زبور 147 - Sindhi Bible

¹ اوهين خداوند جي تعريف ڪريو؛ ڇو جو اسان جي خدا جي لاءِ تعريف ڳائڻ چڱو ۽ دلپسند ڪم آهي؛ تعريف ڪرڻ چڱي ڳالهہ آهي.

² خداوند پاڻ يروشلم کي اڏيو آهي؛ هو اسرائيل جي دربدر ٿيلن کي گڏ ٿو ڪري.

³ هو دل شڪستن کي شفا ٿو ڏئي، ۽ سندن زخمن کي پٽيون ٿو ٻڌي.

⁴ هو تارن جو شمار ٿو ڪري، ۽ انهن سڀني تي نالا ٿو رکي.

⁵ اسان جو خداوند عظيم آهي، ۽ وڏي قدرت وارو آهي؛ هن جي سمجهہ بيحد آهي.

⁶ خداوند نماڻن کي سنڀالي ٿو: ۽ بڇڙن کي پٽ سان ٿو هڻي.

⁷ خداوند جي حضور ۾ شڪرگذاريءَ سان ڳايو؛ اسان جي خدا جي حضور ۾ بربط وڄائي تعريف ڳايو:

⁸ جو آسمان کي ڪڪرن سان ڍڪي ٿو، جو زمين لاءِ مينهن تيار ٿو ڪري، ۽ جبلن تي گاهہ ٿو اُڀرائي.

⁹ هو جانورن کي، ۽ ڪانگن جي ٻچن کي جي پڪارين ٿا، کاڌو ٿو ڏئي.

¹⁰ هو گهوڙن جي طاقت مان خوش نٿو ٿئي: نڪي ماڻهن جي ڄنگهن کان راضي ٿو ٿئي.

¹¹ خداوند انهن کان راضي ٿو ٿئي جيڪي کانئس ڊڄن ٿا، ۽ سندس رحم تي اُميد ٿا رکن.

¹² اي يروشلم خداوند جي تعريف ڪر؛ اي صيون پنهنجي خدا جي تعريف ڪر.

¹³ ڇو جو هن تنهنجي دروازن جون تاڙيون مضبوط ڪيون آهن، ۽ تو منجهہ تنهنجي اولاد کي برڪت ڏني اٿس.

¹⁴ هو تنهنجين سرحدن ۾ سلامتي ٿو آڻي؛ ۽ توکي تمام عمدي ڪڻڪ سان ڀرپور ٿو ڪري.

¹⁵ هو پنهنجو حڪم زمين تي موڪلي ٿو، انجو ڪلام گهڻو تيز رفتار آهي.

¹⁶ هو پشم وانگي برف ٿو ڏئي؛ ۽ رک وانگيان پارو ٿو پکيڙي.

¹⁷ هو لقمن وانگي برف ٿو وسائي: ڪير هن جي سرديءَ کي سهي سگهندو؟

¹⁸ هو پنهنجو ڪلام ٿو موڪلي، ۽ اهي ڳري ٿا وڃن؛ هو واءُ ٿو لڳائي ۽ پاڻي وهن ٿا.

¹⁹ هو يعقوب کي پنهنجو ڪلام ۽ اسرائيل کي پنهنجا قانون ۽ فيصلا ٿو ڏيکاري.

²⁰ هن ڪنهن بہ قوم سان اهڙو سلوڪ نہ ڪيو آهي: هن جي فيصلن جي انهن کي خبر ڪانهي. اوهين خداوند جي تعريف ڪريو.