Esai 10 - Maktub gə́ To gə Kəmee

Deḛ d’ar oŋg ḭ gə Njesigənea̰ pu

¹ Meeko̰ a koso dɔ deḛ gə́ To njékun ndukunje gə goo rəbee el ləm, Gə deḛ gə́ ndaŋg maktub-gaŋg-rəwta Gə́ gə dɔ najee el ləm tɔ.

² Yee ɓa deḛ mbad gaŋg ne rəwta Le njéndooje gə goo rəbee ləm, Né gə́ kəm kar deḛ gə́ kəm dee to ndòo Mbuna dəwje’g ləm d’iŋga lé Deḛ nar sə dee ləm, Deḛ taa nékiŋgaje lə njékəisiŋgaje ləma, D’unda ŋganalje gə́ néɓogo lə dee ləm tɔ.

³ See ɗi ɓa seḭ a raje gə rɔ sí Ndɔ gə́ bo̰ néra sí a kɔs ta sí’g Kar tuji gə́ a kḭ əw ree dɔ sí’g lé wa. See a kḭje kawje ra ɓa Gə mba kiŋga njela sə sí wa. See loo gə́ ra ɓa seḭ a kaw kɔmje nékiŋgaje lə sí keneŋ wa.

⁴ Njé gə́ na̰je d’a kwa koŋgoŋ Mbuna ɓərje’g ləm, Njé gə́ raŋg d’a toso naŋg Mbuna njé gə́ d’wəi’g ləm tɔ. Nɛ lé bèe kara oŋg ləa wəi bèm el ləm, Jia wɔi dɔ dee’g ndiŋ-ndiŋ ya ɓəi ləm tɔ.

Ndərta gə́ wɔji dɔ Asirije

⁵ Njesigənea̰ pana: Meeko̰ a koso dɔ Asirije’d Gə́ to ndəi gə́ wɔji dɔ oŋg ləm Ndəi gə́ to ji dee’g lé ɓa To nékula gə́ wɔji dɔ boo-oŋg ləm tɔ.

⁶ M’ula dee mba kar dee rɔ Gə ginkoji dəwje gə́ njéra né kori-korije ləm, Ma m’ar dee d’aw gə mba rɔ Gə koso-dəwje gə́ d’ar oŋg ḭ səm dɔ dee’g ləm tɔ, Gə mba kar dee d’unda dee banrɔ Taa ne nékiŋgaje lə dee ləm, Gə mba kar dee mbɔḭ dee naŋg to gə́ bɔrɔ Gə́ to kila-rəwje’g bèe ləm tɔ.

⁷ Nɛ deḛ d’wɔji meḛ dee’g togə́bè el ləm, Yee gə́ bèe ɓa gə́ takə̰ji lə dee el ləm tɔ, Deḛ d’wɔji meḛ dee’g mba tuji loo ləm, Gə mba kar ginkoji dəwje gə raŋg gə́ bula lé D’udu guduru ləm tɔ.

⁸ Mbata deḛ pana: See ɓé-njérɔje lə neḛje lé D’as gə mbaije el wa.

⁹ See né gə́ teḛ dɔ ɓee-boo gə́ Kalno lé Aw na̰’d kára ba gə né gə́ teḛ dɔ ɓee-boo Gə́ Karkəmis bèe el wa. See né gə́ teḛ dɔ ɓee-boo gə́ Amat lé Aw na̰’d kára ba gə né gə́ teḛ dɔ ɓee-boo Gə́ Arpad bèe el wa. See né gə́ teḛ dɔ ɓee-boo gə́ Damas lé Aw na̰’d kára ba gə né gə́ teḛ dɔ ɓee-boo Gə́ Samari el wa.

¹⁰ To gə́ neḛ n’waje ɓeeko̰je lə magəje Gə ji neḛje’g bèe Loo gə́ néndajije lə dee bula d’unda ka̰ njé gə́ Jerusalem gə Samari lé

¹¹ Né gə́ neḛ n’raje Gə njé gə́ Samari gə magəje lə dee lé See n’a raje togə́bè Gə njé gə́ Jerusalem gə néndajije lə dee bèe to el wa.

