ڳاڻاٽو 3 - Sindhi Bible

¹ هاڻي جنهن ڏينهن خداوند سينا جبل تي موسيٰ سان ڳالهايو، تنهن ڏينهن موسيٰ ۽ هارون جون هي پيڙهيون هيون.

² ۽ هارون جي پٽن جا نالا هي آهن: ندب جيڪو پهريتو هو، ۽ ابيهو، ۽ اليعزر، ۽ اتمر.

³ هارون جا پٽ، جي ڪاهن هئا، ۽ جن کي هن مسح ڪري، ڪهانت جي عهدي تي رکي خدمت ڪرڻ لاءِ مخصوص ڪيو هو، سي اهي آهن.

⁴ ۽ ندب ۽ ابيهو، جڏهن سينا جي بيابان ۾ خداوند جي حضور ۾ ناجائز باهہ پيش ڪئي، تڏهن اهي خداوند جي حضور ۾ مري ويا، ۽ انهن کي اولاد ڪونہ هو: باقي اليعز ۽ اتمر پنهنجي پيءُ هارون جي موجودگيءَ ۾ ڪهانت جي عهدي تي رهي خدمت ڪندا رهيا.

⁵ ۽ خداوند موسيٰ کي فرمايو، ۽ چيائينس تہ

⁶ لاويءَ جي قبيلي وارن کي ويجهو آڻي هارون ڪاهن جي اڳيان حاضر ڪر، تہ اهي هن جي خدمت ڪن.

⁷ ۽ انهي جي طرفان، ۽ ساري جماعت جي طرفان، جيڪي کين سونپيو وڃي تنهن جي نگهباني ڪن، ۽ عبادت جي خيمي جي نگهباني ڪن.

⁸ ۽ هو جماعت واري تنبوءَ جي سموري سامان جي، ۽ بني اسرائيل جي ساريءَ امانت جي نگهباني ڪن، انهي لاءِ تہ عبادت جي خيمي جي خدمت ڪندا رهن.

⁹ ۽ تون لاوين کي هارون ۽ سندس پٽن جي حوالي ڪري ڇڏ: اهي بني اسرائيل جي پاران هن کي ڏنا ويا آهن.

¹⁰ ۽ تون هارون ۽ سندس پٽن کي مقرر ڪر تہ اهي ڪهانت جي ڪم ۾ مشغول رهن: ۽ جيڪو ڌاريو ماڻهو ويجهو اچي سو ماريو وڃي.

¹¹ ۽ خداوند موسيٰ کي فرمايو، ۽ چيائينس تہ

¹² ڏس بني اسرائيل جا پهريتا ٻار، جيڪي پيٽ مان پهرين نڪرن ٿا، تن جي بدران مون اسرائيل منجهان لاوين کي قبول ڪيو آهي، ۽ لاوي منهنجا ٿيندا؛

¹³ ڇالاءِ جو سڀ پهريتا ٻار منهنجا آهن؛ جنهن ڏينهن مون مصر جي ملڪ ۾ سڀ پهريتا ٻار ماريا، تنهن ڏينهن اسرائيل ۾ سڀ پهريتا، ماڻهن جا توڙي جانورن جا، مون پنهنجي لاءِ مخصوص ڪيا: اهي منهنجا ٿيندا؛ آءٌ خداوند آهيان.

¹⁴ ۽ خداوند سينا جي بيابان ۾ موسيٰ کي فرمايو، ۽ چيائينس تہ

¹⁵ تون بني لاويءَ جو سندن خاندانن، ۽ سندن ابن ڏاڏن جي گهراڻن موجب شمار ڪر، يعني جن ڇوڪرن جي عمر هڪڙو مهينو يا انهي کان مٿي هجي، تن سڀني جو تون شمار ڪر.

¹⁶ سو جيئن موسيٰ کي حڪم مليو، تيئن خداوند جي فرمان موجب هن انهن جو شمار ڪيو.

¹⁷ ۽ لاويءَ جا پٽ سندن نالن موجب هي هئا؛ يعني جيرسون، قهات ۽ مراري.

¹⁸ ۽ جيرسون جي پٽن جا نالا سندن خاندانن موجب هي آهن: لبني ۽ سمعي.

