Esai 55 - Maktub gə́ To gə Kəmee

Ala ɓar dəwje lai

¹ Seḭ lai gə́ kṵdaman tɔl sí lé Gə́ reeje ta mán’g, Seḭ gə́ lar lə sí godo kara Gə́ reeje, taaje nésɔ sɔje! Gə́ reeje taaje mán-nduú gə mbà aije! Lal laree ləm, lal kuga ɓaŋgee ləm tɔ

² See gelee ban ɓa seḭ saneje lar lə sí Dɔ né gə́ a la sə sí el lé wa. See gelee ban ɓa seḭ raje kula Mbata né gə́ as sí el lé wa. Ooje ta ləm ndá A sɔje ne né gə́ maji ləm, A kiŋgaje ne nésɔje gə́ lel lé ləm tɔ.

³ Urje mbi sí gèŋ, Ndá gə́ reeje rɔm’g, Ooje ta ndá A síje ne kəmba. M’a kun ndum kar sí Gə ndu manrɔ gə́ to gə no̰ Gə mba kar némeemaji gə́ m’ra gə Dabid lé To ne njaŋg.

⁴ Aa ooje, ma m’undá gə́ njekɔrgoota ləm Mbuna koso-dəwje’g ləm, M’undá gə́ mbai gə́ njedum dɔ koso-dəwje ləm tɔ.

⁵ Aa ooje, i a ɓar ginkoji dəwje gə raŋg gə́ i gər dee el Ndá ginkoji dəwje gə raŋg gə́ gəri el lé d’a kaḭ ree rɔi’g Gə mbata lə Njesigənea̰, Ala ləi, Yeḛ gə́ to Njerɔkunda lə Israɛlje Gə́ ula rɔnduba dɔi’g.

⁶ Saŋje Njesigənea̰ loo gə́ kəm kiŋgá’g, Ɓareje loo gə́ yeḛ sí ne mbɔr sí’g dəb.

⁷ Maji kar njemeeyèr uba goo rəw ləa ya̰ ləm, Maji kar dəw gə́ njera né kori-kori uba goo takə̰jije ləa ya̰ ləm tɔ, Maji karee tel ree rɔ Njesigənea̰’g Mbata yeḛ a koo kəmtondoo ləa ləm, Maji karee tel ree rɔ Ala’g lə sí Gə́ rəa asee dɔ meekoso lemsé’g el ləm tɔ.

⁸ Mbata takə̰jije ləm-ma lé D’asəna gə takə̰jije lə sí-seḭ el ləm, Rəw néraje lə sí-seḭ kara To d’asəna gə rəw néraje ləm-ma el ləm tɔ, Njesigənea̰ ɓa pa bèe.

⁹ To gə́ dara to ne əw gə naŋg bèe lé Togə́bè ɓa rəw néraje ləm-ma to ne əw Gə rəw néraje lə sí ləm, Takə̰jije ləm-ma kara D’ur dɔ ka̰ sí-seḭ’g bèe ləm tɔ.

¹⁰ To gə́ ndi gə ndi kwɔji d’ḭ dara dər dɔ naŋg neelé Ndá deḛ tel gogo Lal kar mán dee tən naŋg əsé D’ar dɔ naŋg maji əsé d’ar muje d’idi el ləm, Lal kar njedubu-né kandə nédubu el ləma, Lal kar yeḛ gə́ sɔ né nésɔ el ləm tɔ lé

¹¹ Togə́bè ɓa taje gə́ teḛ tam’g lé D’a tel ree rɔm’g Lal kar née teḛ el ləm, Lal ra né gə́ məəm ndigi el ləma, Lal ra torndum kar néje gə́ m’wɔji lé d’aw lée’g béréré el ləm tɔ.

¹² Oiyo, seḭ a kundaje loo teḛje gə rɔlel ləm, D’a kɔr no̰ sí gə meekulɔm ləm tɔ. Mbalje gə dɔdərlooje d’a kɔr ndu dee gə́ tar gə kalrɔ no̰ sí’g ləm, Kagje lai gə́ mee wala’g lé d’a kunda ji dee rag-rag ləm tɔ.

¹³ Kag-siprɛs ɓa a kuba tor kunje’g ləm, Mbəə ɓa a ra tɔg tor kun-pɔrɔrɔ’g ləm tɔ, Yee ɓa a to gə́ nérɔnduba mbata lə Njesigənea̰ ləm, As to nékolé-mee gə́ to gə no̰ gə́ a tuji el ləm tɔ.