حزقي ايل 45 - Sindhi Bible

¹ تنهن کانسواءِ جڏهن اوهين ورثي جي لاءِ ڪُڻن سان زمين ورهائيندا، تڏهن زمين جو هڪڙو حصو پاڪ ڪري خداوند جي لاءِ وقف جو نذرانو ڪري ڏجو: ان جي ڊيگهہ پنجويهہ هزار ڪانا هجي، ۽ ويڪر ڏهہ هزار: اُها چوڌاري ان جي سرحدن ۾ پاڪ ٿيندي.

² انهي مان پاڪ جاءِ جي لاءِ پنج سؤ ڪانا ڊيگهہ ۽ پنج سؤ ويڪر، چوڌاري چورس ٿيندي؛ ۽ ان جي پسگردائي لاءِ چوڌاري پنجاهہ هٿ ٿيندا.

³ ۽ هن ماپ جا تون پنجويهہ هزار ڊيگهہ ۾، ۽ ڏهہ هزار ويڪر ۾ ماپج؛ ۽ انهي ۾ پاڪ مڪان ٿيندو جو تمام پاڪ آهي.

⁴ اهو زمين جو هڪڙو پاڪ حصو آهي؛ اهو ڪاهنن، يعني تمام پاڪ مڪان جي خدمتگارن لاءِ رهندو؛ اها هنن جي گهرن جي جاءِ ٿيندي، ۽ پاڪ مڪان جي لاءِ هڪڙي پاڪ جاءِ ٿيندي.

⁵ ۽ پنجويهہ هزار ڊيگهہ ۾ ٻہ هزار ويڪر ۾، لاوين، يعني گهر جي خدمتگارن جي لاءِ ٿيندا، جي هنن جو خاص حصو ٿيندا؛ ۽ اُها ويهن ڪوٺين جي لاءِ جاءِ ٿيندي.

⁶ ۽ شهر جو حصو اوهين پنج هزار ويڪرو ۽ پنجويهہ هزار ڊگهو، وقف واري پاڪ حصي سان لڳولڳ مقرر ڪجو: اُهو اسرائيل جي سڄي گهراڻي لاءِ ٿيندو.

⁷ ۽ جيڪو حصو بادشاهہ جو ٿيندو سو وقف واري پاڪ حصي جي هِن پاسي ۽ هُن پاسي شهر جي حصي جي اڳيان ٿيندو؛ الهندي ڏانهن الهندي پاسي، ۽ اُڀرندي ڏانهن اُڀرندي پاسي ٿيندو؛ ۽ ڊيگهہ ۾ اُلهندي واري حد کان وٺي، اُڀرندي واري حد تائين، حصن مان هڪڙي جي موافق ٿيندو.

⁸ اُنهي زمين ۾، اُها اسرائيل ۾ سندس موروثي ملڪيت ٿيندي، ۽ منهنجا بادشاهہ وري اڳتي منهنجي قوم تي ظلم نہ ڪندا، پر هو اها زمين اسرائيل جي گهراڻي کي سندن فرقن موجب ڏيندا.

⁹ خداوند خدا هيئن ٿو فرمائي، تہ اي اسرائيل جا بادشاهہ اوهان جي لاءِ بس آهي، ظلم ۽ ڦرلٽ ڇڏي ڏيو، ۽ عدل ۽ انصاف ڪريو؛ خداوند خدا ٿو فرمائي، تہ منهنجي قوم تان پنهنجون تنگ طلبيون لاهي ڇڏيو.

¹⁰ اوهين پوري ساهمي، ۽ پورو ايفہ، ۽ پورو بٿ رکو.

¹¹ ايفہ ۽ بٿ هڪڙي ئي وزن جو هئڻ گهرجي؛ بٿ خومر جو ڏهون حصو هجي، ۽ ايفہ بہ خومر جو ڏهون حصو هجي: انهي جو وزن خومر موجب هجي.

¹² ۽ شيڪل ۾ ويهہ جيرا هئڻ گهرجن: ويهہ شيڪل، پنجويهہ شيڪل، ۽ پندرهن شيڪل اوهان جو مانہ ٿيندو.

