Esai 22 - Maktub gə́ To gə Kəmee

Ndərta gə́ pa wɔji dɔ Jerusalem

¹ Ndərta gə́ wɔji dɔ wəl-loo koo némḭdije. See ɗi rai ɓa dəwje ləi lai d’al ne dɔ kəije gə́ tar lé wa.

² Ɓee-boo kunda bula ləm, Dəwje d’aw dɔ na̰’d gə́ wur-wur ləma, To loo-rɔlel ləm tɔ! Dəwje ləi gə́ d’wəi lé D’a kwəi yoo-kiambas el ləm, D’a kwəi yoo-rɔ el ləm tɔ.

³ Mbaije ləi lai d’aḭ na̰’d Ndá njéɓandaŋje d’wa dee gə́ ɓər, Njé gə́ ləi lai gə́ d’aḭ d’aw kara Deḛ tel to gə́ ɓərje tɔ.

⁴ Yee gə́ bèe ɓa ma m’pa ne m’pana: Unje kəm sí dɔm’d gə́ raŋg, Ya̰’mje amje m’no̰ gə meeko̰, Saŋje loo gə mba gɔl məəm Wɔji dɔ tuji-boo gə́ teḛ dɔ ŋgon gə́ dené’g lə koso-dəwje ləm lé el.

⁵ Mbata to ndɔ mee pélé wəs-wəs Gə ndɔ tuba sí naŋg ras-ras Gə ndɔ rɔkul-boo Gə́ Mbaidɔmbaije gə́ Njesigənea̰ gə́ njeboo-néje Ula ne mee wəl-loo koo némḭdije’g. Deḛ tɔ ndògo-bɔrɔje pɔs-pɔs Ndá ndu kii lé ɓar par gə́ dɔ mbal’g.

⁶ Njé gə́ Elam d’odo ku ɓandaŋgje, Pusu lə njérɔje ləm, Gə njérɔ gə kundaje ləm tɔ ree ne, Njé gə́ Kir kara teḛ gə dərje lə dee gə́ raga tɔ.

⁷ Kəm wəl-looje ləi gə́ maji dum lé pusu-rɔje taa loo keneŋ pəl-pəl ləm, Njérɔ gə kundaje d’aar pèrèrè tarəwkɔgje’g ləi ləm tɔ.

⁸ Kəi-kaar-kɔgərɔ gə́ njekɔn dɔ Judaje lé təd rém-rém. Ndá mee ndəa’g neelé i aw tən nérɔje Gə́ d’iya dee mee kəije gə́ to mee kag-kɔr’g.

⁹ Seḭ ooje kəmbolèje bula Gə́ deḛ tɔs mbudu kaar ndògo-bɔrɔ lə ɓee-boo’g lə Dabid Ndá seḭ arje mán gə́ kəm bwa kəm-rəw-mán gə́ bər lé Mbo̰ na̰ loo kára ba tɔ.

¹⁰ Seḭ turaje kəije gə́ Jerusalem Ndá seḭ tɔ deeje pɔs-pɔs Gə mba kar siŋga ndògo-bɔrɔ lé To yaa̰ unda nje gə́ kédé.

¹¹ Seḭ uruje bwa kəm-rəw-mán kára Mbuna ndògo-bɔrɔje gə́ joo neelé Gə mba kar mán gə́ to mee bwa gə́ kédé lé Aḭ keneŋ.

¹² Mbaidɔmbaije gə́ Njesigənea̰ gə́ njeboo-néje Ɓar sí mee ndəa’g neelé Gə mba kar sí no̰je ləm, Gə kunda kaar sí ləm, Kar sí ndisaje dɔ sí ləma, Gə kulaje kubu-kwa-ndòo rɔ sí’g ləm tɔ.

¹³ Nɛ aa ooje, boo-rɔkal gə rɔlel to keneŋ! Deḛ tɔl maŋgje gə badje ləm, Deḛ d’usɔ da gə d’ai mán-nduú ləm tɔ Pa ne pana: Ar sí j’usɔje gə j’aije Mbata bèlè j’a gə kwəije!

¹⁴ Njesigənea̰ gə́ njeboo-néje riba dɔ ta nee Am m’oo pana: Tɔgərɔ ya, néra majel lə sí neelé Mee neḛ a koso lemsé dɔ’g el Saar a kwəije ne! Njesigənea̰ gə́ njeboo-néje ɓa pa bèe.

Ala a kar Eliakim taa tor Sebna

¹⁵ Mbaidɔmbaije gə́ Njesigənea̰ gə́ njeboo-néje pa togə́bè pana: M’aw rɔ Sebna’g, yeḛ gə́ to njeŋgəm néje gə njekaa dɔ kəi-mbai lé m’dəjee pana:

¹⁶ See ɗi ləi to loo gə́ nee’g wa. See dəw ləi to loo gə́ nee’g Ɓa i uru bwa-dɔɓar loo gə́ nee’g gə mbəa wa. Yeḛ uru bwa-dɔɓar dɔ loo gə́ tar ləm, Yeḛ sɔi loo-siée kaar mbal’g ləm tɔ.

¹⁷ Aa oo, ɓasinè Njesigənea̰ a kuni kilai gə siŋgamoŋ, Yeḛ a ɓiri na̰’d to gə́ kubu bèe.

¹⁸ D’a nduburi naŋg to gə́ d’ula ne gəbərə ndao Kəm dɔ naŋg gə́ tad’g bèe, Lée neelé ɓa i a kwəi keneŋ ləm, Lée neelé ɓa pusu-rɔje ləi gə́ maji dum lé d’a to keneŋ ləm tɔ. Ǝi, i gə́ to nérɔkul lə kəi lə ɓéije lé!

¹⁹ N’a tubai loo-kula’g ləi ləm, Neḛ Njesigənea̰ n’a kɔri loo-sii’g ləm tɔ.

²⁰ Mee ndəa’g neelé N’a ɓar Eliakim, ŋgolə Hilkija gə́ to kura lə neḛ,

²¹ N’a kula kubu ləi gə́ boi yul rəa’g ləm, N’a tɔ ndar ləi ɓəree’g ləm tɔ. Tɔɓəi n’a tel gə siŋgamoŋ ndukun ləi kɔm jia’g, Yeḛ a tel bɔ dəwje gə́ d’isi Jerusalem ləm, Gə gel-bɔje lə Juda ləm tɔ.

²² N’a karee nékɔr takəi lə Dabid, Loo gə́ yeḛ ɔr takəi ndá Dəw kára kara a kudu el ləm, Loo gə́ yeḛ udu ndá Dəw kára kara a kɔr el ləm tɔ.

²³ N’a ɓəree naŋg to gə́ kag-ŋgaolar Gə́ ɓəree loo gə́ kədərə’g bèe Ndá yeḛ a to gə́ loo-ronduba Mbata lə njémeekəije lə bɔbeeje.

²⁴ Rɔnduba lai gə́ wɔji dɔ njémeekəije lə bɔbeeje lé yeḛ ɓa a to njegədee, barkəm deeje gə́ maji gə deḛ gə́ maji sur el ləm, gə ŋgan nékulaje lai ləma, gə baije gə joje ləm tɔ.

²⁵ Njesigənea̰ gə́ njeboo-néje lé pana: Mee ndəa’g neelé kag-ŋgaolar gə́ ɓəree loo gə́ kədərə’g lé d’a kɔr ləm, d’a kunda təd karee oso naŋg ləma, nékodo gə́ wɔiee lé a tuji ləm tɔ mbata Njesigənea̰ ɓa pa bèe.