Jeremi 10 - Maktub gə́ To gə Kəmee

Njesigənea̰ ɓa to gə́ njekur dɔ magəje’g

¹ Seḭ gel-bɔje lə Israɛl, Ooje ta gə́ Njesigənea̰ ula sí!

² Njesigənea̰ pa togə́bè pana: Maji kar sí ndajije panjaa njépole-magəje el ləm, Ɓəlje nétɔjije gə́ mee dara’g el ləm tɔ, Mbata néje neelé njépole-magəje ɓəl dee.

³ Mbata néjiɓee lə koso-dəwje lé To né gə́ kari ba. Deḛ tuga kag gə́ mee kag-kɔr’g, Njetɔlee tɔl gə kuba.

⁴ Deḛ d’ɔr giree gə larnda gə larlɔr d’aree kura, D’un mo̰ ɓər ne ŋgawlar keneŋ Gə mba karee yə el.

⁵ Dee magəje neelé to d’asəna Gə jigi-kag gə́ aar ndiu lal pata, Dəwje d’odo dee Mbata deḛ d’askəm njaa el. Maji kar sí ɓəl deeje el Mbata deḛ d’askəm ra né gə́ majel Kára kara el ləm, Deḛ d’askəm ra né gə́ maji Kára kara el ləm tɔ.

⁶ Ǝi Njesigənea̰! Dəw kára bèe Gə́ to tana səi pai godo. I to gə́ boo ləm, riɓar ləi to gə́ boo Gə goo siŋgamoŋ ləi ləm tɔ.

⁷ I gə́ to mbai dɔ ginkoji dəwje gə raŋg lé See na̰ ɓa a ɓəli el wa. I nja ɓa kəm kar dee ɓəli ya, Mbata mbuna njékəmkàrje’g Le ginkoji dəwje gə raŋg ləm, Gə mee ɓeeko̰je’g lə deḛ lai ləm tɔ lé Njetana səi godo.

⁸ Deḛ lai to gə́ mbəje gə njégərnéelje, Gosɔnégər lə dee to gə́ né gə́ kari ba: To gə́ kag!

⁹ Deḛ d’ḭ gə larnda gə́ d’unda gə mo̰ Ɓee gə́ Tarsis ləm, Gə larlɔr gə́ Upaj ləm tɔ ɓa ree ne. Njékulaje gə njégər goso kula larje ɓa Ra kula keneŋ gə ji dee, Kubu kula rɔ magəje neelé To kubuje gə́ deḛ ndiri gə́ ndul piro-piro ləm, Gə kas njir-njir ləm tɔ. Néje lai neelé to kula gə́ njégərgoseje Ɓa ra gə ji dee.

¹⁰ Nɛ Njesigənea̰ to Ala gə́ tɔgərɔ, Yeḛ to Ala gə́ njesikəmba ləm, Gə mbai gə́ njesi gə ləbee-ləbee Gə no̰ ləm tɔ. Naŋg yə no̰ oŋg’d ləa ləm, Ginkoji dəwje gə raŋg d’askəm Kaar gəs no̰ oŋg-boo’g ləa el ləm tɔ.

¹¹ Seḭ a kula deeje togə́bè pajena: Magəje gə́ ra dara əsé naŋg nee el lé D’a sané pá dɔ naŋg nee ləm, Gə gin dara’g ləm tɔ.

¹² Njesigənea̰ unda naŋg Gə goo siŋgamoŋ ləa ləm, Yeḛ tum gin naŋg nee Gə goo kəmkàr ləa ləma, Yeḛ naji dara gə goo gosonégər ləa ləm tɔ.

¹³ Loo gə́ ndia ɓar ndá Manje mbo̰ na̰ mee dara’g ləm, Yeḛ ar kil-lə-ndi ḭ rudu naŋg’d ləm, Yeḛ ar ndi tel ləm, gə ər ləma, Yeḛ ar lel ḭ loo-ŋgəm’g ula ləm tɔ.

¹⁴ Dəw gə́ rara kara Négər ləa aree tel mbə ləm, Njelḛ̀ né gə́ rara kara rəa kul Mbata lə né gə́ yeḛ ndaji ləm tɔ, Mbata magəje ləa to néŋgɔmje ləm, Kəmə godo meḛ dee’g ləm tɔ.

¹⁵ Deḛ to néje gə́ mḭdé ba ləm, To nésukəmloo ləm tɔ. Loo gə́ bo̰ néra dee a kɔs ta dee’g ndá D’a tuji pugudu-pugudu.

¹⁶ Yeḛ gə́ to ka̰ Jakob lé To asəna gə magəje el, Mbata yeḛ nja ɓa gə́ njera néje lai, Ginkoji Israɛlje to gə́ nédɔji ləa. Njesigənea̰ gə́ njeboo-néje ɓa gə́ ria.

Tuji-boo si ree (Tapa Jeremi)

¹⁷ Seḭ gə́ Jerusalem gə́ síje dan néurti’g, Odoje néje lə sí gə́ mee ɓee’g.

¹⁸ Mbata Njesigənea̰ pa togə́bè pana: Aa ooje, ɓasinè n’a kɔs njéɓeeje neelé Kɔm dee loo gə́ əw’g ya. N’a gə kwa dee kègègè Kar dee teḛ ji neḛ’g el.

(Tapa ɓee gə́ Jerusalem)

¹⁹ Meeko̰ oso dɔm’g am m’tuji mba̰! Doo lé tom yaa̰! Kédé ma m’pana: To rɔko̰ gə́ ram Ndá m’a kila məəm po̰.

²⁰ Kəi-kubu ləm tuji pugudu ləm, Kulaje ləa lai gaŋg ləm tɔ, Ŋganəmje gə́ diŋgam d’ubam d’ya̰’m, Deḛ godo. Dəw kára gə́ njegɔl kəi-kubu ləm gogo Gə́ njera kəi-boom ləm lé godo.

(Tapa Jeremi)

²¹ Njékul dəwje lé kəmkàr lə dee godo, Deḛ ndolè goo Njesigənea̰ el, Yee gə́ bèe ɓa deḛ teḛ ne kɔr el ləm, Dəwje lə deḛ lai sané ne na̰ kad-kad ləm tɔ.

²² Aa ooje, sorta gə́ dəwje d’oo, To gə́ baŋga rɔ gə́ ḭ par gə́ dɔgel bèe ɓa si ree Gə mba kar ɓee-booje gə́ Juda tel to gə́ dɔ nduba ləm, Gə loo-to tàlje ləm tɔ.

Jeremi ra tamaji mbata koso-dəwje ləa

²³ Ǝi Njesigənea̰, ma m’gər gao, Rəw-kaw dəw lé to gə goo siŋgamoŋ ləa el ləm, Yeḛ askəm kwɔji rəw-kabee gə dɔrea el ləm tɔ.

²⁴ Ǝi Njesigənea̰, maji kari wɔjim kəmkàr Nɛ gə goo rəbee ɓa, Ɓó gə oŋg el, nà a tujim pugudu.

²⁵ Ar oŋg-boo ləi ɔm dɔ njépole-magəje’d Gə́ gəri el lé ləm, Gə dɔ koso-dəwje’d Gə́ ɓar rii el lé ləm tɔ, Mbata deḛ gaŋg njé’g lə Jakob mbidi-mbidi, Deḛ gaŋg dee, d’ar dee d’udu ləm, Deḛ tuji loo-si dee pugudu ləm tɔ.