زبور 98 - Sindhi Bible

¹ خداوند جي حضور ۾ نئون گيت ڳايو؛ ڇو جو هن عجيب ڪم ڪيا آهن: هن جي ساڄي هٿ ۽ پاڪ ٻانهن هنجي لاءِ فتح حاصل ڪئي آهي.

² خداوند پنهنجي نجات پڌري ڪئي آهي: ۽ پنهنجي راستبازي قومن جي سامهون ظاهر ڪري ڏيکاري اٿس.

³ هن اسرائيل جي گهراڻي لاءِ پنهنجو رحم ۽ پنهنجي وفاداري ياد ڪئي آهي: ۽ زمين جي سڀني ڇيڙن اسان جي خدا جي نجات ڏٺي آهي.

⁴ اي زمين جا سڀ رهاڪو خداوند جي حضور ۾ خوشيءَ جو آواز ڪريو: شوق سان خوشيءَ جا گيت ۽ تعريف ڳايو.

⁵ بربط وڄائي خداوند جي تعريف ڳايو؛ هائو بربط وڄائي مٺي آواز سان ڳايو.

⁶ بادشاهہ، يعني خداوند جي حضور ۾، تري ۽ شرنائي وڄائي خوشيءَ جو آواز ڪريو.

⁷ سمنڊ ۽ انهي جي معموري گجگوڙ ڪري: جهان ۽ سندس سڀ رهاڪو بہ ائين ئي ڪن.

⁸ ڀلي تہ سيلاب تاڙيون وڄائين؛ ۽ جبل خوشيءَ وچان خداوند جي حضور ۾ گڏجي گيت ڳائين:

⁹ خداوند جي حضور، ڇو جو هو زمين جي رهاڪن جي عدالت ڪرڻ ٿو اچي: هو راستيءَ سان جهان جي، ۽ سچائيءَ سان قومن جي عدالت ڪندو.