¹² Nɛ loo gə́ Mbaidɔmbaije a tɔl ŋgaŋ kula ləa bém dɔ mbal gə́ Sio̰ gə dɔ njé gə́ Jerusalem ndá yeḛ a kar bo̰ néra mbai gə́ Asiri ɔs təa’g mbata né beelé gə́ to dɔɓəŋgəree’g ləm, gə kəsta gə́ yeḛ ti ne rəa mugugu-mugugu ləm tɔ.

¹³ Mbata yeḛ pana: Gə goo siŋgamoŋ lə ji neḛ ɓa Neḛ n’ra ne né ləm, Gə goo kəmkàr lə neḛ ya, Mbata neḛ n’to njegosonégər ləm tɔ, Yee ɓa neḛ n’rəm ne gə rəw-nimje lə koso-dəwje ləm, N’taa ne nébaoje lə dee lé ləm tɔ. Tɔɓəi n’wa deḛ gə́ d’isi dɔ kalimbaije’g lé M’ɓugu dee naŋg Asəna gə bao-rɔ bèe.

¹⁴ Neḛ n’taa nébaoje lə koso-dəwje To gə́ dəw wa ne kəi-yel ɔr bèe ləm, To gə́ d’odo ne kaw gə́ yel uba ya̰ bèe ləm tɔ. Yee ɓa neḛ mbo̰ njé gə́ naŋg nee lai dɔ na̰’d, Ndá yel kára kara unda bagee el ləm, Teḛ təa el ləma, no̰ el ləm tɔ.

¹⁵ Tina lé see a ti rəa Dɔ njekunee ra ne kula’g wa. Esé see kuba a kəsta Dɔ njekunee tɔl ne né wa. A to kasəna gə ndəi Gə́ ar njekunee ra ne né ləm, A to kasəna gə kag-tɔs Gə́ ar njetɔsee gə́ to gə́ kag el lé Ra ne né ləm tɔ.

¹⁶ Gelee gə́ nee ɓa Mbaidɔmbaije, Gə́ to Mbaidɔmbaije gə́ njeboo-néje lé A kula gə né gə́ a kar njérɔje ləa Gə́ rɔ dee to kɔgərɔ-kɔgərɔ lé D’a kəŋg ne kəŋ-kəŋ, Tɔɓəi gin boo-ronduba ləa lé Né a nduba gə́ raga keneŋ To gə́ pər gə́ o̰ bèe.

¹⁷ Njesigənea̰ gə́ to lookàr lə Israɛlje lé A tel to pər, Njemeenda lə dee a tel to ndo̰ pər to Ndá yeḛ a roo kunje gə kun-pɔrɔrɔje ləa Mee ndɔ gə́ kára ba ya.

¹⁸ Maji lə kag-kɔr ləa gə ndɔje ləa lé Yeḛ a roo dee dula-dula. Karee to asəna gə njerɔko̰ gə́ oso rəb bèe.

¹⁹ Ges kagje gə́ nai mee kag-kɔr’g ləa lé D’a kaskəm tura dee Ndá ŋgon ya a k’as ndaŋg bula lə dee.

Ges Israɛlje gə́ nai lé

²⁰ Mee ndəa’g neelé ges Israɛlje gə́ to ŋgaka Jakob gə́ nai lé d’a kəw nduna rɔ dee rɔ yeḛ gə́ njekula kəm dee ndoo’g, d’a nduna rɔ dee gə meḛ dee bura rɔ Njesigənea̰ gə́ to Njerɔkunda lə Israɛlje lé.

²¹ Ges dee gə́ nai gə́ to ges njé gə́ lə Jakob lé d’a tel ree rɔ Ala gə́ njesiŋgamoŋ’d.

