Ejekel 15 - Maktub gə́ To gə Kəmee

Kag-nduú gə́ d’ula pər lé

¹ Njesigənea̰ dəjim ta gə rɔtaje nee pana:

² Ma ŋgon-dəw lé nduú lé see kagee maji unda kagje gə́ raŋg wa. See barkəmeeje maji d’unda kagje gə́ mee kag-kɔr’g lé wa.

³ See dəw a tuga kagee ra ne kula wa. See dəw a tuga kagee tɔl təa kula kag-ndɔ naa̰ né keneŋ wa.

⁴ Aa oo, pər ɓa d’ilá keneŋ mba karee rée dula-dula, pər taa gelee’g ləm, gə dɔ telee’g ləm tɔ ar ŋgawdanee o̰ pər, see a maji kəm ra ne né ya ɓəi wa.

⁵ Aa oo, kédé gə́ to ne doŋgɔ lé ya yḛ̀ dəw ra ne né kára ŋga ɓa loo gə́ pər taa keneŋ rée dula-dula nee ɓa see d’a ra ne né wa.

⁶ Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: To gə́ kag-nduú gə́ to mbuna kagje’d gə́ mee kag-kɔr’g ɓa neḛ n’ilá pər’d n’aree roo dula-dula lé, togə́bè ɓa n’a ra gə njé gə́ Jerusalem bèe ya tɔ.

⁷ N’a tel gir neḛ kila k’ar dee, deḛ d’unda loo dan pər’d teḛ nɛ pər a roo dee dula-dula. Bèe ɓa seḭ a gərje ne to gə́ neḛ n’to Njesigənea̰ loo gə́ n’a tel gir neḛ kila k’ar dee lé.

⁸ N’a kar ɓee tel to dɔdilaloo mbata deḛ d’uba ndukun lə neḛ d’ya̰, Mbaidɔmbaije gə́ Njesigənea̰ ɓa pa bèe.