ايوب 26 - Sindhi Bible

¹ تڏهن ايوب ورندي ڏيئي چيو تہ:

² تو ڪيئن نہ اُنهيءَ جي مدد ڪئي آهي، جنهن کي طاقت ڪانهي! تو ڪيئن نہ اُنهيءَ کي بچايو آهي، جنهن ۾ ڪوبہ زور ڪونهي!

³ تو ڪيئن نہ اُنهيءَ کي صلاح ڏني آهي، جنهن کي عقل ڪونهي، ۽ سچي علميت هن کي ٻڌائي آهي.

⁴ تو اهي ڳالهيون ڪنهن کي ٻڌايون آهن؟ ۽ ڪنهن جو روح تو وٽان نڪتو آهي؟

⁵ جيڪي مري ويا آهن سي ڏڪن ٿا، ۽ جيڪي پاڻيءَ جي هيٺان رهن ٿا سي بہ.

⁶ هن جي اڳيان قبر جو منهن اُگهاڙو آهي، ۽ جهنم بہ کليل آهي.

⁷ هو خالي جاءِ تي اُتر کي پکيڙي ٿو، ۽ زمين کي خال تي ٽنگي ڇڏي ٿو.

⁸ هو پاڻيءَ کي پنهنجن گهاٽن ڪڪرن ۾ بند ڪري ڇڏي ٿو، ۽ ڪڪر انهيءَ هيٺان ڦاٽي نٿو پوي.

⁹ هو پنهنجي تخت جو منهن بند ڪري ڇڏي ٿو، ۽ پنهنجو ڪڪر انهيءَ تي پکيڙي ڇڏي ٿو.

¹⁰ هن پاڻيءَ جي سطح تي حد ٻڌي ڇڏي آهي، انهيءَ هنڌ تائين جتي سوجهري ۽ اونداهيءَ پڄاڻي ڪئي آهي.

¹¹ آسمان جا ٿنڀ ڏڪن ٿا، ۽ هن جي تاب تان حيران ٿيا آهن.

¹² هو سمنڊ کي پنهنجي طاقت سان اُٿلائي ٿو، ۽ پنهنجي حڪمت سان مغروريءَ تي ڌڪ هڻي ٿو.

¹³ هنن جي روح سان آسمان زينت وٺن ٿا؛ هن جي هٿ تکي ڀڄندڙ نانگ کي ونڌي ڇڏيو آهي.

¹⁴ ڏسو، اهي تہ فقط هن جي رستن جا پاسا ۽ ڪنڊون آهن، اسين هن جو آواز ڪهڙو نہ ماٺيڻو ٻڌون ٿا! پر هن جي زبردست ڪمن جي گجگوڙ ڪير سمجهي ٿو سگهي؟