Esai 38 - Maktub gə́ To gə Kəmee

Rɔko̰ gə́ ra Ejekias gə kaji gə́ yeḛ aji

¹ Mee ndəa’g neelé Ejekias oso gə rɔko̰ gə́ as yoo. Njetegginta Esai, ŋgolə Amots aw rəa’g ulá pana: Njesigənea̰ pa togə́bè pana: Un ndui ar njémeekəije ləi mbata i a gə kwəi ɓó a gə si kəmba el ŋga.

² Yen ŋga Ejekias tel kəmee bir-bir gə́ gir tira’g ndá ra tamaji ta Njesigənea̰’g pana:

³ Ǝi Njesigənea̰, ar məəi olé dɔm’g to gə́ ma m’njaa nɔḭ’g gə ŋgonkoji gə meekarabasur ləm, m’ra néje gə́ maji kəmi’g ya ləm tɔ! Ndá Ejekias no̰ gə mán-no̰ kəmee’g ɓugudu-ɓugudu.

⁴ Togə́bè ɓa Njesigənea̰ ula Esai taje nee pana:

⁵ Aw ula Ejekias pana: Njesigənea̰, Ala lə bɔbije Dabid pa togə́bè pana: Neḛ n’oo tamaji ləi ya ləm, n’oo mán-no̰ gə́ to kəmi’g ya ləm tɔ. Aa oo, n’a gə kila ləbi dɔ maree’g as ləb dɔg-giree-mi ɓəi.

⁶ N’a kɔri-i ləm, gə ɓee-boo nee ləm tɔ ji mbai gə́ Asiri’g ləm, n’a kaḭ bada dɔ ɓee-boo’g neelé ya ləm tɔ.

⁷ Aa oo, né gə́ a kḭ rɔ Njesigənea̰’g mba tɔjii kari gər to gə́ Njesigənea̰ a kar taje gə́ yeḛ pa lé aw lée’g béréré lé ɓa to nee:

⁸ N’a kar ndil gə́ wɔji dɔ kɔs lə kàr loo-tila-gɔl lə Akas lé tel rəm gə́ gogo as dabla gɔl dəw gə́ tila dɔg. Ndá kàr lé rəm gə́ gogo as dabla gɔl dəw gə́ tila dɔg loo-tila-gɔl gə́ yee aw keneŋ gə́ kédé-kédé lé.

Pa gə́ Ejekias ɔs loo gə́ yeḛ iŋga lapia

⁹ Pakɔs lə Ejekias, mbai gə́ Juda gə́ wɔji dɔ rɔko̰ ləa ləm, gə tel gə́ yeḛ tel si gə́ majee ləm tɔ.

¹⁰ Ma m’pana: Loo gə́ m’isi lɔm dan mee ndɔje’g ləm ndá See kəm karm m’ḭ m’aw Tarəwɓeeje’g lə njé gə́ d’wəi Lal ne ges ləbje gə́ nai lé wa!

¹¹ Ma m’pana: M’a koo Njesigənea̰ Mee ɓee’g lə njé gə́ d’isi kəmba lé el ŋga ləm, M’a tel koo dəw kára kara Mbuna deḛ gə́ d’isi dɔ naŋg neelé el ŋga ləm tɔ.

¹² Kəi-sim lé d’un d’aw ne əw səm Asəna gə kəi-kubu lə njékulbadje bèe, Ma m’oo to gə́ kúla si kəmba ləm lé gaŋg Asəna gə kúla kubu Gə́ njekṵjee wa ta’g gaŋg bèe. Un kudee gə ndɔ saar loondul lé I a tɔl səm ŋgaŋ ndɔ ləm bém ya!

¹³ Ma m’ila məəm po̰ saar loo àr, Nɛ yeḛ təd siŋgamje lai to gə́ toboḭ bèe. Un kudee gə ndɔ saar loondul lé I a tɔl səm ŋgaŋ ndɔ ləm bém ya!

¹⁴ Ma m’no̰ njiriri-njiriri to gə́ ləbm-siri gə́ ḭ nar bèe ləm, Ma m’tuma̰ ŋgururu-ŋgururu to gə́ dərnda bèe ləm tɔ, M’un kəm gə́ dara nɛ kəm to bidig, Ǝi Njesigənea̰, m’isi dan néɓəŋgərə-ti’g, Taam ajim!

¹⁵ See m’a pa ban wa. Yeḛ ilam keneŋ ləm Am ne né gə́ m’kwɔiyee ləm tɔ. M’a njaa gə ŋgonkoji saar tɔl ne ŋgaŋ ləbje ləm Loo gə́ yeḛ ula kəm ndòo mba̰ lé.

¹⁶ Mbaidɔmbaije, mbɔl dɔ meemajije ləi ɓa Dəw si ne kəmba ləm, Mbɔl dɔ dee ɓa M’ila ne kəmə pugudu ɓəi ləm tɔ, I telm am m’isi ne kəmba gogo.

¹⁷ Aa oo, némeekonje ləm lé Tel to gə́ meekulɔm ləm, Gə mba kunda gə́ I undam dan kəmi’g lé ɓa I ɔrm ne dan bwa-tuji’g ya Mbata i ɔm kaiya ramje lai giri’g gogo.

¹⁸ Mbata loo-si njé gə́ d’wəi’g lé Dəw askəm pidii keneŋ el ləm, Nin dəwje kara D’askəm kunda no̰ rii el ləm tɔ, Deḛ gə́ d’aw mee bwa-dɔɓar’g lé D’ɔm meḛ dee dɔ ŋgonkoji’g ləi el ŋga.

¹⁹ Yeḛ gə́ aw kəmba nja kára ba Yeḛ nja ɓa askəm pidii To gə́ m’ra ɓogənè bèe. Bɔ-ŋganje ar ŋganeeje gər ŋgonkoji ləi.

²⁰ Njesigənea̰ ajim! Ndá j’a kar ndu nékimje lə sí gə́ ra gə kúla lé ɓar Mee kəi’g lə Njesigənea̰ Ndɔje lai gə́ j’isije ne kəmba.

²¹ Esai pa kédé pana: Maji kar dee ree gə kandə kodé gə́ loḭ d’ila ta doo’g lé. Yen ɓa Ejekias a tel si ne kəmba.

²² Mbata Ejekias dəjee pana: See nétɔji gə́ ban ɓa a kar neḛ n’gər to gə́ n’a kḭ kaw mee kəi’g lə Njesigənea̰ gogo lé wa.