زبور 48 - Sindhi Bible

¹ اسان جي خدا جي شهر ۾، ۽ پنهنجي پاڪ جبل تي، خداوند عظيم آهي، ۽ وڏيءَ تعريف جي لائق آهي.

² اُتر پاسي صيون جبل، جو وڏي بادشاهہ جو شهر آهي، سو بلند، خوشنما ۽ ساريءَ زمين جي خوشي جو سبب آهي.

³ انهيءَ جي محلاتن ۾ خدا هيءَ ڳالهہ ظاهر ڪئي آهي، تہ آءٌ پناهہ آهيان.

⁴ ڇالاءِ جو ڏس بادشاهہ گڏ ٿيا، اهي گڏجي لنگهي ويا.

⁵ اُهي ڏسي حيران ٿي ويا، اهي ڊڄي ڀڄي ويا.

⁶ اتي هو ڏڪڻ لڳا، ۽ ويم واريءَ زال جهڙا سور اچي ٿين.

⁷ تون اڀرندي جي هوا سان ترسيس جي جهازن کي ڀڃيو ڇڏين.

⁸ جيئن اسان ٻڌو هو، تيئن ئي لشڪرن جي خداوند جي شهر ۾، يعني اسان جي خدا جي شهر ۾ ڏٺو اٿئون: خدا انهي کي هميشہ تائين قائم رکندو.

⁹ اي خدا اسان تنهنجيءَ هيڪل ۾، تنهنجيءَ ٻاجهہ تي غور ڪيو آهي.

¹⁰ اي خداوند جهڙو تنهنجو نالو آهي، تهڙي ئي تنهنجي تعريف زمين جي ڇيڙي تائين پيئي ٿئي: تنهنجو ساڄو هٿ سچائيءَ سان ڀرپور آهي.

¹¹ تنهنجن فيصلن جي ڪري ڀلي تہ صيون جبل خوشيون ڪري، ۽ يهوداهہ جون ڌيئرون خوش ٿين.

¹² صيون جي آس پاس گهمو، ۽ ان جي چوڌاري ڦري ڏسو، ۽ سندس ٺلهہ ڳڻيو.

¹³ اوهين انهي جي ڪوٽ جي ڀت کي جاچي ڏسو، ۽ انهيءَ جي محلاتن تي غور ڪريو تہ اوهين پنهنجن پويَن کي اها ڳالهہ ٻڌايو.

¹⁴ ڇو تہ هي خدا هميشہ تائين اسان جو خدا آهي: هو موت تائين اسان جو سونهون ٿيندو.