حزقي ايل 23 - Sindhi Bible

¹ خداوند جو ڪلام وري بہ مون تي نازل ٿيو، تہ

² اي آدمزاد، ڪي ٻہ زالون، هڪڙي ماءُ جون ڌيئرون هيون:

³ انهن مصر ۾ زناڪاري جا ڪم ڪيا؛ بلڪ انهن جوانيءَ جي ڏينهن ۾ زناڪاريءَ جا ڪم ڪيا؛ اُتي هنن جون ڇاتيون مليون ويون، ۽ اُتي هنن جي ڪنوارپڻ جا ڏُڪ نپوڙيا ويا.

⁴ ۽ انهن مان وڏيءَ جو نالو اهولہ هو ۽ ان جي ننڍي ڀيڻ جو اهوليبہ هو: اُهي منهنجون ٿيون، ۽ پٽ ۽ ڌيئرون ڄڻيائون. هاڻي اهولہ آهي سامريا ۽ اهوليبہ آهي يروشلم.

⁵ ۽ جڏهن اهولہ منهنجي ٿي تڏهن زناڪاري ڪرڻ لڳي؛ ۽ پنهنجن سينڌن تي، يعني اسوري جي سندن پاڙيسري هئا، تن کي حد کان وڌيڪ پيار ڪرڻ لڳي،

⁶ ۽ انهن کي آسماني ڪپڙا پيل هئا، ۽ اُهي نواب ۽ حاڪم هئا، سڀيئي دلپسند جوان ماڻهو، ۽ گهوڙن تي چڙهڻ وارا گهوڙي سوار هئا.

⁷ اُهي سڀيئي جي اسور جا چونڊيل ماڻهو هئا، تن سان هن زناڪاري ڪئي: ۽ جن تي هن جو حد کان وڌيڪ پيار هو، ۽ انهن جي سڀني بُتن سان هن پاڻ کي ناپاڪ ڪيو.

⁸ هن مصر جي ڏينهن کان وٺي اڃا پنهنجون زناڪاريون نہ ڇڏيون آهن؛ ڇالاءِ جو هو سندس جوانيءَ ۾ ساڻس گڏ سمهيا، ۽ سندس ڪنوارپڻ وارا ڏُڪ نپوڙيا هئائون. ۽ هنن ساڻس خوب زنا ڪئي.

⁹ جنهنڪري مون هن کي سندس سينڌن جي حوالي ڪري ڇڏيو، يعني اسورين جي حوالي، جن سان هن جي حد کان گهڻي محبت هوندي هئي.

¹⁰ انهن هن کي اگهاڙو ڪيو، انهن سندس پٽ ۽ ڌيئرون قابو ڪيون، ۽ کيس ترار سان ڪُهي ڇڏيائون: ۽ هوءَ زالن ۾ هڪڙو پهاڪو ٿي ويئي، ڇالاءِ جو انهن مٿس فتوائن جي تعميل ڪئي.

¹¹ ۽ سندس ڀيڻ اهوليبہ اهو حال ڏٺو، پر اُها هن کان بہ وڌيڪ پنهنجي عشقبازيءَ ۾ خراب هئي، ۽ پنهنجين زناڪارين ۾ بہ، جي سندس ڀيڻ جي زناڪارين کان وڌيڪ هيون.

¹² هوءَ اسورين، نوابن توڙي حاڪمن، يعني پنهنجي پاڙيسرين تي مست هئي، جن کي نهايت عمديون پوشاڪون پيل هيون، ۽ گهوڙن تي چڙهڻ وارا گهوڙي سوار هئا، جي سڀ دلپسند جوان مرد هئا.

¹³ ۽ مون ڏٺو تہ هوءَ ناپاڪ ٿي آهي؛ اُنهن ٻنهي هڪڙو ئي رستو ورتو آهي.

