Amɔs 9 - Maktub gə́ To gə Kəmee

Némḭdi gə́ rudu

¹ Ma m’oo Mbaidɔmbaije gə́ aar tar mbɔr loo-nékinjaməs’g. Yeḛ pana: Maji kar dee kunda mburṵ dɔ gaji kagje gə́ tar kar no̰ tarəwkəije yə ləm, Maji kar dee təd dee dɔ dəwje’g lai ləm tɔ. N’a tuji ges deḛ gə́ nai gə kiambas. Dəw kára kara mbuna dee’g a kaskəm kaḭ kaji rəa el ləm, Dəw kára kara mbuna dee’g a teḛ kaḭ taa rəa el ləm tɔ.

² Ɓó lé d’aw njal teḛ ne loo gə́ lə njé gə́ d’wəi’g ndá Ji neḛ a kwa dee wɔgədɔ kɔr dee ya ləm, Ɓó lé d’ḭ d’aw mee dara’g kara N’a kar dee rəm d’uru naŋg ya ləm tɔ.

³ Ɓó lé d’iya rɔ dee dɔ sém mbal gə́ Karmel ndá N’a saŋg dee keneŋ kwa dee ya ləm, Lé d’aḭ d’iya rɔ dee kəm neḛ’g gin baa-boo-kad’g kara Lée neelé ɓa n’a kun ndu neḛ kar li to̰ dee keneŋ ya ləm tɔ.

⁴ Ɓó lé d’aw gə́ ɓərje ɓee lə njéba̰je lə dee lé Ndá lé neelé ɓa n’a kun ndu neḛ Kar kiambas tɔl dee keneŋ ləm, N’a kun kəm neḛ dɔ dee’g rəw Mba ra sə dee né gə́ majel ɓó né gə́ maji ɓa el ləm tɔ.

⁵ Mbaidɔmbaije gə́ Njesigənea̰ gə́ njeboo-néje lé Ɔrɔ dɔ naŋg aree yə ɓugu-ɓugu ləm, Dəwje lai-lai gə́ d’isi keneŋ lé D’isi dan kəmndooyoo’g ya ləm tɔ. Naŋg ḭ bura asəna gə baa bèe ləm, Yee rəm asəna gə baa gə́ Ejiptə bèe ləm tɔ.

⁶ Yeḛ ra loo-siée mee dara’g ndá Yeḛ tum ginee aree ree njal uru naŋg jigi, Yeḛ ɓar manje mee baa-boo-kad’g Ar dee d’ər dɔ naŋg nee ya tɔ. Njesigənea̰ ɓa gə́ ria.

Ta gə́ gaŋg dɔ deḛ gə́ ta wa dɔ dee’g

⁷ Njesigənea̰ pa togə́bè pana: Seḭ Israɛlje lé See seḭ toje asjena gə Etiopije mbata lə neḛ el wa. See neḛ ɓa n’ar Israɛlje d’unda loo mee ɓee gə́ Ejiptə teḛ el wa To gə́ neḛ ɓa n’ar Pilistije d’unda loo mee ɓee gə́ Kaptɔr teḛ ləm, N’ar Aramje d’unda loo mee ɓee gə́ Kir teḛ ləm tɔ el wa.

⁸ Aa ooje, Mbaidɔmbaije gə́ Njesigənea̰ lé Kəmee to dɔ ɓeeko̰ gə́ ta wa dəa’g. N’a gə tujee pugudu Karee godo dɔ naŋg nee péd-péd ya, Nɛ lé bèe kara n’a tuji gel-bɔje lə Jakob bura el, Njesigənea̰ ɓa pa bèe.

⁹ Mbata aa ooje, n’a kun ndu neḛ ndá D’a yə gel-bɔje lə Israɛl mbuna ginkoji dəwje gə raŋg’g lai, To gə́ deḛ gɔl ne né gə san bèe Lal kar guburee kára kara oso naŋg.

¹⁰ Njékaiyaje lai mbuna koso-dəwje’g lə neḛ lé D’a kwəi yoo-kiambas, Deḛ gə́ pa pana: Némajel a tibi mbɔr neḛje el ləm, A teḛ dɔ neḛje’g el ləm tɔ lé.

Ndukun gə́ wɔji dɔ tel gɔl Israɛlje gogo lé

¹¹ Mee ndəa’g neelé n’a kun ɓeeko̰ lə Dabid Gə́ to asəna gə kəi gə́ oso lé Kuree tar lée’g gogo ləm, N’a gɔl kəmee gə́ ta̰ ləm, N’a gɔl néje gə́ tuji keneŋ Kunda dee tar lée’g ɗaŋg ləma, N’a rəa sigi to gə́ to ne keneŋ ləw lé ləm tɔ.

¹² Mba kar dee dum dɔ ges Edɔmje gə́ nai ləm, Gə dɔ ginkoji dəwje gə raŋg lai Gə́ ɓar ri neḛ dɔ dee’g ləm tɔ lé Njesigənea̰ gə́ a gə kar néje neelé aw lée’g béréré ɓa pa bèe.

¹³ Njesigənea̰ pa pana: Aa ooje, mee ndəaje gə́ a gə teḛ lé Njendɔ lé a korè goo njekinjako dəb ləm, Yeḛ gə́ njembula kandə nduú A korè goo njedubu né ləma, Man-nduú gə́ ḭ əməmə lé A kḭ dɔ sém mbalje gə́ tar léŋgé-léŋgé’g Kula dɔdərlooje’g lai ləm tɔ.

¹⁴ N’a tel gə koso-dəwje lə neḛ gə́ Israɛl Gə́ d’wa dee gə́ ɓərje lé ree sə dee ɓée ləm, Ɓeeje lə dee gə́ tuji ləw lé D’a tel ra gogo mba kisi keneŋ ləm, D’a ma̰a nduúje ndá d’a kai mán dee ləma, D’a ra loo-kamnaḭje ndá d’a sɔ kandə dee ləm tɔ.

¹⁵ N’a ma̰a dee mee ɓee’g lə dee ndá Dəw a kɔr dee mee ɓee gə́ neḛ nja n’ar dee Mba kaw sə dee raŋg el ŋga, Njesigənea̰, Ala ɓa pa bèe.