¹⁹ ۽ قهات جا پٽ، سندن خاندانن موجب هي آهن: عمرام، اضهار، حبرون ۽ عزي ايل.

²⁰ ۽ مراريءَ جا پٽ، سندن خاندانن موجب هي آهن: محلي ۽ موشي. سو لاوين جا خاندان، سندن ابن ڏاڏن جي گهراڻن موجب اِهي آهن.

²¹ جيرسون مان لبني وارن جو خاندان، ۽ شمعي وارن جو خاندان هو: اهي آهن بني جيرسون جا خاندان.

²² انهن مان جن ڇوڪرن جي عمر هڪڙو مهينو ۽ انهي کان مٿي هئي، تن سڀني جو شمار ڪيو ويو، ۽ اهڙيءَ طرح جن جو شمار ڪيو ويو، سي مڙيئي ست هزار ۽ پنج سؤ هئا.

²³ اهي بني جيرسون جا خاندان عبادت واري خيمي جي الهندي پاسي پنهنجا تنبو کوڙين.

²⁴ ۽ لاايل جو پٽ الياسف، بني جيرسون جي ابن ڏاڏن جي گهراڻي جو سردار ٿئي.

²⁵ ۽ جماعت واري تنبوءَ ۾، عبادت جو خيمو، ۽ انهي جي مٿان جيڪو تنبو آهي سو، ۽ انهي جو ڍڪ، ۽ جماعت واري تنبوءَ جي در جو پردو، اهي بني جيرسون جي پٽن جي نگهبانيءَ هيٺ رهن؛

²⁶ ۽ انهي کان سواءِ اڱڻ جا پردا، جيڪي خيمي ۽ قربانگاهہ جي ويجها آهن، ۽ اڱڻ جي در جو پردو، ۽ سڀيئي رسا جيڪي انهي ۾ ڪم ٿا اچن.

²⁷ قهات مان عمرام وارن جو خاندان، ۽ اَضهار وارن جو خاندان، ۽ حبرون وارن جو خاندان، ۽ عزي ايل وارن جو خاندان هو. اهي آهن بني قهات جا خاندان.

²⁸ انهن مان جن ڇوڪرن جي عمر هڪڙو مهينو ۽ انهي کان مٿي هئي، تن سڀني جو شمار ڪيو ويو، ۽ اهي اٺ هزار ۽ ڇهہ سؤ هئا، ۽ پاڪ مڪان جي نگهباني انهن جي ذمي هئي.

²⁹ اهي بني قهات جا خاندان، عبادت واري خيمي جي ڏکڻ واري پاسي پنهنجا تنبو کوڙين.

³⁰ ۽ عزي ايل جو پٽ اليصفن، بني قهات جي ابن ڏاڏن جي گهراڻي جو سردار ٿئي.

³¹ ۽ صندوق، ۽ ميز، ۽ شمعدان، ۽ ٻئي قربانگاهون، ۽ پاڪ مڪان جا ٿانو، جيڪي عبادت جي ڪم ۾ ٿا اچن، ۽ پردو، ۽ انهي سان لاڳاپو رکندڙ سڀ ڪو ڪم انهن جي ذمي رهي.

³² ۽ هارون ڪاهن جو پٽ اليعزر، لاوين جي سردارن جو سردار ٿئي، ۽ جيڪي پاڪ مڪان جي نگهباني ٿا ڪن، تن تي نظرداري ڪري.

³³ مراريءَ مان محليءَ وارن جو خاندان، ۽ موشيءَ وارن جو خاندان هو: اهي آهن بني مراريءَ جا خاندان.

³⁴ انهن مان جن ڇوڪرن جي عمر هڪڙو مهينو ۽ انهي کان مٿي هئي، تن سڀني جو شمار ڪيو ويو، ۽ اهي ڇهہ هزار ۽ ٻہ سؤ هئا.

³⁵ ابيخيل جو پٽ صوري ايل، بني مراريءَ جي ابن ڏاڏن جي گهراڻي جو سردار ٿئي. اهي خيمي جي اُتر واري پاسي پنهنجا تنبو کوڙين.