¹⁴ هوءَ پنهنجون زناڪاريون وڌائڻ لڳي؛ ڇالاءِ جو هن ماڻهن جون تصويرون ڀِت تي نڪتل ڏٺيون، يعني شنگرف سان نڪتل ڪسدين جون شڪليون.

¹⁵ جن جي چيلهين تي ڪمربند ٻڌل هئا، ۽ انهن جي مٿي تي رنگين پٽڪا هئا، سڀ ڏسڻ ۾ سردار ٿي آيا، جهڙا بابل جا رهاڪو ڪسديہ ۾.

¹⁶ هوءَ ڏسڻ سان انهن تي عاشق ٿي پيئي ۽ هنن وٽ ڪسديہ ۾ قاصد موڪليائين.

¹⁷ ۽ بابل جا رهاڪو وٽس آيا ۽ سندس عشق واري بستري تي چڙهي ساڻس زنا ڪري کيس ناپاڪ ڪيائون، ۽ هوءَ انهن سان ناپاڪ ٿي، ۽ سندس روح انهن کان ڇڄي ڌار ٿيو.

¹⁸ انهي طرح هن پنهنجون زناڪاريون ۽ پنهنجي اوگهڙ ظاهر ڪئي: تڏهن منهنجو روح هن کان ڇڄي ڌار ٿيو. جيئن منهنجو روح هن جي ڀيڻ کان ڇڄي ڌار ٿيو هو.

¹⁹ انهي هوندي بہ هوءَ ويئي پنهنجون زناڪاريون وڌائيندي، ۽ پنهنجي جوانيءَ جا ڏينهن ياد ڪندي، جڏهن هوءَ مصر جي زمين ۾ ڪڃريءَ وارو ڪسب ڪندي رهندي هئي.

²⁰ ۽ هوءَ پنهنجي سينڌن تي مرڻ لڳي، جن جو عضوو گڏهن جي عضوي جهڙو آهي، ۽ جن جي مني گهوڙن جي منيءَ جهڙي آهي.

²¹ انهي طرح تو پنهنجي جوانيءَ واري شهوت پرستي ياد ڪئي، جو مصري تنهنجا ڏُڪ نپوڙيندا هئا، ۽ تنهنجي جوانيءَ جون ڇاتيون مَليندا هئا.

²² تنهنڪري خداوند خدا هيئن ٿو فرمائي، تہ ڏس، آءٌ تنهنجا اُهي عاشق توتي اُٿاري آڻيندس، جن کان تنهنجو روح ڇڄي ڌار ٿيو آهي، ۽ اُهي آءٌ هر طرف کان تنهنجي برخلاف آڻيندس؛

²³ بابلي ۽ سڀ ڪسدي، فقود ۽ شوع، ۽ قوع، انهن سان گڏ سڀ اسوري: دلپسند جوان مرد، سڀيئي نواب ۽ حاڪم، سردار ۽ ناميارا ماڻهو، سڀ گهوڙن تي چڙهيل.

²⁴ ۽ هو هٿيارن، گاڏين، ۽ گاڏن، ۽ ماڻهن جي هڪڙي ميڙ سان توتي چڙهي ايندا؛ هو ڍال، ۽ سپر، ۽ جنگي توپ سان چوڌاري توتي سنبري ايندا: ۽ آءٌ عدالت جو ڪم هنن جي ذمي ڪندس، ۽ هو پنهنجن فيصلن موجب توتي فتويٰ جاري ڪندا.

²⁵ آءٌ پنهنجي غيرت تنهنجي برخلاف کڙي ڪندس، ۽ اُهي توسان ڏاڍيءَ سختيءَ جي هلت ڪندا؛ اُهي تنهنجو نڪ ۽ تنهنجا ڪَن وڍي ڇڏيندا، ۽ تنهنجا باقي بچيل ماڻهو ترار سان ڪِرندا: هو تنهنجا پٽ ۽ تنهنجون ڌيئرون گرفتار ڪندا، ۽ تنهنجي باقي بچيلن کي باهہ ساڙي چٽ ڪري ڇڏيندي.