¹³ اهو آهي نذرانو جو اوهين پيش ڪندا؛ ڪڻڪ جي خومرن مان ايفہ جو ڇهون حصو، ۽ جَوَن جي خومرن مان ايفہ جو ڇهون حصو اوهين ڏيندا:

¹⁴ ۽ تيل جو ٺهرايل حصو، يعني ڪر مان بٿ جو ڏهون حصو آهي، ۽ ڪر ڏهن بٿن جي برابر آهي، يعني خومر جي برابر؛ ڇالاءِ جو خومر ۾ ڏهہ بٿ آهن:

¹⁵ ۽ اسرائيل جي ساون چراگاهن مان، کاڌي جي ۽ ساڙڻ واري ۽ سلامتيءَ جي قربانين لاءِ، ٻن سوَن جي ڌڻ مان هڪڙو گهيٽو، تہ انهن جو ڪفارو ٿئي؛ خداوند خدا ائين ٿو فرمائي.

¹⁶ ملڪ جا سڀ ماڻهو اسرائيل جي حاڪم لاءِ اهو نذرانو ڏيندا.

¹⁷ ۽ پوءِ اهو انهي حاڪم جو فرض ٿيندو تہ سوختني قربانيون کاڌي جون قربانيون ۽ پيئڻ واريون قربانيون، عيدن تي، ۽ نوَن چنڊن تي، ۽ سبتن تي، ۽ اسرائيل جي گهراڻي جي مقرر ڪيل سڳورن ڏينهن تي ڏئي: هو گناهہ جي قرباني، ۽ کاڌي جي قرباني، ۽ سوختني قرباني، ۽ سلامتيءَ جون قربانيون تيار ڪندو، انهي لاءِ تہ اسرائيل جي گهراڻي لاءِ ڪفارو ٿئي.

¹⁸ خداوند خدا هيئن ٿو فرمائي، تہ پهرين مهيني جي پهرين تاريخ، تون هڪڙو بي عيب وهڙو وٺج؛ ۽ پاڪ مڪان کي صاف ڪج.

¹⁹ ۽ ڪاهن گناهہ جي قربانيءَ جو رت کڻي گهر جي در جي ٿنڀن تي، ۽ قربانگاهہ جي طاقيءَ جي چئني ڪُنڊن تي، ۽ اندرئين ايوان جي در جي ٿنڀن تي ڇاٽاري.

²⁰ انهي طرح ستين تاريخ بہ، سڀ ڪنهن قصور وار ۽ ڀورڙي جي لاءِ بہ ڪجو، ۽ انهي طرح اوهين گهر جو ڪفارو ڏجو.

²¹ پهرين مهيني جي چوڏهين تاريخ اوهين ست ڏينهن برابر فسح جي عيد ڪجو؛ فقط اڻ خميري ماني کائجو.

²² ۽ انهي ڏينهن بادشاهہ پنهنجي لاءِ، ۽ ملڪ جي سڀني ماڻهن لاءِ، هڪڙو ڍڳو گناهہ جي قربانيءَ واسطي تيار ڪندو.

²³ ۽ عيد وارا ست ئي ڏينهن، هر روز ست بي عيب ڍڳا، ۽ ست گهٽا خداوند جي لاءِ ساڙڻ واري قربانيءَ واسطي هو تيار ڪندو، ۽ هر روز هڪڙو ٻڪر گناهہ جي قربانيءَ لاءِ بہ.

²⁴ ۽ کاڌي جي قرباني لاءِ هڪڙو ايفہ هڪ ڍڳي پٺيان، ۽ هڪڙو ايفہ هرهڪ گهٽي پٺيان، ۽ هرهڪ ايفہ جي پٺيان تيل جو هڪڙو هين تيار ڪندو.

²⁵ ستين مهيني جي پندرهين تاريخ بہ، عيد تي هو ستن ڏينهن تائين ساڳيو انهي طرح ڪندو؛ گناهہ جي قربانيءَ، ۽ سوختني ۽ کاڌي واري قربانيءَ ۽ تيل موافق.