji dəwje gə́ togə́bè lé n’a tuji dee, n’a tuji dee pugudu kar dee godo. Njesigənea̰ ɓa pa bèe.