²⁶ هو تنهنجا ڪپڙا بہ لاهي ويندا، ۽ تنهنجا سهڻا زيور بہ کڻي ويندا.

²⁷ انهي طرح آءٌ تنهنجي شهوت پرستي ۽ تنهنجي زناڪاري، جا تو مصر جي ملڪ مان آندي، سا تو مان ڪڍي ڇڏيندس؛ جنهنڪري تون پنهنجون اکيون هنن ڏانهن نہ کڻندينءَ ۽ نہ وري مصر کي ياد ڪندينءَ.

²⁸ ڇالاءِ جو خداوند خدا هيئن ٿو فرمائي، تہ ڏس، آءٌ توکي انهن جي هٿن ۾ ڏيئي ڇڏيندس، جن کي تون ڌڪارين ٿي، انهن جي هٿن ۾ جن کان تنهنجو روح ڇڄي ڌار ٿيو آهي:

²⁹ ۽ هو توسان دشمنيءَ جي هلت ڪندا، ۽ تنهنجو سڀ پورهيو کڻي ويندا، ۽ توکي اُگهاڙو ننگو ڇڏي ويندا؛ ۽ تنهنجي زناڪارين جي اوگهڙ، تنهنجي شهوت پرستي، توڙي تنهنجون زناڪاريون ظاهر ٿي پونديون.

³⁰ اهي سڀ ڳالهيون توسان ڪيون وينديون، ڇالاءِ جو تون غير قومن جي پٺيان زناڪاري ڪندي رهي آهين، ۽ ڇالاءِ جو تون انهن جي بُتن سان ناپاڪ ٿي آهين.

³¹ تون پنهنجي ڀيڻ جي رستي تي پي هلي آهين؛ تنهنڪري آءٌ هن جو پيالو تنهنجي هٿ ۾ ڏيندس.

³² خداوند خدا هيئن ٿو فرمائي، تہ تون پنهنجي ڀيڻ جي پيالي مان پيئندينءَ، جو اونهو ۽ وڏو آهي: توتي کل ٺٺولي ٿيندي، ۽ توتي مسخريون ڪندا، تہ اُنهي ۾ گهڻو ڪجهہ اچي وڃي ٿو.

³³ تون حيرت ۽ ويراني جي پيالي سان، پنهنجي ڀيڻ سامريہ جي پيالي سان، نشي ۽ ڏک سان، ڀرجي ويندينءَ.

³⁴ بلڪ تون اُهو سڄو پي ويندينءَ ۽ ذرو بہ نہ ڇڏيندينءَ، ان جا ڀڳل ٽڪر بہ چٻاڙي ويندينءَ، ۽ پنهنجون ڇاتيون ڦاڙيندينءَ: ڇالاءِ جو خداوند خدا ٿو فرمائي، تہ مون ائين فرمايو آهي.

³⁵ خداوند خدا هيئن ٿو فرمائي، تہ ڇالاءِ جو تو مون کي وساري ڇڏيو آهي، ۽ مون کي پنهنجي پٺيان اُڇلائي ڇڏيو اٿيئي، تنهنڪري تون پنهنجي شهوت پرستي ۽ پنهنجون زناڪاريون بہ پاڻ کڻ.

³⁶ خداوند هيترو بہ وڌيڪ مون کي چيو، تہ اي آدمزاد، تون اهولہ ۽ اهوليبہ جي عدالت ڪندين ڇا؟ تڏهن انهن کي سندن ڪراهت جهڙا ڪم ظاهر ڪري ٻڌاءِ.

³⁷ ڇالاءِ جو هنن زناڪاري ڪئي آهي ۽ انهن جي هٿن تي رت آهي، ۽ پنهنجن بُتن سان هنن زنا ڪئي آهي؛ ۽ جيڪي پٽ هنن مون مان ڄڻيا تن کي بہ هنن انهن لاءِ باهہ مان لنگهايو آهي، تہ ڳڙڪي وڃن.

