ڳاڻاٽو 13 - Sindhi Bible

¹ پوءِ خداوند موسيٰ کي فرمايو ۽ چيائينس تہ

² تون ماڻهو موڪل تہ اهي وڃي ڪنعان جي ملڪ جي جاسوسي ڪن، جو ملڪ آءٌ بني اسرائيل کي ڏيڻ وارو آهيان: هرهڪ اباڻي قبيلي مان هڪڙو ماڻهو، جو منجهن سردار هجي، تنهن کي موڪل.

³ سو موسيٰ خداوند جي حڪم موجب انهن کي فاران جي بيابان مان موڪليو: اهي سڀ بني اسرائيل جا سردار هئا.

⁴ ۽ انهن جا نالا هي هئا: روبن جي قبيلي مان، ذڪور جو پٽ سموع.

⁵ ۽ شمعون جي قبيلي مان، حوريءَ جو پٽ سافط.

⁶ ۽ يهوداهہ جي قبيلي مان، يفنہ جو پٽ ڪالب.

⁷ ۽ اشڪار جي قبيلي مان، يوسف جو پٽ اجال.

⁸ ۽ افرائيم جي قبيلي مان، نون جو پٽ هوسيع.

⁹ ۽ بنيمين جي قبيلي مان، رفوءَ جو پٽ فلتي.

¹⁰ ۽ زبولون جي قبيلي مان، سوديءَ جو پٽ جدي ايل.

¹¹ ۽ يوسف جي قبيلي مان، يعني منسيءَ جي قبيلي مان، سوسيءَ جو پٽ جدي.

¹² ۽ دان جي قبيلي مان، جمليءَ جو پٽ عمي ايل.

¹³ ۽ آشر جي قبيلي مان، ميڪائيل جو پٽ ستور.

¹⁴ ۽ نفتاليءَ جي قبيلي مان، وفسيءَ جو پٽ نخبي.

¹⁵ ۽ جد جي قبيلي مان، ماڪيءَ جو پٽ جيو ايل.

¹⁶ اهي آهن انهن ماڻهن جا نالا، جن کي موسيٰ انهيءَ ملڪ جي جاسوسي ڪرڻ لاءِ موڪليو، ۽ موسيٰ نون جي پٽ هوسيع کي يشوع ڪري سڏيو.

¹⁷ ۽ موسيٰ انهن کي ڪنعان جي ملڪ جي جاسوسي ڪرڻ لاءِ موڪليو، ۽ انهن کي چيائين تہ اوهين ڏکڻ واري رستي ڏانهن وڃو، ۽ جبلن تي وڃي چڙهو،

¹⁸ ۽ نهاري ڏسو تہ اهو ملڪ ڪهڙي قسم جو آهي؛ ۽ جيڪي ماڻهو اتي رهن ٿا، سي زور ڀريا آهن يا ضعيف آهن، ٿورا آهن يا گهڻا آهن؛

¹⁹ ۽ جتي هو رهن ٿا، سو ملڪ ڪهڙو آهي، چڱو آهي يا خراب آهي؛ ۽ جن شهرن ۾ هو رهن ٿا، سي ڪهڙا آهن؛ اهي ماڻهو تنبن ۾ ٿا گذارين يا مضبوط ڪوٽن ۾؛

²⁰ ۽ اها زمين ڪهڙي قسم جي آهي، ڀلي آهي يا ناقص آهي، انهي ۾ وڻ آهن يا نہ. اوهين همت وارا ٿيو ۽ انهيءَ زمين جي ميون مان ڪجهہ کڻي اچجو. انهي وقت ڊاک جي پهرئين ڦل پچڻ جي موسم هئي.

²¹ سو هو روانا ٿيا ۽ سين جي بيابان کان وٺي رحوب تائين، جو جمات جي واٽ تي آهي، سڄي ملڪ جي جاسوسي ڪيائون؛

²² ۽ هو ڏکڻ جي طرف کان مٿي چڙهيا، ۽ حبرون ۾ آيا؛ جتي عناق جو اولاد، اخيمان، ۽ سيسي، ۽ تلمي رهندا هئا، (هاڻي حبرون، مصر جي شهر ضعن کان ست سال اڳي ٻڌو ويو هو.)

²³ پوءِ هو اسڪال جي ماٿري ۾ آيا، ۽ اتان هڪڙي ڊاک جي ٽاري، ڇڳي سميت وڍيائون، ۽ اها لٺ ۾ وجهي ٻہ ڄڻا کڻي هليا، ۽ ڪي ڏاڙهون ۽ انجير بہ کنيائون.

²⁴ انهي هنڌ جو نالو اسڪال جي ماٿري رکيو ويو؛ ڇالاءِ جو بني اسرائيل اتان اهو ڇڳو وڍيو هو.

²⁵ ۽ هو انهي ملڪ جي جاسوسي ڪري چاليهن ڏينهن کان پوءِ موٽي آيا.

²⁶ پوءِ هو فاران جي بيابان ۾ قادس منجهہ، موسيٰ ۽ هارون ۽ بني اسرائيل جي ساري جماعت وٽ آيا، ۽ اچي حال احوال ڏنائون، ۽ انهيءَ زمين جو ميوو ڏيکاريائون.

²⁷ ۽ چيائونس تہ جنهن ملڪ ۾ تو اسان کي موڪليو هو، انهي ۾ اسين وياسين، ۽ سچ پچ انهي ملڪ ۾ کير ۽ ماکي پيئي وهي، ۽ هي انهي جو ميوو آهي.

²⁸ پر جيڪي ماڻهو انهي ملڪ ۾ رهن ٿا، سي ڏاڍا زوراور آهن، ۽ اتي جا شهر تمام وڏا ۽ ڪوٽن وارا آهن: ۽ اسان اُتي عناق جو اولاد بہ ڏٺو.

²⁹ انهي ملڪ جي ڏکڻ ۾ عماليقي ٿا رهن، ۽ حتي ۽ يبوسي ۽ اموري جبلن ۾ ٿا رهن، ۽ سمنڊ واري پاسي ۽ يردن جي ڪناري تي ڪنعاني ٿا رهن.

³⁰ پوءِ ڪالب موسيٰ جي روبرو ماڻهن کي ماٺ ڪرائي چيو تہ هلو تہ هڪدم هلي اهو ملڪ هٿ ڪريون؛ ڇالاءِ جو اسين انهي تي پوريءَ طرح غالب پونداسين.

³¹ پر جيڪي ماڻهو هن سان گڏ ويا هئا، تن چيو تہ اسين انهن ماڻهن تي حملي ڪرڻ لاءِ وڃي نٿا سگهون، ڇو تہ اهي اسان کان وڌيڪ زور وارا آهن.

³² ۽ هنن، جنهن ملڪ جي جاسوسي ڪري آيا هئا، تنهن بابت بني اسرائيل کي هڪڙي خراب خبر ٻڌائي، ۽ چيائون تہ اها زمين، جنهن جي جاسوسي ڪرڻ لاءِ اسين ويا هئاسين، سا اهڙي زمين آهي، جا اتي جي رهاڪن کي کايو وڃي، ۽ جيڪي ماڻهو اسان اتي ڏٺا سي سڀ ڏاڍا قداور آهن.

³³ ۽ اسان اتي راڪاس ڏٺا، يعني عناق جو اولاد، جي راڪاسن جي نسل مان آهن، ۽ اسين انهن جي اڳيان پنهنجي نظر ۾ تڏين جهڙا هئاسين، ۽ انهن جي نظر ۾ بہ اهڙا ئي هئاسين.