زبور 86 - Sindhi Bible

¹ اي خداوند ڪن لائي مون کي جواب ڏي؛ ڇالاءِ جو آءٌ غريب ۽ محتاج آهيان.

² منهنجيءَ جان کي سنڀال، ڇو جو آءٌ ديندار آهيان: اي منهنجا خدا پنهنجي بندي کي بچاءِ جنهن جو ڀروسو توتي ئي آهي.

³ اي خداوند مون تي رحم ڪر؛ ڇو جو آءٌ سڄو ڏينهن توکي پيو پڪاريان.

⁴ اي خداوند پنهنجي بندي جي جان کي خوش ڪر؛ ڇو جو اي خداوند، آءٌ پنهنجي جان کي تو ڏانهن رجوع ٿو ڪريان.

⁵ ڇو جو تون اي خداوند نيڪ آهين، ۽ معاف ڪرڻ لاءِ تيار آهين ۽ جيڪي توکي پڪارين ٿا تن تي تون ڏاڍو رحيم آهين.

⁶ اي خداوند، منهنجي دعا ڏانهن ڪن ڏي؛ ۽ منهنجي عرض جو آواز ٻڌ.

⁷ آءٌ پنهنجيءَ مصيبت جي ڏينهن توکي پڪاريندس؛ ڇو تہ تون منهنجي اونائيندين.

⁸ اي خداوند، معبودن ۾ ٻيو تو جهڙو ڪونهي؛ نڪي تنهنجي ڪمن جهڙا ڪنهن ٻئي جا ڪم آهن.

⁹ اي خداوند جيڪي قومون تو پيدا ڪيون آهن سي سڀ اچي تنهنجي حضور ۾ سجدو ڪنديون؛ ۽ تنهنجي نالي جي تمجيد ڪنديون.

¹⁰ ڇو جو تون عظيم آهين، ۽ عجيب ڪم ٿو ڪرين: فقط تون ئي خدا آهين.

¹¹ اي خداوند مون کي پنهنجي واٽ سيکار؛ آءٌ تنهنجي سچائيءَ تي هلندس. منهنجي دل هڪ پاسي ڪر تہ تنهنجي نالي کان ڊڄندو رهان.

¹² اي خداوند منهنجا خدا، آءٌ پنهنجي سڄيءَ دل سان تنهنجي تعريف ڪندس؛ ۽ هميشہ تائين تنهنجي نالي جي تمجيد ڪندو رهندس.

¹³ ڇو جو مون تي تنهنجي گهڻي ٻاجهہ آهي؛ تو منهنجي جان کي اوڙاهہ جي تري مان ڪڍيو آهي.

¹⁴ اي خدا مغرور منهنجي برخلاف کڙا ٿيا آهن، ۽ ظالمن جي جماعت منهنجي جان جي پٺيان پيئي آهي، ۽ توکي پنهنجي سامهون نہ رکيو اٿن.

¹⁵ پر اي خداوند تون رحيم ۽ ڪريم خدا آهين، تون غصي ڪرڻ ۾ ڍرو، ۽ رحم ۽ سچائيءَ سان ڀرپور آهين.

¹⁶ مون ڏانهن ڦري نگاهہ ڪر، ۽ مون تي رحم ڪر؛ پنهنجي بندي کي پنهنجي طاقت ڏي، ۽ پنهنجيءَ ٻانهيءَ جي پٽ کي بچاءِ.

¹⁷ اي خداوند مون کي ڀلائيءَ جو ڪو نشان ڏيکار؛ تہ جن کي مون سان نفرت ۽ عداوت آهي سي اهو ڏسي شرمندا ٿين، ڇو جو تو منهنجي مدد ڪئي آهي، ۽ مون کي دلاسو ڏنو اٿيئي.