زبور 64 - Sindhi Bible

¹ اي خدا منهنجي فرياد جو آواز ٻڌ: دشمن جي ڊپ کان منهنجي جان بچاءِ.

² بدڪارن جي ڳجهيءَ صلاح کان، ۽ خطاڪارن جي فساد کان مون کي لڪائي ڇڏ:

³ جن پنهنجي زبان ترار جهڙي تکي ڪئي آهي، ۽ پنهنجن سخت لفظن جا تير هڻڻ لاءِ ڪمانون ڪشيون آهن.

⁴ تہ ڪامل ماڻهوءَ کي لڪي تير هڻن، اهي اوچتا تير ٿا هڻن ۽ ڊڄن نٿا.

⁵ اهي بڇڙي ڪم ڪرڻ لاءِ پاڻ کي همتائين ٿا؛ ۽ ڳجهيءَ طرح ڦندي وجهڻ لاءِ منصوبو ٿا ڪن.

⁶ اهي بڇڙايون ڳولي ٿا ڪڍن؛ ۽ چون ٿا تہ اسان هڪڙي پڪي رٿ ڳولي آهي: انهن جا اندريان خيال ۽ دل ٻئي اونها آهن.

⁷ پر خدا انهن کي تير هڻندو؛ ۽ اهي اوچتو ڦٽجي پوندا.

⁸ اهي پنهنجي زبان جي ڪري پاڻ ڌڪو کائيندا: ۽ جيڪي کين ڏسندا سي سڀ ڪنڌ ڌوڻيندا.

⁹ ۽ سڀ ماڻهو ڊڄندا؛ ۽ خدا جي ڪمن جو بيان ڪندا، ۽ هن جي ڪمن کي چڱيءَ طرح سمجهندا.

¹⁰ راستباز ماڻهو خداوند ۾ خوشيون ڪندا، ۽ مٿس ڀروسو رکندا؛ ۽ جيڪي دل جا سچار آهن سي سڀ فخر ڪندا.