Esai 21 - Maktub gə́ To gə Kəmee

Ndərta gə́ pa wɔji dɔ Babilɔn

¹ Ndərta gə́ wɔji dɔ dɔdilaloo gə́ mbɔr baa-boo-kad’g. To gə́ lel-mal ḭ dɔ jikɔl ree ɓir bèe Ndá njeba̰ ḭ dɔdilaloo’d Gə́ to ɓee gə́ to ɓəl kədm-kədm.

² Némḭdi gə́ to ɓəl kədm-kədm inja kəm’g. Njekula kəm loo ndòo ula kəm loo ndòo ləm, Njetujiloo tuji loo ləm tɔ. Seḭje gə́ Elam, ɔrje rɔ rɔje! Seḭje gə́ Médi, aḭje dɔ ɓee-boo sub gə rɔ! M’a kar tuma̰ rɔ ŋgururu-ŋgururu lə dəwje godo lai.

³ Gelee gə́ nee ɓa némeekonje taa ne rɔm pəl-pəl, Ndóo teḛ dɔm’g wai To gə́ ndóo gə́ ula dené ndubu loo-koji-ŋgon’g bèe, Rɔko̰je gə́ ndaŋg dəw paḭ lé D’ɔgm dɔ koo ta’g ləm, Kunda bala tigi-tigi ɔgm koo loo ləm tɔ.

⁴ Ŋgaw məəm unda bala ləm, Ɓəl-boo taam loo ləm tɔ, Loondul gə́ to gə́ nérɔlel ləm lé Tel ɔm ɓəl ɓa dɔm’g.

⁵ Deḛ ra loo-nésɔ lə dee ləm, D’ɔm twaje naŋg ləma, Deḛ d’usɔ gə d’ai ləm tɔ. Seḭ mbaije, ḭje tar! Ubuje ubu dərje’g lə sí!

⁶ Mbata Mbaidɔmbaije ulam ta togə́bè pana: Maji kam m’aw m’unda njeŋgəmloo Gə mba karee ila mber né gə́ yeḛ a gə koo.

⁷ Yeḛ oo kudu njérɔ gə kundaje Gə́ d’wa na̰ joo-joo ləm, Gə njérɔje gə́ d’uba mulayḛ̀je-je ləma, Gə njé gə́ d’uba jambalje ləm tɔ, Ndá yeḛ si régégé tuga mbia.

⁸ Tɔɓəi yeḛ ra né wəl to gə́ toboḭ bèe pana: Neḛ n’aar dɔ kəi-kaar-kɔgərɔ’d Gə́ duu dɔ loo dan kàrá ləm, N’aar loo-ŋgəm-loo’g Loondul’g ləm tɔ.

⁹ Bèe ɓa aa oo, njérɔ gə kundaje Gə́ d’wa na̰ joo-joo lé d’isi ree! Deḛ d’un ta pa tɔɓəi pana: Babilɔn oso, yee oso ya. Ndá ndil néje gə́ to magəje ləa lé Toso naŋg təd njigi-njigi!

¹⁰ Ǝi dəwje ləm gə́ deḛ tal sí naŋg To gə́ tal ne kandə kó loo-kunda-kó’g bèe lé Ta gə́ ma m’oo ta Njesigənea̰ gə́ njeboo-néje’g Gə́ to Ala lə Israɛlje lé ɓa M’ula sí taree ya.

¹¹ Ndərta gə́ wɔji dɔ Duma. Dəw kára gə́ si Seir no̰ ɓarm dəjim pana: Njeŋgəmloo, see ta gə́ wɔji dɔ loondul to ban wa. Njeŋgəmloo, see ta gə́ wɔji dɔ loondul to ban wa.

¹² Njeŋgəmloo lé tel ilá keneŋ pana: Loo si àr ya Nɛ loo to bidig ɓəi. Ɓó lé seḭ ndigi dəjije ta ndá Gə́ dəjije ya, Waje ndòo rɔ sí ndá gə́ telje reeje.

¹³ Ndərta gə́ wɔji dɔ Arabi. Mee kag-kɔr gə́ Arabi ɓa Seḭ a toje keneŋ til’g nee Seḭ gə́ toje njékaw gə loo rab néndogoje gə́ ḭje Dedan lé.

¹⁴ Seḭ njé gə́ Tema lé Awje gə mán arje deḛ gə́ kunda tɔl dee ləm, Awje gə nésɔ arje deḛ gə́ d’ḭ no̰ njérɔje d’aḭ ləm tɔ.

¹⁵ Mbata deḛ d’aḭ no̰ kiambas’g, No̰ kiambasje gə́ tɔr sɔl dee’g ləm, Gə no̰ ɓandaŋg gə́ d’ɔr kagee léréré ləma, Gə no̰ rɔ gə́ nuŋga kəd-kəd’g ləm tɔ.

¹⁶ Mbata Mbaidɔmbaije ulam togə́bè pana: Ləb nai kára ɓəi asəna gə ləb lə njekula lar bèe ndá rɔnduba lə Kedar lai a godo.

¹⁷ Ges njérɔ gə ɓandaŋgje gə́ to njésiŋgamoŋje mbuna ŋgalə Kedar’g lé d’a nai jebəre ba mbata Njesigənea̰, Ala lə Israɛlje lé ɓa pa bèe.