Esai 35 - Maktub gə́ To gə Kəmee

Ndɔ kuga dɔ Israɛlje

¹ Dɔdilaloo gə ɓee gə́ tudu kurum-kurum d’a ra rɔlel, Ndag-mbo lé a si dan rɔlel’g ləm, A kidi lururu to gə́ pudu néje bèe ləm tɔ,

² Puduje d’a taa loo keneŋ pəl-pəl ləm, Dɔ naŋg lé a kal rəa ləm tɔ Gə pa boo-rɔlelje gə ndu kii kun baŋga, D’a kula rɔnduba lə Liba̰ dəa’g ləm, Gə boo-ronduba lə Karmel gə Saron ləm tɔ. Ndá d’a koo nérɔnduba lə Njesigənea̰ Gə boo-ronduba lə Ala lə sí tɔ.

³ Ji síje gə́ d’unda ndolè lé Ar deeje ɓar mèr-mèr ləm, Kəji sí gə́ unda bala lé kara Aarje ne tar jigiri ləm tɔ.

⁴ Ulaje deḛ gə́ meḛ dee to kəgəgə lé pajena: Waje diŋgam meḛ sí’g ɓó ɓəlje el, Aa ooje, Ala lə sí lé yeḛ a ree dal ba̰ lə sí Kuga ne dɔ ji deḛ gə́ ra sə sí majel, Yeḛ a ree gə rəa-yeḛ nja mba kaji sí.

⁵ Yen ɓa kəm njékəmtɔje a kinja ləm, Mbi njémbikuduje kara d’a kinja bərəŋ ləm tɔ,

⁶ Yen ɓa njémədje d’a tal jagəra-jagəra To gə́ arkas bèe ləm, Ndo̰ njégwɔskuduje kara D’a ɗila gə rɔlel ləm tɔ. Mbata manje d’a kuba tir-tir dɔdilaloo’g ləm, Kəm-rəw-manje d’a kula ndag-mbo’g yal-yal ləm tɔ.

⁷ Naŋgəra gə́ nuŋga kəd-kəd a tel to duu-mán Kar naŋg gə́ tudu kurum-kurum tel to ŋgira manje tɔ, Mee loo-si-kiya-rɔ lə tàlje lé Ko-ab gə ŋgawlal d’a kuba keneŋ.

⁸ Rəw gə́ kul yududu gə́ to rəw-kwɔi a to keneŋ Ndá d’a ɓaree rəw gə́ to gə kəmee, Dəw gə́ mina̰ kára kara a dəs keneŋ el, Rəbee a to mbata lə koso-dəwje lə Njesigənea̰, Deḛ gə́ d’a njaa keneŋ lé Lé to mbəje kara D’a kaskəm ndəm rəw el.

⁹ Rəbee neelé toboḭ a godo keneŋ, Da gə́ mḭ gə́ rara kara a njaa keneŋ el ləm, Dəw kára kara a kiŋga dee keneŋ el ləm tɔ, Nɛ deḛ gə́ d’uga dɔ dee ɓa d’a njaa keneŋ.

¹⁰ Deḛ gə́ Njesigənea̰ uga dɔ dee lé D’a tel ree, D’a kaw Sio̰ gə pa kun baŋga ta dee’g ləm, Rɔlel gə́ to gə no̰ a to dɔ dee’g ləm tɔ, Boo-rɔkal gə rɔlel lé d’a rəm pər ya Nɛ némeeko̰ gə tuma̰ ŋgururu-ŋgururu d’a godo tɔ.