زبور 94 - Sindhi Bible

¹ اي خداوند، اي انتقام وٺڻ وارا خدا! اي خدا، جنهن جو ڪم بدلو وٺڻ آهي، پنهنجو جلوو ڏيکار.

² اي جهان جا انصاف ڪرڻ وارا اُٿ: مغرورن کي بدلو ڏي.

³ اي خداوند بڇڙا ماڻهو ڪيستائين، هائو ڪيستائين، پاڻ کي پڏائيندا؟

⁴ اهي بڪ بڪ ٿا ڪن، ۽ مغروريءَ سان ٿا ڳالهائين: ۽ سڀ خطاڪار ٻٽاڪون پيا هڻن.

⁵ اي خداوند اهي تنهنجيءَ اُمت کي پيڙين ٿا، ۽ تنهنجيءَ ميراث کي ڏکوئين ٿا.

⁶ اهي بيوہ زالن ۽ پرديسين کي قتل ٿا ڪن، ۽ يتيمن جو خون ٿا ڪن.

⁷ ۽ چون ٿا تہ خداوند ڏسندو ئي ڪين، يعقوب جو خدا خيال ڪونہ ڪندو.

⁸ اوهين جي اُمت ۾ وحشي آهيو سي ويچار ڪريو؛ ۽ اي بيوقوفو اوهين ڪڏهن سياڻا ٿيندا؟

⁹ جنهن ڪن جوڙيو آهي سو نہ ٻڌندو ڇا؟ جنهن اک جوڙي آهي سو ڪين ڏسندو ڇا؟

¹⁰ هو جو قومن کي سيکت ٿو ڏئي، ۽ ماڻهن کي علم ٿو سيکاري، سو سزا ڪين ڏيندو ڇا؟

¹¹ خداوند انسان جا خيال ڄاڻي ٿو، تہ اُهي اجايا آهن.

¹² اي خداوند مبارڪ آهي اُهو ماڻهو جنهن کي تون سيکت ٿو ڏين، ۽ پنهنجي شريعت ٿو سيکارين؛

¹³ انهيءَ لاءِ تہ تون کيس مصيبت جي ڏينهن کان آرام بخشين، جيسين ڪ بڇڙي جي قبر کوٽجي.

¹⁴ ڇالاءِ جو خداوند پنهنجي اُمت کي ڪڍي ڪين ڇڏيندو، نڪي پنهنجي ميراث کي ڇڏي ڏيندو.

¹⁵ ڇو تہ انصاف سچائيءَ ڏانهن موٽندو: ۽ سڀ سچيءَ دل وارا انهيءَ جي پيروي ڪندا.

¹⁶ منهنجي بدران ڪير بدڪارن جي برخلاف کڙو ٿيندو؟ ۽ ڪير منهنجي لاءِ خطاڪارن جي سامهون ٿيندو؟

¹⁷ جيڪڏهن خداوند منهنجو مددگار نہ هجي ها، تہ منهنجي جان جلد ئي خاموش ٿي وڃي ها.

¹⁸ اي خداوند جنهن مهل مون چيو تہ منهنجو پير ترڪي ٿو؛ تنهن مهل تنهنجي رحم مون کي سنڀالي ورتو.

¹⁹ جڏهن منهنجي دل ۾ گهڻو فڪر ٿو ٿئي، تڏهن تنهنجي دلاسي جي ڪري منهنجي جان خوش ٿي ٿئي.

²⁰ بڇڙائيءَ جي تخت سان، جو ٺڳيءَ جا قانون ٿو جوڙي، تنهنجو ڪو رشتو ٿيندو ڇا؟

²¹ اهي راستباز جي جان وٺڻ لاءِ گڏ ٿا ٿين، ۽ بيگناهہ کي ڏوهاري ٿا ٺهرائين.

²² پر خداوند منهنجو اوچو ٺلهہ آهي؛ ۽ منهنجو خدا منهنجي پناهہ جو ٽڪر آهي.

²³ هن انهن کي سندن خطائن جو بدلو ڏنو، ۽ کين سندن بڇڙائيءَ ۾ تباهہ ڪندو؛ خداوند اسان جو خدا انهن کي تباهہ ڪري ڇڏيندو.