پيدائش 5 - Sindhi Bible

¹ آدم جو نسب نامو هن ريت آهي. جڏهن خدا آدم کي پيدا ڪيو تہ هن کي پنهنجيءَ شڪل موجب جوڙيائين؛

² نر ۽ ناريءَ کي پيدا ڪيائين؛ ۽ کين برڪت ڏنائين، ۽ جنهن ڏينهن اهي پيدا ٿيا، سندن نالو آدم رکيائين.

³ ۽ جڏهن آدم هڪ سؤ ٽيهن ورهين جو ٿيو، تڏهن کيس سندس صورت تي ۽ سندس جهڙو پٽ ڄائو، جنهن جو نالو سيت رکيائين.

⁴ ۽ سيت جي ڄمڻ کان پوءِ آدم اٺ سؤ سال جيئرو رهيو، ۽ کيس پٽ ۽ ڌيون ڄايون.

⁵ ۽ آدم جي سموري عمر نو سؤ ٽيهہ ورهيہ هئي، پوءِ هو مري ويو.

⁶ جڏهن سيت هڪ سؤ پنجن ورهين جو ٿيو، تڏهن هن مان اُنوس پيدا ٿيو:

⁷ ۽ اُنوس جي پيدا ٿيڻ کان پوءِ سيت اٺ سؤ ست سال جيئرو رهيو ۽ کيس پٽ ۽ ڌيون ڄايون:

⁸ ۽ سيت جي سموري عمر نو سؤ ٻارهن ورهيہ هئي، پوءِ هو مري ويو.

⁹ جڏهن اُنوس نوي ورهين جو ٿيو، تڏهن هن مان قينان پيدا ٿيو:

¹⁰ ۽ قينان جي پيدا ٿيڻ کان پوءِ اُنوس اٺ سؤ پندرهن سال جيئرو رهيو ۽ کيس پٽ ۽ ڌيون ڄايون:

¹¹ ۽ اُنوس جي سموري عمر نو سؤ پنج ورهيہ هئي، پوءِ هو مري ويو.

¹² جڏهن قينان ستر ورهين جو ٿيو، تڏهن هن مان محلل ايل پيدا ٿيو:

¹³ ۽ محلل ايل جي پيدا ٿيڻ کان پوءِ قينان اٺ سؤ چاليهہ سال جيئرو رهيو ۽ کيس پٽ ۽ ڌيون ڄايون:

¹⁴ ۽ قينان جي سموري عمر نو سؤ ڏهہ ورهيہ هئي، پوءِ هو مري ويو.

¹⁵ جڏهن محلل ايل پنجهٺ ورهين جو ٿيو، تڏهن هن مان يارد پيدا ٿيو:

¹⁶ ۽ يارد جي پيدا ٿيڻ کان پوءِ محلل ايل اٺ سؤ ٽيهہ سال جيئرو رهيو ۽ کيس پٽ ۽ ڌيون ڄايون:

¹⁷ ۽ محلل ايل جي سموري عمر اٺ سؤ پنجانوي ورهيہ هئي، پوءِ هو مري ويو.

¹⁸ جڏهن يارد هڪ سؤ ٻاهٺ ورهين جو ٿيو، تڏهن هن مان حنوڪ پيدا ٿيو:

¹⁹ ۽ حنوڪ جي پيدا ٿيڻ کان پوءِ يارد اٺ سؤ سال جيئرو رهيو ۽ کيس پٽ ۽ ڌيون ڄايون:

²⁰ ۽ يارد جي سموري عمر نو سؤ ٻاهٺ ورهيہ هئي، پوءِ هو مري ويو.

²¹ جڏهن حنوڪ پنجهٺ ورهين جو ٿيو، تڏهن هن مان متوسلحہ پيدا ٿيو:

²² ۽ متوسلحہ جي پيدا ٿيڻ کان پوءِ حنوڪ ٽي سؤ سال خدا ساڻ پئي هليو، ۽ کيس پٽ ۽ ڌيون ڄايون:

²³ ۽ حنوڪ جي سموري عمر ٽي سؤ پنجهٺ ورهيہ هئي:

²⁴ ۽ حنوڪ خدا ساڻ هلندو رهيو ۽ گم ٿي ويو، ڇالاءِ جو خدا هن کي کڻي ورتو.

²⁵ جڏهن متوسلحہ هڪ سؤ ستاسي ورهين جو ٿيو، تڏهن هن مان لمڪ پيدا ٿيو:

²⁶ ۽ لمڪ جي پيدا ٿيڻ کان پوءِ متوسلحہ ست سؤ ٻياسي سال جيئرو رهيو ۽ کيس پٽ ۽ ڌيون ڄايون:

²⁷ ۽ متوسلحہ جي سموري عمر نو سؤ اوڻهتر ورهيہ هئي، پوءِ هو مري ويو.

²⁸ جڏهن لمڪ هڪ سؤ ٻياسي ورهين جو ٿيو، تڏهن منجهانئس هڪ پٽ پيدا ٿيو،

²⁹ جنهن جو نالو نوح رکيائين، ۽ چيائين تہ زمين، جنهن کي خدا لعنتي ڪيو آهي، تنهن جي سبب اسين پنهنجن هٿن جو جيڪو پورهيو ۽ محنت پيا ڪريون، تنهن کان هي ٻار اسان کي آرام ڏيندو.

³⁰ ۽ نوح جي پيدا ٿيڻ کان پوءِ لمڪ پنج سؤ پنجانوي سال جيئرو رهيو ۽ کيس پٽ ۽ ڌيون ڄايون:

³¹ ۽ لمڪ جي سموري عمر ست سؤ ستهتر ورهيہ هئي، پوءِ هو مري ويو.

³² جڏهن نوح پنج سؤ ورهين جو ٿيو، تڏهن هن مان سم، حام، ۽ يافت پيدا ٿيا.