Esai 15 - Maktub gə́ To gə Kəmee

No̰ ndòo lə Moabje

¹ Ndərta gə́ pa wɔji dɔ Moabje. Mee til gə́ kára gə́ ɓee-boo gə́ Ar-Moab tuji pugudu-pugudu lé Yee sané pá ləm, Mee til gə́ kára lé ɓee-boo gə́ Kir-Moab tuji pugudu-pugudu lé Yee sané pá ləm tɔ.

² D’aw mee kəi-pole-magə gə́ to Dibo̰ Dɔ looje gə́ ndəw’g gə mba no̰ keneŋ, Moabje no̰ tuma̰ ŋgururu-ŋgururu Mbata lə ɓee gə́ Nebo ləm, Gə mbata lə ɓee gə́ Médeba ləm tɔ, Deḛ ndisa dɔ deḛ lai ŋgori-ŋgori ləm, Deḛ tḭja mbaita dee bur-bur ləm tɔ.

³ Kila-rəwje ləa lai lé d’ula kubu-kwa-ndòo rɔ dee’g ɓa d’aw ne keneŋ, Nana kara no̰ tuma̰ ŋgururu-ŋgururu Gə mán-no̰ kəmee’g Dɔ kəije’g ləm, gə ndaa-looje’g ləm tɔ.

⁴ Njé gə́ Esbon gə njé gə́ Eləalé ra né wəl Ar dee d’oo ndu dee saar teḛ Jahas, Bao-rɔje gə́ Moab kara no̰ tuma̰ ŋgururu-ŋgururu Ar ɓəl ɔr siŋga dee ho̰d-ho̰d.

⁵ M’tuma̰ məəm’g ŋgururu-ŋgururu mbata lə Moabje, Mbata njéteḛ-ta rɔ’g pəd-pədje d’ḭ keneŋ D’aw njal teḛ Soar ləm, Saar teḛ Eglat-Selisija ləm tɔ, Mbata deḛ no̰ ta-ta d’un rəw Gə́ ḭ dən gə́ Luhit ləm, D’ɔr ndu dee no̰ wəl gə nékəmndoo Rəw gə́ aw Koronayim ləm tɔ.

⁶ Mbata manje gə́ Nimrim lé D’yi tə-tə ləm, Mu tudu kurum-kurum Ar mu gə́ təb gə́ idi lururu kara tuji pugudu ləm tɔ. Né gə́ to təb kára kara godo.

⁷ Gelee gə́ nee ɓa deḛ mbo̰ ne ges néje lə dee gə́ nai ləm, D’odo ne némajije lə dee d’aw ne kel tura-baa gə́ nu Loo gə́ kag-tuŋguje d’uba ta’g ləm tɔ.

⁸ Mbata ndu no̰je lé gugu dɔ rəw-nim-ɓeeje gə́ Moab sub, Ndu no̰ sii mbigi-mbigi lə dee ɓar saar teḛ Eglayim ləm, Ndu no̰ sii mbigi-mbigi lə dee ɓar saar teḛ Beer-Elim ləm tɔ.

⁹ Manje gə́ Dimo̰ lé məs taa pəl-pəl ləm, M’a kula gə nékəmndooje gə́ sigi dɔ Dimo̰’g ləma, M’a kula gə toboḭ karee twa Moabje gə́ nai Ges dee gə́ nai mee ɓee’g lé ləm tɔ.