ڳاڻاٽو 34 - Sindhi Bible

¹ ۽ خداوند موسيٰ کي فرمايو ۽ چيائينس، تہ

² بني اسرائيل کي حڪم ڏئي چئُہ، تہ جڏهن اوهين ڪنعان جي ملڪ ۾ داخل ٿيو، (هي اهو ملڪ آهي، جو اوهان جو ورثو ٿيندو، يعني ڪنعان جو ملڪ سندس حدن موجب.)

³ تڏهن اوهان جي ڏکڻ واري سرحد صين جي بيابان کان وٺي ادوم جي سرحد تائين ٿيندي، ۽ اوهان جي ڏاکڻي سرحد کاري سمنڊ جي ڇيڙي کان وٺي اُڀرندي ڏانهن ٿيندي:

⁴ اوهان جي سرحد عقرابيم جي چاڙهيءَ جي ڏکڻ کان ڦري، صين تائين ويندي: اُتان وري قادس برنيع جي ڏکڻ ڏانهن ويندي؛ اُتان وري حصرادار کان لنگهي عضمون تائين ويندي:

⁵ پوءِ سرحد عضمون کان ڦري، مصر جي نديءَ تائين ويندي، ۽ سمنڊ تي وڃي پوري ٿيندي.

⁶ ۽ اُلهندي واري سرحد اوهان جي لاءِ وڏو سمنڊ ۽ انهي جو ڪنارو ٿيندي: اها اوهان جي اُلهندي واري سرحد ٿيندي.

⁷ ۽ اوهان جي اُتر واري سرحد: وڏي سمنڊ کان وٺي حور جبل تائين رکجو.

⁸ ۽ حور جبل کان اوهين حمات جي گهڙڻ واريءَ جاءِ تائين نشان ڪجو؛ ۽ اتان نڪري سرحد ضداد تائين ويندي:

⁹ پوءِ سرحد اڳتي لنگهي زفرون تائين ويندي، ۽ اتان نڪري حصرعينان تي وڃي بيهندي: اها اوهان جي اُتر واري سرحد ٿيندي.

¹⁰ ۽ اوهين پنهنجي اُڀرندي واري سرحد حصرعينان کان وٺي سفام تائين نشان ڪجو:

¹¹ ۽ سرحد سفام کان لهي ربلہ تائين، عين جي اُڀرندي پاسي ويندي؛ وري اتان لهي اڀرندي ڏانهن ڪنرت جي سمنڊ تائين ويندي:

¹² پوءِ سرحد اتان لهي يردن تائين ويندي، ۽ اتان نڪري وڃي کاري سمنڊ تي بيهندي: اهو ملڪ سندس چئن ئي طرفن جي حدن موجب اوهان جو ٿيندو.

¹³ پوءِ موسيٰ بني اسرائيل کي حڪم ڏيئي چيو، تہ جيڪو ملڪ اوهين پُکا وجهي ورهائي ورثي ۾ کڻندا، ۽ جنهن جي بابت خداوند حڪم ڪيو آهي، تہ انهن نوَن قبيلن ۽ اڌ قبيلي کي ڏئي سو اهو آهي:

¹⁴ ڇالاءِ جو بني روبن جي قبيلي کي پنهنجي ابن ڏاڏن جي گهراڻن موجب، ۽ بني جد جي قبيلي کي پنهنجي ابن ڏاڏن جي گهراڻن موجب، سندن ورثو مليو آهي، ۽ منسيءَ جي اڌ قبيلي کي بہ سندس ورثو ملي چڪو آهي:

¹⁵ انهن اڍائي قبيلن کي سندن ورثو، سج اُڀرڻ واري پاسي يردن جي هن ڀر، يريحو وٽ اُڀرندي ڏانهن ملي چڪو آهي.

¹⁶ پوءِ خداوند موسيٰ کي فرمايو، ۽ چيائينس، تہ

¹⁷ جيڪي ماڻهو انهي ملڪ جو ورثو اوهان کي ورهائي ڏيندا، تن جا نالا هي آهن: اليعزر ڪاهن، ۽ نون جو پٽ يشوع.

¹⁸ ۽ اوهين ملڪ جو ورثو ورهائڻ لاءِ هرهڪ قبيلي مان هڪڙو سردار پاڻ سان کڻجو.

¹⁹ ۽ انهن ماڻهن جا نالا هي آهن: يهوداهہ جي قبيلي مان، يفنہ جو پٽ ڪالب.

²⁰ بني شمعون جي قبيلي مان، عميهود جو پٽ شموئيل.

²¹ بنيمين جي قبيلي مان، ڪسلون جو پٽ اليداد.

²² بني دان جي قبيلي جو سردار، يگليءَ جو پٽ بقي.

²³ بني يوسف مان، بني منسيءَ جي قبيلي جو سردار، افود جو پٽ حني ايل.

²⁴ بني افرائيم جي قبيلي جو سردار، سفتان جو پٽ قموايل.

²⁵ بني زبولون جي قبيلي جو سردار، فرناڪ جو پٽ اليصفن.

²⁶ بني اشڪار جي قبيلي جو سردار، عزان جو پٽ فلتي ايل.

²⁷ بني آشر جي قبيلي جو سردار، شلوميءَ جو پٽ اخيهود.

²⁸ بني نفتاليءَ جي قبيلي جو سردار، عميهود جو پٽ فداهيل.

²⁹ هي اهي ماڻهو آهن جن کي خداوند حڪم ڏنو تہ ڪنعان جي ملڪ ۾ بني اسرائيل کي ورثو ورهائي ڏين.