حزقي ايل 1 - Sindhi Bible

¹ ٽيهين ورهيہ ۾، چوٿين مهيني جي پنجين تاريخ هيئن ٿيو، تہ جنهن وقت آءٌ ڪبار نديءَ جي ڪناري تي قيدين منجهہ هوس، انهي وقت آسمان کُلي پيو ۽ مون خدا جا رويا ڏٺا.

² يهوياڪين بادشاهہ جي قيد جي پنجين ورهيہ ۾، انهي مهيني جي پنجين تاريخ،

³ ڪبار نديءَ جي ڪناري تي، ڪسدين جي ملڪ ۾ خداوند جو ڪلام ظاهر ظهور حزقي ايل بن بوزي ڪاهن تي نازل ٿيو، ۽ اُتي خداوند جو هٿ هن تي هو.

⁴ ۽ مون نهاريو تہ اُتر مان هڪڙي طوفان جهڙي واچ نڪتي، ۽ هڪڙو وڏو ڪڪر جنهن ۾ ڄڻ تہ باهہ ويڙهي پئي هئي، ۽ انهي جي چوڌاري روشنائي هئي، ۽ انهي جي وچان، يعني باهہ جي وچ مان عنبير رنگ جهڙي روشنائي نڪتي.

⁵ ۽ انهيءَ جي وچ مان چئن ساهہ وارن جي شڪل ڏسڻ ۾ آئي، ۽ انهن جي صورت انسان جي شڪل جهڙي هئي.

⁶ ۽ انهن مان هرهڪ کي چار منهن هئا ۽ هرهڪ کي چار پر هئا.

⁷ ۽ انهن جون ٽنگون سڌيون هيون؛ ۽ انهن جي پيرن جي تري گابي جي کر جهڙي هئي: ۽ اهي چمڪندڙ پتل وانگي پئي چمڪيا.

⁸ ۽ انهن جي چئني پاسي سندن پرن هيٺ ماڻهوءَ جهڙا هٿ هئا: ۽ انهن چئني جا منهن ۽ پر ههڙا هئا؛

⁹ يعني هنن جا پر هڪٻئي سان ڳنڍيل هئا؛ هلندي اُهي مڙيا نٿي؛ انهن مان هرڪو سڌو اڳتي ٿي هليو ويو.

¹⁰ باقي هنن جي منهن جي شڪل ماڻهوءَ جي منهن جهڙي هئي: ۽ انهن چئني جو منهن سڄي پاسي شينهن جهڙو هو؛ ۽ انهن چئني جو منهن کٻي پاسي ڏاند جهڙو هو؛ انهن چئني جو منهن باز جهڙو بہ هو.

¹¹ ۽ انهن جا منهن ۽ انهن جا پر مٿي ڌار ڌار هئا؛ هرهڪ جا ٻہ ٻہ پر هڪ ٻئي سان ڳنڍيل هئا، ۽ ٻن ٻن سان هنن جا بت ڍڪيل هئا.

¹² ۽ انهن مان هرڪو سڌو اڳتي هليو پئي ويو، جيڏانهن هلڻ جي مرضي ٿين تيڏانهن هو پئي ويا، ۽ هلندي اُهي مڙيا نٿي.

¹³ باقي انهن ساهہ وارن جي شڪل باهہ جي ٽانڊن جهڙي هئي، ۽ مشعلن وانگي ٿي ڏسڻ ۾ آئي؛ اُها باهہ انهن ساهہ وارن منجهہ پي چڙهي ۽ لٿي؛ ۽ اُها باهہ چمڪندڙ هئي ۽ انهي باهہ مان وڄ پي نڪتي.

¹⁴ ۽ اُهي ساهہ وارا وڄ جي تجلي وانگر ڊوڙندا ۽ موٽندا ڏسڻ ۾ آيا.

¹⁵ هاڻي جيئن مون انهن ساهہ وارن کي ڏٺو، تيئن زمين تي انهن جي ڀرسان، انهن جي چئن منهن موجب هرهڪ لاءِ هڪڙو ڦيٿو نظر آيو.

¹⁶ انهن ڦيٿن جي شڪل ۽ انهن جي بناوٽ فيروزيءَ جي رنگ جهڙي هئي: ۽ اُهي چارئي هڪڙي ڊول جا هئا: ۽ انهن جي شڪل ۽ انهن جي بناوٽ ڄڻ تہ ڦيٿي جي اندر ڦيٿو هئي.

