زبور 135 - Sindhi Bible

¹ خداوند جي تعريف ڪريو، اوهين خداوند جي نالي جي تعريف ڪريو؛ اي خداوند جا بندا اوهين خداوند جي تعريف ڪريو:

² اوهين جي خداوند جي گهر ۾ ٿا بيهو، بلڪ اسان جي خدا جي گهر جي اڱڻ ۾ ٿا بيهو،

³ خداوند جي تعريف ڪريو؛ ڇو جو خداوند ڀلو آهي: هن نالي جي تعريف ڳايو؛ ڇو جو اها وڻندڙ آهي.

⁴ ڇالاءِ جو خداوند يعقوب کي پنهنجي واسطي، ۽ اسرائيل کي پنهنجي خاص ملڪيت ٿيڻ لاءِ چونڊيو آهي.

⁵ ڇو جو آءٌ ڄاڻان ٿو تہ خداوند عظيم آهي؛ اسان جو خدا سڀني معبودن جي مٿان عظيم آهي.

⁶ جيڪي خداوند کي وڻيو سو سڀ هن آسمان، ۽ زمين، ۽ سمنڊ، ۽ اونهائين ۾ ڪيو آهي.

⁷ هو زمين جي ڇيڙن کان بخار جا بادل ٿو اُٿاري؛ ۽ مينهن لاءِ وڄ پيدا ٿو ڪري؛ ۽ واءُ کي پنهنجي خزانن مان ٿو ڪڍي.

⁸ هن مصر جا پهريان ڄاول ٻار ماري وڌا، انسان جا توڙي حيوان جا.

⁹ اي مصر، هن تو منجهہ فرعون تي، ۽ سندس سڀني نوڪرن تي، نشان ۽ عجيب ڪم پڌرا ڪيا.

¹⁰ هن گهڻين قومن کي ماريو، ۽ زبردست بادشاهن کي قتل ڪيائين؛

¹¹ امورين جي بادشاهہ صيون کي ۽ بسن جي بادشاهہ عوج کي، ۽ ڪنعان جي سڀني بادشاهتن کي.

¹² ۽ انهن جو ملڪ هن پنهنجي قوم اسرائيل کي ميراث ڪري ورثي ۾ ڏنو.

¹³ اي خداوند تنهنجو نالو هميشہ تائين قائم آهي؛ ۽ تنهنجي يادگيري سڀني پيڙهين تائين قائم رهندي.

¹⁴ ڇو جو خداوند پنهنجيءَ اُمت جو انصاف ڪندو، ۽ پنهنجن بندن تي قياس ڪندو.

¹⁵ ڌارين قومن جا بت چاندي ۽ سون آهن، اهي ماڻهن جي هٿ جا جوڙيل آهن،

¹⁶ انهن کي وات آهي پر ڳالهائين نٿا؛ اکيون اٿن پر ڏسن نٿا؛

¹⁷ انهن کي ڪن آهن پر ٻڌن نٿا؛ ۽ نڪي وات سان ساهہ ٿا کڻن.

¹⁸ جيڪي انهن کي جوڙين ٿا، ۽ جيڪي مٿن ڀروسو ٿا رکن، سي سڀ انهن جهڙا ٿيندا.

¹⁹ اي اسرائيل جا گهراڻا خداوند کي مبارڪ چئو: اي هارون جا گهراڻا خداوند کي مبارڪ چئو:

²⁰ اي لاويءَ جا گهراڻا خداوند کي مبارڪ چئو: اوهين جي خداوند کان ڊڄو ٿا سي خداوند کي مبارڪ چئو.

²¹ خداوند جو يروشلم ۾ ٿو رهي، سو شل صيون ۾ مبارڪ هجي. اوهين خداوند جي تعريف ڪريو.