يرمياہ 52 - Sindhi Bible

¹ جڏهن صدقياہ بادشاهت ڪرڻ لڳو تڏهن ايڪيهن ورهين جو هو، ۽ هن يروشلم ۾ يارهن ورهيہ حڪومت ڪئي: ۽ اُن جي ماءُ جو نالو حموطل هو، جا لبناہ واري يرمياہ جي ڌيءَ هئي.

² ۽ هن اُهي ڪم ڪيا جي خداوند جي نظر ۾ خراب هئا، جهڙا ڪ يهويقيم ڪيا هئا.

³ ڇالاءِ جو خداوند جي ڪاوڙ ڪري يروشلم ۽ يهوداہ ۾ اهڙو حال ٿيو جو هن انهن کي پنهنجي حضور مان ڪڍي ڇڏيو: ۽ صدقياہ بابل جي بادشاهہ جي برخلاف فساد ڪيو.

⁴ ۽ ان جي حڪومت جي نائين سال ۾، ڏهين مهيني جي ڏهين تاريخ هيئن ٿيو تہ نبوڪدرضر، بابل جو بادشاهہ، پنهنجو سڄو لشڪر وٺي يروشلم تي ڪاهي آيو، ۽ اُن جي چوڌاري منزل ڪري لهي پيو؛ ۽ ان جي چوڌاري ساڻس وڙهڻ لاءِ دمدما جوڙيائون.

⁵ انهيءَ طرح شهر صدقياہ بادشاهہ جي يارهين ورهيہ تائين گهيري هيٺ رهيو.

⁶ چوٿين مهيني جي نائين تاريخ شهر ۾ اهڙو ڏڪار اچي پيو جو انهيءَ ملڪ جي ماڻهن لاءِ ماني ڪانہ لڌي.

⁷ تنهن کان پوءِ شهر جي ڀت هڪڙي هنڌان ڀڃي وڌائون، ۽ سڀ جنگي مرد اُٿي ڀڳا، ۽ رات جو ٻن ڀتين جي وچ وارو در، جو بادشاهہ جي باغ جي پاسي کان هو، تنهن رستي شهر مان نڪري ٻاهر ٿيا؛ (هاڻي ڪسدي شهر جي چوڌاري موجود هئا:) ۽ هو عرباہ جو رستو ڏيئي هليا ويا.

⁸ پر ڪسدين جو لشڪر بادشاهہ جي پٺيان پيو، ۽ يريحو جي ميدان ۾ صدقياہ کي وڃي پهتو؛ ۽ هن جو سارو لشڪر کانئس ڇڄي ڌار ٿي پيو.

⁹ تڏهن هنن بادشاهہ کي پڪڙي ورتو، ۽ هن کي حمات جي زمين ۾ ربلہ منجهہ بابل جي بادشاهہ وٽ آندائون؛ ۽ اُنهي هن تي فتويٰ جاري ڪئي.

¹⁰ ۽ بابل جي بادشاهہ، صدقياہ جي پٽن کي سندس اکين آڏو قتل ڪرايو: هن يهوداہ جي سڀني اميرن کي بہ ربلہ ۾ قتل ڪرايو.

¹¹ ۽ هن صدقياہ جون اکيون ڪڍايون؛ ۽ بابل جو بادشاهہ هن کي زنجيرن ۾ ٻڌائي بابل ڏي کڻي ويو، ۽ سندس مرڻ جي ڏينهن تائين قيد ۾ رکيائينس.

¹² هاڻي پنجين مهيني جي ڏهين تاريخ، جو بابل جي بادشاهہ نبوڪدرضر جو اوڻيهون ورهيہ هو، تنهن ۾ نبوزرادان، پهري وارن جو سردار، جو بابل جي بادشاهہ جي اڳيان بيهندو هو، سو يروشلم ۾ آيو:

¹³ ۽ انهيءَ خداوند جو گهر ۽ بادشاهہ جو گهر ساڙيو؛ ۽ يروشلم جا سڀ گهر، بلڪ سڀڪو وڏو گهر، هن باهہ سان ساڙيو.

¹⁴ ۽ ڪسدين جو سارو لشڪر جو پهرين وارن جي سردار سان هو، تنهن چوڌاري يروشلم جون سڀ ڀتيون ڀڃي ڇڏيون.

¹⁵ تڏهن پهري وارن جو سردار نبوزرادان ماڻهن مان جيڪي تمام غريب قسم جا ماڻهو هئا، ۽ شهر ۾ رهيل ماڻهن مان جيڪي باقي بچيا هئا، ۽ جيڪي ڀڄي نڪري اچي بابل جي بادشاهہ سان گڏيا هئا، تن کي ۽ باقي بچيل خلق کي قيد ڪري وٺي ويو.

¹⁶ پر پهري وارن جي سردار نبوزرادان انهي زمين جي تمام غريب ماڻهن کي ڊاک جي منهہ جي سنڀال ۽ ڪڙمت ڪرڻ لاءِ ڇڏي ويو.

¹⁷ ۽ جيڪي پتل جا ٿنڀ خداوند جي گهر ۾ هئا، ۽ پايا ۽ پتل جو حوض، جي خداوند جي گهر ۾ هئا، سي ڪسدين ڀڃي پرزا پرزا ڪري ڇڏيا ۽ انهن جو سڀ پتل بابل ڏي کڻي ويا.

