Esai 25 - Maktub gə́ To gə Kəmee

Pa pidi Njesigənea̰

¹ Njesigənea̰, i lé to Ala ləm, M’a kɔs gajii kula ne rɔnduba dɔ rii’g Mbata i ra néje gə́ maji dum, Néje gə́ i wɔji-kwɔji ra kédé lé D’aw lée’g béréré ya.

² Mbata i ar ɓee-boo tel to To gə́ kɔr mbalje gə́ to dɔ na̰’d bèe ləm, Ɓee-boo gə́ siŋgá to lé I aree tel to loo-tuji ləm tɔ, Kəi-kaar-kɔgərɔ lə dəw-dɔ-ɓeeje kara tuji pugudu Askəm kar dee tel gɔlee gogo el ŋga.

³ Gelee gə́ bèe ɓa koso-dəwje gə́ to njésiŋgamoŋje D’ula ne rɔnduba dɔi’g ləm, Ɓee-booje lə ginkoji dəwje gə raŋg gə́ to njésiŋgamoŋje Ɓəli ne ləm tɔ.

⁴ Mbata kédé i to loo-kiya-rɔ Le yeḛ gə́ siŋgá godo ləm, Loo-kiya-rɔ lə njenékəmndoo Gə́ si dan néurti’g ləm, Gə néko̰-dɔ-loo loo gə́ lel-boo ula ləma, Gə ndil-ko̰-dɔ-loo loo gə́ kàr ɔs yaa̰ ləm tɔ, Mbata lel ta njékorè dɔ dəwje naŋg lé To asəna gə lel-mal gə́ unda ndògo-bɔrɔ naŋg bèe.

⁵ To gə́ i dum ne dɔ loo gə́ nuŋga kəd-kəd Dɔ naŋg gə́ taa pər làm-làm’g bèe lé I dum dɔ ndu dəw-dɔ-ɓeeje gə́ ɓar u-u-u ləm tɔ, To gə́ ndil kil-lə-ndi ar loo nuŋga godo ne bèe lé I ar pa kun baŋgaje lə njékorè dɔ dəwje naŋgje lé kara to togə́bè tɔ.

Muru-gad mbata koso-dəwje lai

⁶ Njesigənea̰ gə́ njeboo-néje gɔl muru-gad Gə́ wɔji dɔ nésɔje gə́ lel ləm, Gə mán-nduú gə́ àr ŋgad-ŋgad ləm tɔ Dɔ mbal’g neelé mbata koso-dəwje lai, To nésɔje gə́ lel gə́ to ubu yaa̰ ləm, Gə mán-nduú gə́ kuree əw Gə́ àr ŋgad-ŋgad ləm tɔ.

⁷ Ndá dɔ mbal’g neelé yeḛ a tuji kubu-kwa-ndòo Gə́ o̰ kəm dəwje lai lé pugudu ləm, Gə pal-kubu gə́ ɔn dɔ ginkoji dəwje gə raŋg lai lé ləm tɔ.

⁸ Yeḛ tuji yoo pugudu saar gə no̰, Mbaidɔmbaije gə́ Njesigənea̰ a bi mán-no̰ kəm dəwje’g lai ləm, Yeḛ a kar rɔkul-boo gə́ wa kəm koso-dəwje ləa lé Godo dɔ naŋg nee lai ləm tɔ, Mbata Njesigənea̰ ɓa pa bèe.

Rɔlel lə Israɛl gə nétuji lə Moab

⁹ Mee ndəa’g neelé d’a pana: Aa ooje, yeḛ nja ɓa to Ala lə sí Gə́ jeḛ j’ɔm meḛ sí dəa’g, Yeḛ nja ɓa aji sí, Njesigənea̰ ɓa jeḛ j’ɔm meḛ sí dəa’g ya, Ar sí j’isije dan boo-rɔkal’g J’alje ne rɔ sí gin kaji’g ləa!

¹⁰ Mbata ji Njesigənea̰ to dɔ mbal’g neelé, Ndá Moabje lé mbula dee naŋg To gə́ mbula ne mu gə siḭ néje dan mán’g bèe.

¹¹ Dan mán’g neelé deḛ teḛ ji dee keneŋ To gə́ njekalè mán teḛ ne jia Gə mba kalè ne mán bèe, Nɛ Njesigənea̰ tuji beelé lə dee Na̰’d gə goso kula gə́ ji dee ɓa ra lé.

¹² Yeḛ tɔs ndògo-bɔrɔ lə dee gə́ ŋgal lé tila naŋg Aree təd tel to nduji naŋg.