لاوي سرشتو 18 - Sindhi Bible

¹ ۽ خداوند موسيٰ کي فرمايو ۽ چيائينس تہ

² تون بني اسرائيل سان گفتگو ڪري کين چئُہ تہ آءٌ خداوند اوهان جو خدا آهيان.

³ مصر جو ملڪ جنهن ۾ اوهين رهندا هئا، انهن جهڙا ڪم اوهين متان ڪريو: ۽ ڪنعان جو ملڪ، جتي آءٌ اوهان کي وٺي ٿو هلان، انهن جهڙا ڪم بہ اوهين متان ڪريو: نڪي اوهين انهن جي قانونن تي هلجو.

⁴ اوهين منهنجن حڪمن تي هلجو، ۽ اوهين منهنجن قانونن تي عمل ڪجو، ۽ انهن تي هلجو: آءٌ خداوند اوهان جو خدا آهيان.

⁵ تنهنڪري اوهين منهنجن قانونن ۽ منهنجن حڪمن تي عمل ڪجو: جيڪو ماڻهو ائين ڪندو، سو انهن جي ڪري جيئرو رهندو: آءٌ خداوند آهيان.

⁶ اوهان مان ڪوبہ پنهنجي ويجهيءَ مائٽياڻيءَ جو ننگ کولڻ لاءِ انهي جي ويجهو نہ وڃي: آءٌ خداوند آهيان.

⁷ تون پنهنجي پيءُ جو ننگ، يعني پنهنجيءَ ماءُ جو ننگ نہ کولج: هوءَ تنهنجي ماءُ آهي؛ تون انهيءَ جو ننگ نہ کولج.

⁸ تون پنهنجي پيءُ جي زال جو ننگ نہ کولج: اهو تنهنجي پيءُ جو ننگ آهي.

⁹ نڪي تون پنهنجي ڀيڻ جو، يا پنهنجي پيءُ جي ڌيءَ جو، يا پنهنجيءَ ماءُ جي ڌيءَ جو ننگ کولج، پوءِ اها گهر ۾ ڄائي هجي، يا ڪٿي ٻاهر ڄائي هجي.

¹⁰ تون پنهنجي پٽ جي ڌيءَ جو، يا پنهنجي ڌيءَ جي ڌيءَ جو ننگ نہ کولج: ڇالاءِ جو انهن جو ننگ خود تنهنجو ننگ آهي.

¹¹ تنهنجي پيءُ جي زال جي ڌيءَ، جا تنهنجي پيءُ مان ڄائي هجي؛ اها تنهنجي ڀيڻ آهي، تنهن جو بہ ننگ تون نہ کولج.

¹² تون پنهنجي پيءُ جي ڀيڻ جو ننگ نہ کولج: اها تنهنجي پيءُ جي ويجهي مائٽياڻي آهي.

¹³ تون پنهنجي ماءُ جي ڀيڻ جو ننگ نہ کولج: ڇالاءِ جو اها تنهنجيءَ ماءُ جي ويجهي مائٽياڻي آهي.

¹⁴ تون پنهنجي پيءُ جي ڀاءُ جو ننگ نہ کولج، نڪي هن جي زال جي ويجهو وڃج: اها تنهنجي چاچي آهي.

¹⁵ تون پنهنجيءَ ننهن جو ننگ نہ کولج، اها تنهنجي پٽ جي زال آهي: تون انهيءَ جو ننگ متان کولين.

¹⁶ تون پنهنجي ڀاءُ جي زال جو ننگ نہ کولج: اها تنهنجي ڀاءُ جو ننگ آهي.

¹⁷ تون ڪنهن بہ زال ۽ سندس ڌيءَ ٻنهي جو ننگ نہ کولج؛ تون انهيءَ زال جي پٽ جي ڌيءَ، يا سندس ڌيءَ جي ڌيءَ کي ننگ کولڻ لاءِ متان وٺين؛ اهي ويجهيون مائٽياڻيون آهن: اها وڏي بدڪاري آهي.

¹⁸ تون هڪڙيءَ زال جي جيئري هوندي، انهيءَ جي ڀيڻ کي سندس پهاڄ ٿيڻ لاءِ، ۽ انهيءَ جو ننگ کولڻ لاءِ، نہ وٺج.

¹⁹ جيڪا زال پنهنجيءَ ماهواريءَ جي ڪري اڃا ناپاڪ هجي، تنهن جو ننگ کولڻ لاءِ، سندس ويجهو نہ وڃج.

²⁰ تون پنهنجي پاڙيسريءَ جي زال سان زنا ڪري، پاڻ کي انهيءَ سان پليت نہ ڪج.

²¹ تون پنهنجي اولاد مان ڪنهن کي بہ مولڪ جي واسطي باهہ مان لنگهڻ نہ ڏج، نڪي تون پنهنجي خدا جي نالي جي بي حرمتي ڪج: آءٌ خداوند آهيان.

²² تون ڪنهن مرد سان زال وانگر نہ سمهج: ڇالاءِ جو اهو مڪروهہ آهي.

²³ ۽ تون ڪنهن بہ جانور سان بدفعلي ڪري پاڻ کي پليت نہ ڪج: ۽ نہ ڪا زال ڪنهن جانور وٽ وڃي انهي جي هيٺان سمهي: اها اونڌي ڳالهہ آهي.

²⁴ اوهين انهن مان ڪوبہ ڪم ڪري پاڻ کي پليت نہ ڪجو: ڇالاءِ تہ جن قومن کي آءٌ اوهان جي اڳيان ڪڍي ڇڏيندس، سي سڀ انهن ڪمن جي ڪري پليت ٿيون آهن:

²⁵ ۽ اها زمين بہ پليت ٿيل آهي: تنهنڪري آءٌ انهن کي سندن بدڪاري جي سزا ڏيندس، اهڙي جو زمين پنهنجن رهاڪن کي اُلٽي ڪري ڪڍي ڇڏيندي.

²⁶ تنهنڪري اوهين قانونن ۽ حڪمن تي عمل ڪجو، ۽ انهن مڪروهہ ڪمن مان ڪوبہ نہ ڪجو؛ نڪي گهرو، نڪي پرديسي جيڪي اوهان منجهہ رهندا هجن، انهن مان ڪو ڪم ڪن:

²⁷ (ڇالاءِ تہ جيڪي اوهان کان اڳي انهيءَ زمين جا رهاڪو هئا، تن اهي سڀ مڪروهہ ڪم ڪيا آهن، ۽ اها زمين پليت آهي؛)

²⁸ سو ائين نہ ٿئي تہ جڏهن اوهين انهيءَ زمين کي پليت ڪريو، تڏهن اها اوهان کي بہ اهڙيءَ طرح اُلٽي ڪري ڪڍي ڇڏي، جهڙيءَ طرح اوهان کان اڳ ۾ رهندڙ قوم کي ڪڍي ڇڏيائين.

²⁹ ڇالاءِ تہ جيڪو انهن مڪروهہ ڪمن مان ڪوبہ ڪندو، تہ اهڙا ڪم ڪرڻ وارا ماڻهو پنهنجي قوم مان تباهہ ڪيا ويندا.

³⁰ تنهنڪري اوهين منهنجو حڪم مڃيندا رهجو، انهي لاءِ تہ اوهان کان اڳي جيڪي مڪروهہ رسمون ۽ ڪم ڪيا ويا هئا، تن مان اوهين ڪوبہ نہ ڪريو، ۽ نڪي انهن جي ڪري پاڻ کي پليت ڪريو: آءٌ خداوند اوهان جو خدا آهيان.