Esai 47 - Maktub gə́ To gə Kəmee

Koso lə Babilɔnje

¹ Gə́ rəm si naŋg dan babur’g I ɓee gə́ Babilɔn Gə́ kédé to asəna gə ŋgoma̰də bèe! Gə́ rəm si dɔ naŋg’d lal kalimbai, I ɓee gə́ Kalde Gə́ to asəna gə ŋgon dené lé tɔ. D’a kooi asəna gə ŋgoma̰də Gə́ ma̰də yaa̰ gə njekərkəmloo el ŋga.

² Un mbal-kusu-kó, usu ne kó, Ɔr ta kubu gə́ dɔi’g ləm, Kə kubu ləi gə́ ŋgal yududu gə́ tar ləma, Ya̰ gɔli ur ne mán baaje ləm tɔ!

³ D’a kɔr kubu-kiya-meembaai ləm, D’a koo rɔkul ləi ləm tɔ. M’a ra né dal ne ba̰ ləm Ɓó m’a kɔr ne kəm dəw kára kara el.

⁴ Njekoga dɔ síjeḛ lé To yeḛ gə́ ria lə Njesigənea̰ gə́ njeboo-néje, Yeḛ to Njerɔkunda lə Israɛlje.

⁵ Seḭ Kaldeje gə́ toje asəna gə ŋgon gə́ dené bèe lé Sije naŋg gə ta sí mundu ləm, Awje dan loondul’g ləm tɔ, D’a ɓar sí mbai dɔ ɓeeko̰je el ŋga.

⁶ Ma m’ar məəm ḭ səm pu dɔ koso-dəwje’g ləm, M’ila ndɔl dɔ nédɔji’g ləm Ndá ma m’uba dee m’ya̰ dee meḛ jii’g, Nɛ seḭ arje meḛ sí aw taḭ-taḭ dɔ dee’g el ləm, Seḭ arje néməməna̰ lə sí wɔi gwɔb ɓuga’g ləm tɔ.

⁷ Seḭ paje pana: Seḭ a toje mbai dɔ ɓeeko̰je ya saar-saar! Seḭ ə̰jije meḛ sí’g to gə́ néje neelé Rudu dee a kun ɗiao bèe el ya saar.

⁸ Seḭ njékərkəmlooje lé Ɓasinè maji kar sí reeje ooje, Seḭ síje lɔm, Seḭ paje meḛ sí’g pajena: Seḭ nja gə kar sí Ɓó dəw gə́ raŋg kára kara godo, Seḭ nja gə́ kar sí ba ləm, Seḭ a síje gə́ njékəisiŋgaje nda̰ el ləma, A lalje ŋganje nda̰ el ləm tɔ.

⁹ Néje joo neelé d’a teḛ dɔ sí’g wai Gə́ mee ndəa gə́ kára ba ya Kar ŋganje lal sí ləm, Kar sí síje gə́ njékəisiŋgaje ləm tɔ. Lée némbeḛje lə sí gə́ bula əsé Nésukəmlooje lə sí gə́ bula yaa̰ kara Néje joo neelé d’a teḛ dɔ sí’g Mee ndɔ gə́ kára ba ya.

¹⁰ Seḭ ɔmje meḛ sí dɔ meeyèr’g lə sí, Seḭ pajena: Dəw kára kara oo sí el! Kəmkàr lə sí gə négər lə sí lé su kəm sí Ndá seḭ paje meḛ sí’g pajena: Seḭ nja gə kar sí ba Ɓó dəw gə́ raŋg kára kara godo, Seḭ nja gə́ kar sí ba!

¹¹ Meeko̰ a koso dɔ sí’g Lal kar sí gərje loo gə́ ḭ keneŋ, Tuji-boo a koso dɔ sí’g Kar né gə́ a kar sí teḛje ta’g godo, Nétujije d’a ɓugu na̰ dɔ sí’d gə́ léegəneeya Lal kar sí ooje rəbee.

¹² Maji kar sí síje dan nésukəmlooje’g lə sí Gə dan némbeḛje’g lə sí gə́ bula Gə́ seḭ ooje ne ndòo Mbata lə dee gə kas sí ba, Banelə seḭ a kiŋgaje némaji keneŋ, Banelə seḭ a tel toje ne dəwje gə́ to ɓəl kədm-kədm.

¹³ Seḭ gəŋgje ta njégosoje’g, Daoje ne dao-dao, Maji kar dee d’ḭtar ɓó gə́ d’aji sí, Deḛ gə́ gər néje gə́ dara ləm, Deḛ gə́ njétən-kéréméje ləma, Deḛ gə́ njépa ta néje gə́ d’a gə ree ləm tɔ!

¹⁴ Aa ooje, deḛ to d’asəna gə ləm mu Ndá pər a roo dee. Deḛ d’a kaskəm kaji rɔ dee Dan ndo̰ pər gə́ teḛ bilim-bilim’g el, A to gə́ kɔr pər gə́ dəw a ndibi el ləm, A to pər gə́ dəw a si ta’g el ləm tɔ.

¹⁵ Yee ɓa gə́ né gə́ a gə teḛ Dɔ deḛ gə́ seḭ gəŋgje ta dee’g ləm, Deḛ gə́ seḭ ooje ndòo mbata lə dee gə kas sí ba lé ləm tɔ, Deḛ kara d’a sanéna̰ kad-kad: Yeḛ gə́ kára kara gə́ a kaskəm kaji sí lé godo.