²² Ǝi Israɛl, ɓó lé koso-dəwje ləi d’a bula kasəna gə nagəra gə́ ta baa-boo-kad’g kara ges dee gə́ nai jebəre ba lé ɓa d’a tel ree ya. Tuji lé yeḛ wɔji njaŋg ya gə mba kar néra gə́ gə dɔ najee ɓa taa loo pəl-pəl ya.

²³ Tuji nee gə́ yeḛ wɔji njaŋg lé Mbaidɔmbaije gə́ to Njesigənea̰ gə́ njeboo-néje a karee aw lée’g béréré dɔ naŋg nee bura ya.

Ɓəlje Asirije el

²⁴ Nɛ lé togə́bè kara Mbaidɔmbaije gə́ to Njesigənea̰ gə́ njeboo-néje pa togə́bè pana: Ǝi dəwje ləm gə́ síje Sio̰, maji kar sí ɓəlje Asirije el! Deḛ kunda sí gə ndəi ləm, deḛ d’un kag-tɔs lə dee kunda sí ne to gə́ Ejiptəje ra ne kédé bèe lé ləm tɔ.

²⁵ Nɛ kuree a kəw waga ba ɓəi ndá bo̰ néra lé a godo tɔɓəi oŋg ləm a tel koso dɔ dee-deḛ’g gə mba tuji dee ne pugudu-pugudu.

²⁶ Njesigənea̰ gə́ njeboo-néje a kunda dee gə ndəi to gə́ yeḛ unda ne Madianje dɔ mbal gə́ Oreb. Tɔɓəi yeḛ a kula kag-tɔs ləa ndiŋ dɔ baa-boo-kad’g lé ndá yeḛ a kula gə́ tar to gə́ yeḛ ra ne mee ɓee gə́ Ejiptə bèe lé ya ɓəi tɔ.

²⁷ Mee ndəa’g neelé D’a taa nékodo lə dee gə́ wɔi dɔ tam sí’g ləm, D’a taa néməməna̰ lə dee gwɔb sí’g ləm tɔ, Ndá néməməna̰ lé a təd karee godo.

Njéba̰je d’unda dɔ Jerusalem dəb

²⁸ Deḛ d’aw teḛ Ajat ɓa dəs d’aw Migro̰ ɓəi Ndá d’ya̰ nékodoje lə dee Mikmas.

²⁹ Deḛ dəs mbuna looje’g Ndá to Geba tɔ, Njé gə́ Rama ndəb pəd-pəd ləm, Njé gə́ Gibea gə́ wɔji dɔ Sawul lé buŋga na̰ d’aḭ ləm tɔ.

³⁰ Seḭje gə́ Galim lé ilaje boo-ndu sí naŋg no̰je ne! Seḭ gə́ Layis lé undaje kəmkàr dɔ rɔ sí’g! Seḭje gə́ Anatot lé meeko̰ a koso dɔ sí’g.

³¹ Njé gə́ Madména d’aḭ sanéna̰ kad-kad ləm, Dəwje gə́ Gebim buŋga na̰ d’aḭ ləm tɔ.

³² Deḛ d’aar naŋg Nob as ndɔ kára Ndá deḛ sɔb ji dee ndaŋg ne mbal gə́ Sio̰ Gə́ to dɔdərloo gə́ Jerusalem lé.

³³ Aa ooje, Mbaidɔmbaije gə́ to Njesigənea̰ gə́ njeboo-néje lé Riba barkəm kagje gə siŋgamoŋgee: Njé gə́ boo d’ur dɔ mar deeje lé Yeḛ gaŋg dee ləm, Njé gə́ ŋgal d’unda mar deeje lé kara Yeḛ guru dee rug-rug ləm tɔ.

³⁴ Yeḛ tuga kagje gə́ ndər gə́ mee kag-kɔr’g lé gə tina Ndá njé gə́ Liba̰ d’oso gin njesiŋgamoŋ’d lé tɔ.