زبور 29 - Sindhi Bible

¹ اوهين جي طاقتور آهيو، خداوند جي جلال ۽ تعظيم جي تعريف ڪريو.

² خداوند جي اهڙي تعريف ڪريو جا سندس نالي جي لائق آهي؛ پاڪيزگيءَ جي جمال سان خداوند جي عبادت ڪريو.

³ خداوند جو آواز پاڻين تي آهي: جلال وارو خدا گجڪار ٿو ڪري، هائو خداوند گهڻن پاڻين تي گجڪار ٿو ڪري.

⁴ خداوند جو آواز قدرت وارو آهي؛ خداوند جو آواز شاهي شان وارو آهي.

⁵ خدا جو آواز ديودارن کي ڀڃي ٿو؛ هائو، لبنان جي ديودارن کي ڀڃي ٽڪر ٽڪر ٿو ڪري.

⁶ هو اُنهن کي گابي وانگر ٿو ڪُڏائي؛ ۽ لبنان ۽ سريون کي جهنگلي پاڏي وانگر ٽپا ٿو ڏياري.

⁷ خداوند جو آواز باهہ جي شعلن کي چيري ٿو.

⁸ خداوند جو آواز بيابان کي لوڏي ٿو؛ خداوند قاديس جي بيابان کي لوڏي ٿو ڇڏي.

⁹ خداوند جي آواز ڪري هرڻين جا پيٽ ڪريو پون، ۽ ٻيلن جا وڻ ٻٽا ٿيو پون: ۽ هن جي هيڪل ۾ سڀڪو جلال ئي جلال پيو پڪاري.

¹⁰ خداوند ٻوڏ جي وقت تخت نشين هو؛ هائو خداوند هميشہ جي لاءِ تخت نشين آهي.

¹¹ خداوند پنهنجيءَ اُمت کي طاقت ڏيندو؛ خداوند پنهنجيءَ اُمت کي سلامتيءَ جي برڪت ڏيندو.