³⁸ تنهن کانسواءِ هنن هي بہ مون سان ڪيو آهي: انهي ساڳي ڏينهن هنن منهنجو پاڪ مڪان پليت ڪيو آهي، ۽ منهنجن سبتن جي بي ادبي ڪئي اٿن.

³⁹ ڇالاءِ جو پنهنجن ٻارن کي پنهنجن بُتن تي ڪُهڻ کانپوءِ ساڳئي ڏينهن هو منهنجي پاڪ مڪان ۾ آيا تہ انهي کي پليت ڪن؛ ۽ ڏس، منهنجي گهر جي وچ ۾ هنن ائين ڪيو آهي.

⁴⁰ تنهن کانسواءِ اوهان اُهي ماڻهو گهرايا آهن جي پري کان ٿا اچن: جن ڏانهن قاصد موڪليو ويو هو ۽ ڏسو اُهي آيا؛ جن جي لاءِ تو غسل ڪيو، ۽ پنهنجين اکين ۾ ڪجل وڌو، ۽ پاڻ کي ڳهن ڳٺن سان سينگاريو؛

⁴¹ ۽ هڪڙي شاهي بستري تي چڙهي ويٺينءَ ۽ تو انهي جي اڳيان هڪڙي ميز ٺاهي رکي، جنهن تي تو منهنجو لوبان ۽ منهنجو تيل رکيو.

⁴² ۽ وٽس عياش ماڻهن جو آواز هو: ۽ بيابان مان عام قسم جي ماڻهن سان شرابي آندا ويا؛ ۽ انهن هنن ٻنهي جي هٿن ۾ ڪنگڻ وڌا ۽ هنن جي مٿي تي سهڻا ڇٽ رکيائون.

⁴³ تڏهن مون انهي کي چيو، جا زناڪاري ڪري ڪري اچي پڪي ٿي هئي، تہ هاڻي اُهي هن سان زناڪاريون ڪندا، ۽ هوءَ انهن سان سمهندي.

⁴⁴ ۽ هو وٽس ويا، جيئن ماڻهو ڪنهن ڪڃريءَ وٽ ويندا آهن: انهي طرح هو انهن فاحشہ زالن اهولہ ۽ اهوليبہ وٽ ويا.

⁴⁵ تنهنڪري سچا ماڻهو زناڪار زالن جي فتويٰ ۽ خوني زالن واري فتويٰ هنن جي حق ۾ جاري ڪندا، ڇالاءِ جو هو زناڪار آهن ۽ هنن جي هٿن ۾ رت آهي.

⁴⁶ تنهنڪري خداوند خدا هيئن ٿو فرمائي، تہ آءٌ هنن تي هڪڙي جماعت چاڙهي آڻيندس، ۽ هنن کي هيڏي هوڏي اُڇلجڻ ۽ ڦرجڻ لاءِ ڏيئي ڇڏيندس.

⁴⁷ ۽ اُها جماعت هنن کي پٿرن سان سنگسار ڪندي، ۽ پنهنجن ترارن سان ماري ڇڏيندي: هو انهن جا پٽ ۽ ڌيئرون ڪُهندا، ۽ هنن جا گهر باهہ سان ساڙي ڇڏيندا.

⁴⁸ انهي طرح آءٌ شهوت پرستي زمين مان بند ڪرائي ڇڏيندس، تہ سڀ زالون عبرت وٺن، ۽ اوهان جي شهوت پرستي جي پيروي نہ ڪن.

⁴⁹ ۽ هو اوهان جي شهوت پرستيءَ جو بدلو اوهان تي آڻيندا؛ ۽ اوهين پنهنجن بُتن جا گناهہ کڻنديون: ۽ اوهين ڄاڻنديون تہ آءٌ خداوند خدا آهيان.