زبور 118 - Sindhi Bible

¹ خداوند جي شڪرگذاري ڪريو، ڇو جو هو نيڪ آهي: ۽ سندس رحم هميشہ تائين قائم آهي.

² ڀلي تہ اسرائيل هاڻي چوي، تہ هن جو رحم هميشہ تائين آهي.

³ ڀلي تہ هارون جو گهراڻو هاڻي چوي، تہ هن جو رحم هميشہ تائين آهي.

⁴ جن کي خداوند جو ڊپ آهي سي ڀلي تہ چون، تہ هن جو رحم هميشہ تائين آهي.

⁵ مون پنهنجي مصيبت ۾ خداوند کي پڪاريو: خداوند منهنجي اونائي ۽ مون کي ڪشاديءَ جاءِ ۾ ويهاريائين.

⁶ خداوند منهنجي پاسي آهي ۽ آءٌ ڪين ڊڄندس: انسان مون کي ڇا ڪندو؟

⁷ خداوند منهنجي پاسي منهنجي مددگارن ۾ آهي: تنهن ڪري آءٌ پنهنجيءَ مرضيءَ موجب پنهنجي دشمنن جو برو حال ڏسندس.

⁸ خداوند تي ڀروسو رکڻ انسان تي آس رکڻ کان چڱو آهي.

⁹ خداوند تي ڀروسو رکڻ سردارن تي آس رکڻ کان چڱو آهي.

¹⁰ سڀ ڌاريون قومون مون کي چوڌاري ويڙهي ويون آهن: پر آءٌ خداوند جي نالي انهن کي تباهہ ڪري ڇڏيندس.

¹¹ اهي مون کي ويڙهي ويون آهن؛ هائو اهي مون کي ويڙهي ويون آهن: پر آءٌ خداوند جي نالي انهن کي تباهہ ڪري ڇڏيندس.

¹² اهي مون کي ماکيءَ جي مکين وانگي ويڙهي ويون؛ پر ڪنڊن جي باهہ وانگيان وسامي ويون: آءٌ خداوند جي نالي انهن کي تباهہ ڪري ڇڏيندس.

¹³ تو مون کي زور سان ڌڪو ڏنو تہ آءٌ ڪري پوان: پر خداوند منهنجي مدد ڪئي.

¹⁴ خداوند منهنجي طاقت ۽ منهنجو گيت آهي؛ ۽ اهو ئي منهنجي نجات ٿيو آهي.

¹⁵ راستبازن جي تنبن ۾ نجات ۽ خوشيءَ جو آواز آهي: خداوند جو ساڄو هٿ قدرت جا ڪم ٿو ڪري.

¹⁶ خداوند جو ساڄو هٿ بلند آهي، خداوند جو ساڄو هٿ قدرت جا ڪم ٿو ڪري.

¹⁷ آءٌ مرندس ڪين پر جيئرو رهندس، ۽ خداوند جي ڪمن جو بيان ڪندس.

¹⁸ خداوند مون کي گهڻي سيکت ڏني آهي: پر مون کي موت جي حوالي نہ ڪيو اٿس.

¹⁹ راستبازيءَ جا دروازا مون لاءِ کولي ڇڏيو: آءٌ انهن ۾ داخل ٿي خداوند جي شڪر گذاري ڪندس.

²⁰ خداوند جو دروازو اهو آهي؛ راستباز انهيءَ ۾ داخل ٿيندا

²¹ آءٌ تنهنجا ٿورا مڃيندس، ڇو جو تو منهنجي اونائي، ۽ پاڻ منهنجي نجات ٿيو آهين.

²² جنهن پهڻ کي اڏيندڙن رد ڪري ڇڏيو سو ئي ڪنڊ جو پٿر يعني مکيہ ڪيو ويو.

²³ هي خداوند جي طرفان ٿيو؛ ۽ اسان جي نظر ۾ عجيب آهي.

²⁴ هي اهو ڏينهن آهي جو خداوند مقرر ڪيو آهي؛ اسين منجهس خوشي ڪنداسين ۽ سرها ٿينداسين.

²⁵ اي خداوند اسين توکي عرض ٿا ڪريون تہ اسان کي بچاءِ: اي خداوند اسين توکي عرض ٿا ڪريون تون اسان کي خوشحال رک.

²⁶ مبارڪ آهي اهو جو، خداوند جي نالي اچي ٿو: اسان خداوند جي هيڪل مان اوهان کي برڪت ڏني آهي.

²⁷ خداوند ئي خدا آهي، ۽ هن اسان کي سوجهرو ڏنو آهي: اوهين قربانيءَ کي قربانگاهہ تي رسين سان ٻڌو، يعني قربانگاهہ جي سڱن سان.

²⁸ تون ئي منهنجو خدا آهين، آءٌ تنهنجا ٿورا مڃيندس: تون منهنجو خدا آهين، آءٌ تنهنجي تعظيم ڪندس.

²⁹ خداوند جي شڪر گذاري ڪريو، ڇو جو هو نيڪ آهي: ۽ سندس رحم هميشہ تائين آهي.