Esai 26 - Maktub gə́ To gə Kəmee

Pa kun baŋga

¹ Mee ndəa’g neelé d’a kɔs pa nee mee ɓee gə́ Juda pana: Ɓee-boo lə sí lé siŋgá to yaa̰, Njesigənea̰ aa dɔ ndògo-bɔrɔ ləa ləm, Yee aa dɔ gadloo-kula-rɔ sí keneŋ ləm tɔ.

² Ɔrje tarəwje ilaje tag Arje ginkoji dəwje gə́ to njémeekarabasurje ləm, Gə majikojije ləm tɔ d’andə keneŋ.

³ Yeḛ gə́ aar njaŋg dɔ néje gə́ yeḛ wɔji ɔm ne mée dɔ’g lé I aree meekulɔm gə́ ɔr njal Mbata yeḛ ɔm mée jəb-jəb dɔi’g ya.

⁴ Ɔmje meḛ sí jəb-jəb dɔ Njesigənea̰’g saar-saar gə no̰ Oiyo! Ɔmje meḛ sí dɔ Njesigənea̰’g lé, Njesigənea̰ gə́ to kɔr mbal gə ləbee-ləbee gə no̰ lé.

⁵ Yeḛ tɔs dəwje gə́ d’isi dɔ mbalje’g tar lé tila dee ləm, Ɓee-boo gə́ to tar ur dɔ mareeje’g lé Yeḛ rəm səa ləm tɔ. Yeḛ aw səa aree oso naŋg ləm, Yeḛ aw səa saar ilá babur’g pal ləm tɔ.

⁶ Deḛ gə́ to njéndooje Gə deḛ gə́ siŋga dee godo lé D’a tuba ɓee-boo lé naŋg gə gɔl dee.

Tamaji gə́ ra rudu ndɔje’g

⁷ Rəw-kaw njemeekarabasur lé to danasur, I gə́ to njemeekarabasur lé I gɔl kila rəw lə njemeekarabasur aree asəna rai-rai.

⁸ Gelee gə́ nee ɓa, əi Njesigənea̰, Jeḛ ŋginai ne dɔ rəwta-gaŋgje’g ləi, Jeḛ ndiŋgaje rɔ sí gə mba ɓar rii ləm, J’ar meḛ sí olé ne dɔi’g ləm tɔ.

⁹ Loondul’g lé ma m’ndiŋgai ləm, Ma m’ndoli gə ŋgaw məəm bura ləm tɔ, Mbata loo gə́ rəwta-gaŋgje ləi taa dɔ naŋg nee pəl-pəl lé Ndá njé gə́ dɔ naŋg nee ndoo ne né gə́ danasur.

¹⁰ Njémeeyèrje lé ɓó lé dəw oo kəmtondoo lə dee ndá Deḛ ndoo rəw néra gə́ danasur el, Deḛ d’ya̰ rɔ dee yag dan néra gə́ majel’g Mee ɓee gə́ néra gə́ danasur to keneŋ tɔ ndá, Deḛ d’oo boo-ronduba lə Njesigənea̰ gə́ né el.

¹¹ Njesigənea̰, ji siŋgamoŋ ləi ɓar mèr-mèr ya Nɛ deḛ d’oo bèe el. D’a koo mal koso-dəwje ləi gə́ rai Ndá rɔ dee a kul ne, Pər a roo njéba̰je ləi dula-dula.

¹² Njesigənea̰, i ar sí j’isi lɔm, Mbata néje lai gə́ jeḛ n’ra lé I ɓa aree aw lée’g béréré ar sí.

¹³ Njesigənea̰, Ala lə sí, Ɓée síje gə́ raŋg d’o̰ ɓee dɔ sí’g ya Nɛ mbɔl dɔi-i nja kára ba ɓa Jeḛ m’ɓar ne rii.

¹⁴ Deḛ gə́ d’wəi lé D’a tel si kəmba gogo el ləm, Ndil deḛ gə́ d’wəi lé D’a kḭ tar el ləm tɔ, Mbata i ar bo̰ néra dee ɔs ta dee’g ləm, I tuji dee pugudu ləma, I tuji nékolé-mee dɔ’g lə deḛ lai ləm tɔ.

¹⁵ Ǝi Njesigənea̰, I ar bula lə koso-dəwje ḭ dɔ maree’d gə́ kédé-kédé, Ar bula lə koso-dəwje ḭ dɔ maree’d gə́ kédé-kédé, Riba ne dɔ rɔnduba ləi gə́ raga ləm, Ar rəw-nim-ɓee aw gə́ kédé ləm tɔ.

¹⁶ Njesigənea̰, loo gə́ d’isi dan néurti’g lé Deḛ ndolè gooi ləm Deḛ no̰ nɔḭ’g gə tamaji Loo gə́ i ar bo̰ néra dee ɔs ta dee’g ləm tɔ.

¹⁷ To gə́ dené gə́ aw gə kèm gə́ nai lam bèe karee oji ŋgon lé Tur rəa ləm, no̰ mbata ndóo gə́ tée ləm tɔ lé Ǝi Njesigənea̰, jeḛ gə́ j’isi ŋgərəŋ səi kara Jeḛ n’toje togə́bè tɔ.

¹⁸ Jeḛ n’taaje kèm ləm, ndóo ula sí ndubu ləm tɔ Nɛ loo gə́ j’ojije ndá j’ojije lel ba, Ɓee neelé aji sí el ləm, Dəwje gə́ mee ɓee’g kara d’oji ŋganje el ləm tɔ.

Njé gə́ d’wəi gə́ teḛ loo-yoo lé bo̰ néra dee a kɔs ta dee’g

¹⁹ Maji kar njé’g ləi gə́ d’wəi lé tel d’isi kəmba, Maji kar nin dəwje ləm d’ḭ tar! Ndelje dɔ ɓi’g, alje rɔ sí gə rɔlel, Seḭ gə́ rogoje babur’g! Mbata mán-tàl ləi to mán-tàl Gə́ ka̰ kar dəw si ne kəmba ləm, Naŋg a teḛ gə ndil njé gə́ d’wəi lé Kar dee d’isi kəmba gogo ləm tɔ.

²⁰ Koso-dəwje ləm, awje mee kəije’g lə sí Ndá uduje takəi dɔ sí’g, Iyaje rɔ sí waga Saar kar oŋg lə Njesigənea̰ dəs ɓa.

²¹ Mbata aa ooje, Njesigənea̰ ḭ loo-siée’g unda loo teḛ Mba gaŋgta dɔ dəwje gə́ dɔ naŋg nee Gə́ to njéra né kori-korije. Bèe ɓa naŋg a kinja gə məs gə́ ɔm dəa’g gə́ raga Ɓó yee a lɔm dɔ deḛ gə́ tɔl dee lé el ŋga.