Esai 16 - Maktub gə́ To gə Kəmee

Moabje dəji njé gə́ Jerusalem kar dee la sə dee

¹ Seḭje gə́ Moab, ulaje gə ŋgan badje Arje mbai gə́ Juda Gə́ si dɔ mbal gə́ Sio̰, Ar deeje d’ḭ sə dee Sela D’aw sə dee gə rəw gə́ dɔdilaloo’g.

² To gə́ yelje d’aḭ sanéna̰ pə ləm, Ŋgan yelje ɓəl mee kəi dee’g ləm tɔ lé Denéje gə́ Moab kara D’a to togə́bè loo-gaŋg-baa gə́ Arno̰ tɔ.

³ Maji kar sí wɔji síje ta kəmkàr ləm, Raje sə sí né gə́ to gə dɔ najee ləm, Loo gə́ kàr aar daŋdɔ lé Ɔmje ndil sí dɔ sí’g areeje to asəna gə loondul bèe ləm, Iyaje dɔ deḛ gə́ jeḛ n’korə deeje ləma, Maji kar sí unje dɔ njeteḛ ta-rɔ’g el ləm tɔ

⁴ Ya̰je loo arje Moabje gə́ tuba dee lé Ree d’isi mee ɓeeje’g lə sí ləm, Maji kar sí toje gə́ njo̰loo-kiya-rɔ lə dee No̰ njetujiloo’g ləm tɔ. Mbata nékəmndoo a godo ləm, Njetuji loo lé a kunda ŋgaŋ buguru ləma, Yeḛ gə́ njetuba ɓee gə gɔlee lé a sané pá ləm tɔ.

⁵ Meemaji ɓa a kar kalimbai to ne njaŋg, Yeḛ gə́ to ŋgonkoji gə́ a ree si dɔ’g lé A kḭ mbuna ŋgaka Dabidje’g lé ya. Yeḛ a to njegaŋ-rəwta Gə́ néra gə́ danasur wa mée ləm, Néra gə́ gə dɔ najee ɓa malee a rəa ŋgwɔd-ŋgwɔd ləm tɔ.

Njé gə́ Jerusalem d’as ra né kára kara mbata lə Moabje el

⁶ Jeḛ j’ooje sor beelé lə Moabje gə́ to beelé gə́ ur dɔ loo ləm, Gə kəsta, gə beelé, gə ti rɔ lə dee, Gə tapa deeje gə́ gə mḭdé-mḭdé ba ləm tɔ.

⁷ Gelee gə́ nee ɓa Moabje tuma̰ ne ŋgururu-ŋgururu dɔ rɔ dee’g, Ar dee-deḛ lai ya no̰ ne togə́bè tɔ. Seḭ imje rɔ sí dɔ tuji gə́ oso dɔ Kir-Hareset’g Areeje al dɔ sí sula.

⁸ Mbata loo-ndɔje gə́ Esbon tudu kurum-kurum, Mbai dɔ ginkoji dəwje gə raŋg tuji kag-nduúje gə́ to Sibma Gə́ d’aw saar teḛ Jajer ləm, Gə d’aw yo gə́ nee mee dɔdilaloo’g ləm tɔ. Barkəmeeje d’alé saar teḛ kel tura-baa-boo-kad’g nu.

⁹ Gelee gə́ nee ɓa ma m’no̰ ne Gə mba ndɔ-nduúje gə́ to Sibma To gə́ m’no̰ ne gə mba njé gə́ Jajer bèe tɔ, Ma m’ndəi mán-no̰ gə́ kəm’g dɔ sí-seḭ ɓeeje gə́ Esbon gə Eləalé Mbata lul njérɔje ɓar dɔ ndɔ kinja kó’g lə sí ləm, Gə dɔ kunda ka̰dee’g ləm tɔ.

¹⁰ Rɔlel gə kalrɔ godo mee ndɔje’g, Mee ndɔ-nduú’g lé pa gə kalrɔ godo keneŋ! Njembula kandə nduú lé mbula loo-mbula’g el ŋga, Ma m’ar ndu rɔlel godo.

¹¹ Gelee gə́ nee ɓa m’ra né məəm’g ŋgururu-ŋgururu Mbata Moab to gə́ kṵdu-ko̰dè bèe ləm, M’tuma̰ məəm’g ŋgururu-ŋgururu Mbata Kir-Harɛs ləm tɔ.

¹² D’oo Moabje gə́ d’aar jɔg rɔ dee dɔ looje gə́ ndəw’g, Deḛ d’andə loo’g lə deḛ gə́ to gə kəmee Gə mba ra tamaji nɛ Deḛ d’askəm kiŋga né kára kara keneŋ el.

¹³ Yee ɓa gə́ ta gə́ Njesigənea̰ pa ləw ba wɔji ne dɔ Moabje.

¹⁴ Nɛ ɓasinè Njesigənea̰ pa taje nee pana: Mee ləbje gə́ munda gə́ to gə́ ləbje lə njekula lar bèe lé ndá rɔnduba lə Moabje gə koso-dəwje lə dee gə́ bula digi-digi lé d’a tel to né gə́ to kḛji. Ges dee gə́ nai lé d’a tel to gə́ né el asəna gə né gə́ godo bèe ya.