³⁶ ۽ عبادت واري خيمي جا تختا، ۽ انهي جا گز، ۽ انهي جا ٿنڀ، ۽ انهي جا کوپا، ۽ انهي جا سڀ اوزار، ۽ انهي جي خدمت جو سڀ ڪم، بني مراريءَ جي ذمي رهي.

³⁷ ۽ انهي کان سواءِ اڱڻ جي آسپاس وارا ٿنڀ، ۽ انهن جا کوپا، ۽ انهن جا رسا بہ سندن نگهبانيءَ هيٺ رهن.

³⁸ ۽ خيمي جي اڳيان جماعت واري تنبوءَ جي سامهون، سج اُڀرڻ واري پاسي جيڪي پنهنجا تنبو کوڙين، سي موسيٰ، ۽ هارون، ۽ انهي جا پٽ هجن؛ اهي بني اسرائيل جي لاءِ خيمي جي نگهباني ڪن؛ جيڪو ڌاريو ماڻهو ويجهو اچي، سو ماريو وڃي.

³⁹ سو لاوين مان جيڪي شمار ڪيا ويا، جن جي عمر هڪڙو مهينو ۽ انهي کان مٿي هئي، يعني جن جو موسيٰ ۽ هارون، خداوند جي حڪم پٽاندر، سندن خاندانن موجب شمار ڪيو، سي مڙيئي ٻاويهہ هزار هئا.

⁴⁰ پوءِ خداوند موسيٰ کي چيو تہ تون بني اسرائيل جي سڀني پهريتن پٽن جو شمار ڪر، يعني جن جي عمر هڪڙو مهينو ۽ انهي کان مٿي هجي، تن سڀني جي نالن جو شمار ڪر.

⁴¹ ۽ تون بني اسرائيل جي پهريتن پٽن جي بدران، منهنجي لاءِ لاوين جو شمار ڪر (آءٌ خداوند آهيان)؛ ۽ بني اسرائيل جي چوپائي مال جي پهرين ڄاول ٻچن جي بدران، لاوين جي چوپائي مال جو شمار ڪر.

⁴² سو جيئن خداوند موسيٰ کي حڪم ڏنو، تيئن هن بني اسرائيل جي پهريتي پٽن جو شمار ڪيو.

⁴³ ۽ انهن مان سڀيئي پهريتا پٽ، جن جو سندن نالن موجب شمار ڪيو ويو، سي ٻاويهہ هزار ٻہ سؤ ۽ ٽيهتر هئا.

⁴⁴ ۽ خداوند موسيٰ کي فرمايو ۽ چيائينس تہ

⁴⁵ تون بني اسرائيل مان سڀني پهريتن جي بدران لاوين کي وٺ، ۽ انهن جي چوپائي مال جي بدران، لاوين جو چوپايو مال وٺ، ۽ لاوي منهنجا ٿيندا: آءٌ خداوند آهيان.

⁴⁶ بني اسرائيل جي پهريتن ۾ جيڪي ٻہ سؤ ٽيهتر ڄڻا لاوين جي شمار کان وڌيڪ آهن، تن جو عيوضو ڏيئي ڇڏائڻ لاءِ،

⁴⁷ تون انهن کان هڪڙي هڪڙي لاءِ پاڪ مڪان جي مشقال جهڙا پنج مشقال وٺ؛ هڪڙي مشقال ۾ ويهہ جيرہ آهن.

⁴⁸ ۽ اها رقم جنهن سان انهن جو اهو وڌيڪ تعداد ڇڏايو وڃي، سا تون هارون ۽ سندس پٽن کي ڏج.

⁴⁹ سو جيڪي لاوين جي عيوضي ۾ ڇڏايا ويا، تن کان وڌيڪ جيڪي ماڻهو هئا، تن کان موسيٰ اها عيوضي واري رقم وصول ڪئي.

⁵⁰ هن اهي پئسا بني اسرائيل جي پهريتي پٽن کان ورتا. اهي پاڪ مڪان جي مشقال جهڙا هڪ هزار ٽي سؤ ۽ پنجهٺ مشقال ٿيا.

⁵¹ ۽ موسيٰ اهي ڇوٽڪاري جي عيوضي وارا پئسا، خداوند جي حڪم موجب، هارون ۽ سندس پٽن کي ڏنا، جيئن ڪ خداوند موسيٰ کي فرمايو هو.