Esai 58 - Maktub gə́ To gə Kəmee

Kɔg mee ɓoo gə́ taa kəm Ala

¹ Ɔr ndui gə́ tar ɓó əw el, Ar ndui ɓar to gə́ to̰to̰ bèe, Ila mbər ar koso-dəwje d’oo ne néra kori-korije lə dee ləm, Ar gel-bɔje lə Jakob d’oo ne kaiyaje lə dee ləm tɔ.

² Ndɔje kára-kára lai deḛ saŋgəm, Deḛ ndigi gər rəwje ləm, Asəna gə ginkoji dəwje gə́ ra né gə́ gə dɔ najee Gə́ d’uba godndu Ala lə dee d’ya̰ el ləm, Deḛ dəjim gə mba karm m’ar dee ndukun Gə́ ka̰ gaŋgta gə́ gə dɔ najee ləma, Deḛ d’wɔji mba kar Ala rəm pər gə́ rɔ dee’g ləm tɔ.

³ Deḛ pana: Ɓó lé ma m’oo neḛje el ndá See mba ɗi ɓa n’a kɔgje meḛ neḛje ɓó wa. Gelee ban ɓa n’a kulaje kəm rɔ neḛje ndòo Ɓó lé ma m’oo gə́ né el wa. Yen ŋga m’ila dee keneŋ m’pana: Aa ooje, ndɔ gə́ seḭ ɔgje meḛ sí ɓó ndá Seḭ ndunaje rɔ sí dɔ takə̰jije’g lə sí-seḭ ya ləm, Seḭ raje kədərə gə njékulaje lə sí lai ləm tɔ.

⁴ Aa ooje, seḭ ɔgje meḛ sí ɓó Mba maḭ ne na̰ ta gə kɔl ne na̰ ləm, Mba kudu ji sí kunda ne na̰ gə meeyèr ləm tɔ, Seḭ ɔgje meḛ sí ɓó gə goo rəbee Mba kar ndu sí ɓar njal teḛ loo-sim gə́ tar lé el.

⁵ See yee ɓa gə́ kɔg-mee-ɓoo gə́ taa kəm Mee ndəa gə́ dəw ula ne kəm rəa ndòo lé wa. Kula dɔ to gə́ ŋgawlal bèe ləm, Gə kula kubu-kwa-ndòo Rogo ne bu-pər’g ləm tɔ lé See yee neelé ɓa i ɓaree kɔg-mee-ɓoo ləm, Gə ndɔ gə́ lel Njesigənea̰ ləm tɔ wa.

⁶ Aa ooje, kɔg-mee-ɓoo gə́ taa kəm lé ɓa nee: Tudu kúla lar gə́ ka̰ meeyèr ləm, Tudu kúla lar gə́ ka̰ kula ɓərje ləm, Kya̰ goo deḛ gə́ d’ula kəm dee ndòo kar dee d’aw ləma, Néje lai gə́ to néməməna̰ lé Təd gwɔb dee’g ləm tɔ,

⁷ Ar dəw gə́ ɓó tɔlee muru ləi o̰ səi ləm, Ar njenékəmndoo gə́ kəi-kula-dəa godo aw mee kəi’g ləi ləm, Ɓó lé i oo dəw gə́ aw kudee dum ba ndá Aree né ula rəa’g ləma, Tel giri ila ar yeḛ gə́ to tana səi lé el ləm tɔ.

⁸ Yee ɓa ndogó ləi a kḭ ne to gə́ kàr Gə́ uba kuji’g bèe ləm, Rɔi a sa ne rəw kalaŋ ləm tɔ, Nérai gə́ gə dɔ najee a kɔr nɔḭ ləm, Rɔnduba lə Njesigənea̰ a korè səi rəw mès ləm tɔ.

⁹ Togə́bè ɓa i a ɓar-ɓar ndá Njesigənea̰ a kilai keneŋ, I a ra né wəl ndá Yeḛ a pana: Yḛ̀ m’aar nee! Ɓó lé i ɔr néməməna̰ rɔi’g ila əw ləm, Gə ŋgaw jii gə́ kula ləma, Gə ta gə́ hərm gə́ pa ləm tɔ,

¹⁰ Ɓó lé i un né ləi gə́ i sí ne kəmba Ar yeḛ gə́ ɓó tɔlee ləm, Ɓó lé i ar mee njendoo ndan tub ləm tɔ ndá Ndogó ləi a ndogó jol-jol loondul’g ləm, Loondulje ləi lé D’a to asəna gə kàr gə́ aar daŋdɔ bèe ləm tɔ.

¹¹ Njesigənea̰ a to njekɔrnoḭ ya ta-ta ləm, Yeḛ a kar məəi nda̰ tub Mee looje gə́ tudu kurum-kurum’g ləm, Yeḛ a kar barkəmrɔije tel ŋgəŋ ŋgəŋ-ŋgəŋ ləm, I a to kasəna gə loo-kamnaḭ Gə́ saga mán dɔ’g ləma, A to kasəna gə ŋgira mán Gə́ manje d’yi keneŋ tə el ləm tɔ.

¹² Njé’g ləi d’a kunda kəi Dɔ gineje gə́ ləw gə́ tuji’g ləm, I a gɔl gineje gə́ ləw karee ḭtar gogo ləm tɔ. D’a ɓari njegɔl kəm ndògo-bɔrɔje gə́ ta̰ ləm, Gə yeḛ gə́ njegɔl rəwje ləma, Gə yeḛ gə́ gɔl ɓee ar dəwje D’isi keneŋ ləm tɔ.

Ndɔ-kwa-rɔ gə́ taa kəm Ala

¹³ Ɓó lé i ɔg rɔi kaw tar gə ndɔ-kwa-rɔ Mba ra ne né gə́ məəi ndigi Mee ndɔ’g ləm gə́ to gə kəmee el ləm, Ɓó lé i oo ndɔ-kwa-rɔ gə́ ndɔ-kal-rɔi Mba kula ne rɔnduba dɔ Njesigənea̰’g Kundá ne gə kəmee ləma, Ɓó lé i ila riɓar dəa’g Ya̰ ne goo rəwje ləi Gə ya̰ ne goo kulaje gə́ məəi ndigi, Gə taje gə́ kari ba ləm tɔ ndá

¹⁴ I a kiŋga rɔlel gə́ ḭ rɔ Njesigənea̰’g ləm, M’a kuni kaw səi dɔ looje gə́ tar Gə́ duu dɔ ɓeeje ləma, M’a kari al rɔi gə nénduba lə bɔbi Jakob ləm tɔ. Mbata Njesigənea̰ ɓa pa bèe.