Esai 57 - Maktub gə́ To gə Kəmee

¹ Njera né gə́ gə dɔ najee lé tuji ndá Dəw kára gə́ njekḛji dɔ’g godo, Dəwje gə́ njéra némajije godo Ar dəw kára kara gər To gə́ d’ɔr dee mbata né gə́ majel Gə́ a gə teḛ dɔ dee’g lé bèe el.

² Deḛ gə́ d’un goo rəw gə́ danasur lé D’a kur dan meekulɔm’g ləm, D’a kwa rɔ dee loo-to dee’g ləm tɔ.

³ Nɛ seḭ ŋgalə njénékooje gə́ dené, Seḭ ginkoji dəwje gə́ njépole-magəje gə njékuba Ala kyá̰je lé Gə́ reeje pər gə́ nee,

⁴ See na̰ ɓa seḭ kənje səa wa. See na̰ ɓa seḭ teḛje ta sí ləgəgə-ləgəgə ləm, Gə tɔrje ndo̰ sí béləm-béləm gə́ dəa’g wa. See seḭ toje ŋgan njékaltaje Gə́ gin sí gə́ gin taŋgɔm el wa.

⁵ Seḭ arje ndil sí ɔs pər jəgəgə Mbɔr kag-terebḭtəje’g Gə gel kagje lai gə́ to təb’g ləm, Seḭ tḭjaje gwɔs ŋganje kəm wəl-looje’g Gel mbalje gə́ ta̰’g ləm tɔ.

⁶ Mbuna kɔr mbalje gə́ d’o̰ wal-wal kəm-rəw-manje’g ɓa To loo gə́ wɔji dɔ sí, Aa ooje, yee ɓa gə́ loo gə́ to ka̰ sí ya, Kɔr mbalje neelé ɓa Seḭ sagaje nékar gə́ to nékai ar deeje ləm, Seḭ unje nékar gə́ to nduji ar deeje ləm tɔ, See m’askəm kar məəm oso naŋg po̰ dɔ néje’g neelé wa.

⁷ To loo gə́ dɔ mbal gə́ ŋgal léŋgé-léŋgé gə́ ḭ gə́ tar ɓa Seḭ raje loo-to sí keneŋ, To lé neelé ya ɓa Seḭ awje keneŋ aw injaje nékinjanéməsje tɔ.

⁸ Seḭ ɔmje nékolé-mee dɔ’g lə sí Gir tarəwje’g ləm, gə gir kag tabidije’g ləm tɔ, Seḭ ya̰’mje əw ndá Tɔrje né rɔ sí’g ya̰je rɔ sí arje magəje ləm, Seḭ arje loo-to sí tad ndá Ɔmje ne sə dee na̰’d ləm tɔ, Seḭ oreeje kəm sí sḭ dɔ dee’g Mba ra ne néra deeje ya.

⁹ Seḭ awje gə ubu rɔ mbai’g ləm, Seḭ arje néje lə sí gə́ ə̰də sululu Ḭ dɔ maree’d gə́ kédé-kédé ləm, Seḭ ulaje njékaḭkulaje lə sí loo gə́ əw’g ləma, Seḭ osoje saar teḛje ne ɓee lə njé gə́ d’wəi ləm tɔ.

¹⁰ Seḭ daoje ne yaa̰ Mbata rəw-kaw sí gə́ əw Nɛ seḭ pajena: A kubaje kya̰je lé seḭ paje bèe el! Seḭ iŋgaje siŋga sí, Gelee gə́ nee ɓa Kaar sí ɓar ne dulug-dulug el tɔ.

¹¹ See na̰ ɓa seḭ ɓəleeje Ndəbje ne pəd-pəd nea̰’g Mba su ne kəm ləm, Mba kar meḛ sí olé ne dɔm’g el ləma, Mba kḛji ne dɔm’g el ləm tɔ wa. See ma m’isi mundu kurum əw lé el wa. Gelee gə́ nee ɓa Seḭ ɓəlmje ne el gə mbəa.

¹² M’a gə kila mber néra sí gə́ gə dɔ najee Ndá kula ra síje lé A kiŋgaje ne né kára kara keneŋ el.

¹³ Loo gə́ seḭ a no̰je wəl lé See boo-magpoleje lə sí d’a taa sí kila sí tar wa. Lel gə́ ula lé a kodo deḛ lai kaw sə dee ləm, Kəmə gə́ kila pugudu lé a kodo dee ləm tɔ. Nɛ yeḛ gə́ ɔm mée dɔm’g ndá A kiŋga ɓee lé gə́ né kea̰ ləm, A kiŋga mbal ləm gə́ to gə kəmee gə́ né kea̰ ləm tɔ.

Ta gɔl meḛ majikojije

¹⁴ D’a pana: Wɔije, wɔije, gɔlje rəw, Tɔrje néje lai gə́ ila kag rəw-kaw koso-dəwje’g ləm.

¹⁵ Mbata Njekurdɔloo ləm Njesikəmba gə no̰ ləma, Yeḛ gə́ Ria to gə kəmee ləm tɔ lé Pa togə́bè pana: Ma m’isi sém looje gə́ ndəw’g ləm, Gə loo gə́ to gə kəmee’g ləm tɔ, Nɛ m’isi na̰’d gə dəw gə́ kəmee to ndòo ləm, Gə yeḛ gə́ ula dəa ləm tɔ, Gə mba gɔl meḛ dee gə́ d’ula dɔ dee ləm, Gə deḛ gə́ kəm dee to ndòo ləm tɔ.

¹⁶ Ma m’ndigi ndaŋg dee saar-saar el ləm, Esé ŋgəm oŋg ləm saar-saar gə no̰ el ləm tɔ Nà dəwje gə́ m’unda lé d’a kwəi.

¹⁷ Gə goo mal né gə́ ra dee Gə́ ar ta wa ne dɔ dee lé ɓa Oŋg ḭ ne səm pu dɔ dee’g Am m’unda dee ne ləm, Ma m’iya ne rɔm pḛ́ dan oŋg’d ləm ləm tɔ, Ndá njekɔsta rəw aw ne rəw gə́ mée ndigi’g.

¹⁸ Ma m’oo rəw-kabeeje Ndá m’a kajee tɔ, M’a to njekɔrnea̰ ləm, M’a to njegɔl mée-yeḛ Gə ka̰ dee-deḛ gə́ no̰ səa lé ləm tɔ.

¹⁹ M’a kar ta pidi oji na̰ ta dee’g. Meelɔm, meelɔm mbata deḛ gə́ d’isi əw Gə deḛ gə́ d’isi dəb! Njesigənea̰ ɓa pa bèe pana: M’a kaji dee ya.

²⁰ Nɛ njémeeyèrje lé To to gə́ mán baa-boo-kad gə́ ula Gə́ askəm tel to lɔm el Ar bɔrɔ mán gə njawalaje d’ḭ keneŋ njem-njem.

²¹ Meekulɔm godo mbata lə njémeeyèrje, Ala ləm pa bèe.