پيدائش 4 - Sindhi Bible

¹ پوءِ آدم پنهنجيءَ زال حوا وٽ ويو؛ ۽ هوءَ پيٽ سان ٿي ۽ قائن ڄايس، تڏهن هن چيو تہ خداوند جي ٻاجهہ سان مون کي هڪڙو ماڻهو مليو آهي.

² پوءِ قائن جو ڀاءُ هابل ڄائو؛ هابل ريڍار هو ۽ قائن هاري هو.

³ ٿورن ڏينهن کان پوءِ هيئن ٿيو، جو قائن پنهنجي ٻنيءَ جي پيدائش مان خداوند جي لاءِ نذرانو آندو،

⁴ ۽ هابل بہ پنهنجين رڍن ٻڪرين مان پهريان ڦر ۽ چرٻي آندي. ۽ خداوند هابل ۽ سندس نذراني کي قبول ڪيو:

⁵ پر قائن ۽ سندس نذراني کي قبول نہ ڪيائين. تنهن تي قائن کي ڏاڍي ڪاوڙ لڳي ۽ سندس منهن لهي ويو.

⁶ تڏهن خداوند قائن کي چيو تہ توکي ڪاوڙ ڇو لڳي آهي؟ ۽ منهن لٿل ڇو ٿيو آهين؟

⁷ جيڪڏهن تون چڱو ڪرين، تہ جيڪر قبول نہ پوين ڇا؟ پر جي تون چڱو نٿو ڪرين تہ گناهہ تنهنجي دروازي تي ڇپ هڻي ويٺو آهي: ۽ تنهنجي خواهش اٿس، پر تون مٿس غالب پئُہ.

⁸ پوءِ قائن پنهنجي ڀاءُ هابل کي چيو تہ هل تہ ٻنيءَ ۾ هلون، ۽ جڏهن هو ٻنيءَ ۾ هئا، تڏهن قائن پنهنجي ڀاءُ هابل تي حملو ڪيو ۽ ماري وڌائينس.

⁹ تڏهن خداوند قائن کي چيو تہ تنهنجو ڀاءُ هابل ڪٿي آهي؟ هن چيو تہ مون کي خبر ڪانهي، آءٌ پنهنجي ڀاءُ جو نگهبان آهيان ڇا؟

¹⁰ تنهن تي خداوند چيس تہ تو هي ڇا ڪيو؟ تنهنجي ڀاءُ جو رت مون کي زمين مان پيو پڪاري.

¹¹ سو هاڻي جنهن زمين تنهنجي هٿان تنهنجي ڀاءُ جو رت وٺڻ لاءِ پنهنجو وات پٽيو آهي، تنهن جي ئي طرفان تون لعنتي ٿيو آهين؛

¹² جڏهن تون زمين تي پوک ڪندين، تڏهن انهيءَ مان توکي پيدائش ڪانہ ملندي، ۽ تون زمين تي رلندين ۽ ڌڪا کائيندين.

¹³ تڏهن قائن خداوند کي چيو تہ آءٌ هيءَ سزا سهي ڪين سگهندس.

¹⁴ ڏس اڄ تو مون کي هتان ڪڍي ڇڏيو آهي، ۽ آءٌ تنهنجي حضوريءَ کان پري ٿي ويندس؛ ۽ زمين تي رلندس ۽ ڌڪا کائيندس ۽ جيڪو مون کي ڏسندو، سو ماري وجهندم.

¹⁵ تڏهن خداوند چيس تہ جيڪو قائن کي ماري وجهندو تنهن کي ستوڻي سزا ملندي. ۽ خداوند قائن جي لاءِ هڪڙي نشاني مقرر ڪئي، تہ جيڪو هن کي ڏسي سو ماري نہ وجهيس.

¹⁶ سو قائن خداوند جي حضوريءَ مان نڪري ويو ۽ عدن جي اڀرندي پاسي نود جي ملڪ ۾ وڃي رهيو.

¹⁷ ۽ قائن پنهنجيءَ زال وٽ ويو؛ ۽ هوءَ پيٽ سان ٿي، ۽ حنوڪ نالي پٽ ڄايس؛ ۽ هن هڪڙو شهر ٻڌو ۽ انهيءَ شهر جو نالو پنهنجي پٽ جي نالي تان حنوڪ رکيائين.

¹⁸ ۽ حنوڪ مان عيراد پيدا ٿيو، ۽ عيراد مان محوياايل پيدا ٿيو، ۽ محوياايل مان مٿوساايل پيدا ٿيو، ۽ مٿوسوايل مان لمڪ پيدا ٿيو.

¹⁹ لمڪ ٻہ زالون ڪيون: هڪڙيءَ جو نالو عدهہ ۽ ٻيءَ جو نالو ضلهہ هو.

²⁰ عدهہ کي يابل ڄائو، جو تنبن ۾ رهندڙن ۽ ڍورن پاليندڙن جو پيءُ هو.

²¹ ۽ هن جي ڀاءُ جو نالو يوبل هو، جو سڀني بين ۽ بانسري وڄائڻ وارن جو پيءُ هو.

²² ضلهہ کي توبل قائن ڄائو، جو پتل ۽ لوهہ جا سڀ تيز هٿيار ٺاهيندڙ هو: ۽ توبل قائن جي ڀيڻ نعمہ هئي.

²³ ۽ لمڪ پنهنجين زالن کي چيو تہ اي عدهہ ۽ ضلهہ منهنجي ڳالهہ ٻڌو؛ اي لمڪ جون زالون منهنجي چوڻ تي ڪن ڏيو: مون هڪڙي ماڻهوءَ کي ماري وڌو، جنهن مون کي زخمي ڪيو هو، ۽ هڪڙي جوان کي قتل ڪيو، جنهن مون کي ايذاءُ رسايو هو:

²⁴ جيڪڏهن قائن جو بدلو ست ڀيرا ورتو ويندو، تہ لمڪ جو بدلو ستر ڀيرا ورتو ويندو.

²⁵ ۽ آدم وري پنهنجيءَ زال وٽ ويو؛ ۽ هن کي پٽ ڄائو جنهن جو نالو سيت رکيائين: ۽ هوءَ چوڻ لڳي تہ هابل جي بدران، جنهن کي قائن قتل ڪيو هو، خدا مون کي ٻيو پٽ ڏنو آهي.

²⁶ ۽ سيت جي گهر بہ پٽ ڄائو، جنهن جو نالو اُنوس رکيائين: انهي وقت کان وٺي ماڻهو خداوند جي نالي دعا گهرڻ لڳا.