¹⁸ ديڳيون، ۽ ڪوڏاريون، ۽ ڦلن وڍڻ جون قينچيون، ۽ پيالا، ۽ چمچا، ۽ سڀ پتل جا ٿانوَ جن سان خدمت ڪندا هئا سي سڀ بہ هو کڻي ويا.

¹⁹ ۽ پياليون، ۽ باهہ کڻڻ جا ٿانوَ، ۽ پيالا، ۽ ديڳيون، ۽ شمعدان، ۽ چمچا، ۽ وڏا پيالا؛ انهن مان جيڪي سون جا هئا تن جو سون، ۽ جيڪي چانديءَ جا هئا تن جي چاندي، پهري وارن جو سردار کڻي ويو.

²⁰ ٻہ ٿنڀ، هڪڙو سمنڊ، ۽ ٻارهن پتل جا ڍڳا، جي پاين هيٺان هئا، ۽ جي سليمان بادشاهہ خداوند جي گهر لاءِ جوڙايا هئا: ۽ انهن سڀني ٿانوَن جو پتل تورڻ کان ٻاهر هو.

²¹ باقي ٿنڀ، تن مان بہ هڪڙي ٿنڀ جي اوچائي ارڙهن هٿ هئي؛ ۽ ٻارهن هٿن جي هڪڙي رسي انهي جي چوڌاري ڦري ٿي آئي؛ ۽ انهي جي ٿولهہ چار آڱريون هئي: ۽ اُهو پورو هو.

²² ۽ پتل جو ڇٽ انهيءَ جي مٿان هو؛ ۽ هڪڙي ڇٽ جي اوچائي پنج هٿ هئي، ۽ ان جي چوڌاري ڇٽ تي ڄاري جو ڪم ۽ ڏاڙهون هئا: ۽ ٻئي ٿنڀ کي اهڙيون ساڳيون شيون ۽ ڏاڙهون هئا.

²³ ۽ پاسن تي ڇهانوي ڏاڙهون هئا؛ ڪل ڏاڙهون انهيءَ ڄاريدار ڪم تي چوڌاري هڪ سؤ هئا.

²⁴ ۽ پهري وارن جو سردار، سراياہ سردار ڪاهن، ۽ صفنياہ ٻئي درجي واري ڪاهن، ۽ در جي سنڀال ڪرڻ وارن کي بہ وٺي ويو:

²⁵ ۽ شهر مان هن هڪڙي عملدار کي کنيو جو جنگي مردن جي مٿان مقرر هو؛ ۽ ست ماڻهو انهن مان جي بادشاهہ جو منهن ڏسندا هئا، جي شهر ۾ لڌا ويا؛ ۽ لشڪر جي سردار جو منشي، جو ملڪ جي ماڻهن جي ياداشت لکندو هو: ۽ ملڪ جي ماڻهن مان سٺ ڄڻا جي شهر منجهہ هٿ آيا سي سڀ هو وٺي ويو.

²⁶ ۽ پهري وارن جي سردار نبوزرادان انهن کي وٺي ربلہ ۾ بابل جي بادشاهہ وٽ آندو.

²⁷ ۽ بابل جي بادشاهہ حمات جي زمين ۾ ربلہ منجهہ انهن کي مارائي ڇڏيو. انهي طرح يهوداہ قيد ٿي پنهنجي زمين مان نڪري ويو.

²⁸ اُهي ماڻهو جن کي نبوڪدرضر ستين سال ۾ قيد ڪري وٺي ويو سي ٽي هزار ۽ ٽيويهہ يهودي هئا:

²⁹ ۽ نبوڪدرضر جي ارڙهين ورهيہ ۾ هو يروشلم مان اٺ سو ٻٽيهہ ماڻهو قيد ڪري وٺي ويو:

³⁰ نبوڪدرضر جي ٽيويهين ورهيہ ۾ پهري وارن جو سردار نبوزرادان يهودين مان ست سؤ پنجيتاليهہ ماڻهو قيد ڪري وٺي ويو: سڀ ماڻهو چار هزار ڇهہ سؤ ٿيا.

³¹ ۽ يهوداہ جي بادشاهہ يهويا ڪين جي قيد جي ستٽيهين ورهيہ ۾ ٻارهين مهيني جي پنجويهين تاريخ، هيئن ٿيو تہ بابل جي بادشاهہ اويل مرودڪ، پنهنجي بادشاهت جي پهرئين ورهيہ ۾، يهوداہ جي بادشاهہ يهوياڪين کي سرفراز ڪيو، ۽ هن کي قيد مان ڪڍيائين؛

³² ۽ انهيءَ سان مهربانيءَ جي رستي ڳالهائين، ۽ جيڪي بادشاهہ بابل ۾ ساڻس هئا، تن جي تختن کان هن جو تخت مٿي رکيائين.

³³ ۽ هو پنهنجي قيدين واري پوشاڪ بدلائي حياتيءَ جا باقي ڏينهن سندس اڳيان ماني کائيندو رهيو.

³⁴ ۽ هن جي قوت گذران لاءِ بابل جي بادشاهہ وٽان هن جي مرڻ جي ڏينهن تائين، سندس باقي حياتيءَ جي ڏينهن، روزمرہ جي خرچ موجب ملندو هوس.