¹⁷ جڏهن هو هليا ٿي تڏهن پنهنجن چئن پاسن تي ٿي هليا: هلڻ مهل هو ڦريا نٿي.

¹⁸ باقي انهن جا پاٽا سي اوچا ۽ خوفناڪ هئا؛ ۽ انهن چئني ڦيٿن جي پاٽن ۾ چوڌاري اکيون ئي اکيون هيون.

¹⁹ ۽ جڏهن اُهي ساهہ وارا هليا ٿي، تڏهن اُهي ڦيٿا سندن پاسن کان ٿي هليا: ۽ جڏهن اُهي ساهہ وارا زمين تان مٿي کڄيو ٿي ويا، تڏهن ڦيٿا بہ مٿي کڄيو ٿي ويا.

²⁰ جيڏانهن روح ٿي ويو اوڏانهن هو ٿي ويا؛ روح بہ اوڏانهن ٿي ويو: ۽ ڦيٿا ان جي پاسي کان مٿي ٿي کڄيا، ڇالاءِ جو انهن ساهہ وارن جو روح انهن ڦيٿن ۾ هو.

²¹ جڏهن هو ٿي هليا تڏهن هي بہ ٿي هليا؛ جڏهن هو ٿي بيٺا تڏهن هي بہ ٿي بيٺا؛ ۽ جڏهن هو زمين تان مٿي ٿي کڄيا تڏهن ڦيٿا بہ انهن جي پاسي کان مٿي ٿي کڄيا: ڇالاءِ جو ساهہ وارن جو روح ڦيٿن ۾ هو.

²² ۽ ساهہ وارن جي مٿي جي مٿان گنبذ وانگر هڪڙو آسمان هو؛ جنهن جو رنگ خوفناڪ بلور جهڙو هو، جو انهن جي مٿن جي مٿان پکڙيل هو.

²³ ۽ انهي آسمان هيٺان انهن جا پر سنوان هئا، هڪڙو ٻئي ڏانهن: هرهڪ کي ٻہ ٻہ هئا جن انهي جي بت جو هي پاسو ٿي ڍڪيو، ۽ هرهڪ کي ٻہ ٻہ هئا جن انهي جي بت جو هُو پاسو ٿي ڍڪيو.

²⁴ ۽ جڏهن هو هليا ٿي تڏهن هنن جي پرن جو آواز گهڻي پاڻيءَ جي آواز جهڙو ٿي ٻڌڻ ۾ آيو، يعني قادر مطلق جي آواز جهڙو، يا لشڪر جي گوڙ ۽ هل هنگامي جو آواز: جڏهن هو بيٺا ٿي تڏهن هنن پنهنجا پر لاڙي ٿي ڇڏيا.

²⁵ ۽ جيڪو آسمان انهن جي مٿي جي مٿان هو، تنهن جي مٿان هڪڙو آواز ٿي آيو: جڏهن هو بيٺا ٿي، تڏهن هنن پنهنجا پر لاڙي ٿي ڇڏيا.

²⁶ ۽ جيڪو آسمان انهن جي مٿن جي مٿان هو، تنهن جي مٿان تخت جهڙي هڪڙي شيءِ هئي، جا نيلم پهڻ جهڙي ڏسڻ ۾ ٿي آئي: ۽ انهيءَ تخت جهڙي شيءِ جي مٿان هڪڙي ماڻهوءَ جهڙي شڪل ڏسڻ ۾ ٿي آئي.

²⁷ ۽ مون انهي منجهہ چوڌاري هن جي چيلهہ ۽ ان کان مٿي واري صورت مان عنبير رنگ جهڙي باهہ ڏٺي؛ ۽ هن جي چيلهہ ۽ ان کان هيٺ ڄڻ تہ باهہ جي صورت مون ڏٺي، ۽ هن جي چوڌاري روشنائي هئي.

²⁸ آس پاس واري روشنائي اهڙي ٿي ڏسڻ ۾ آئي جهڙي مينهن واري ڏينهن ڪڪر ۾ ڪمان جي شڪل ۾ ڏسڻ ۾ اچي. خداوند جي جلال جي شڪل اهڙي ڏسڻ ۾ ٿي آئي. ۽ جڏهن مون اهو ڏٺو، تڏهن آءٌ منهن ڀر ڪِري پيس، ۽ مون هڪڙي ڳالهائيندڙ جو آواز ٻڌو.